GÉNESIS 6 - Biblia Guarani Tumpa Iñee

Kuimbae reta imbaeyoa

¹ Kuimbae reta omboɨpɨ ma oñemuña yave ɨvɨ iárambo, oa chupe reta tayɨ.

² Tumpa taɨ reta oecha kuimbae reta tayɨ maepöra yae reta yave, oiparavo reta iyeupe jembirekorä, jae reta oipota vae.

³ Jare yandeYa jei: “Mbaetɨta amaeño kuimbae oikove jekuae avei, echa jae ko sooño; jáeramo jaeño oikoveta ciento veinte año.”

⁴ Jókuae ara rupi oime kuimbae ipuku yae vae, jare vi Tumpa taɨ reta güɨreko güive kuimbae reta tayɨ, omomembɨ reta. Kuae reta ko jae imbaepuere yae vae, jókuae ara güive kuae kuimbae reta jërakua yae mbaepuere pe.

⁵ Jare yandeYa oecha kuimbae reta imbaeyoa jeiete yae ma ɨvɨ pe. Oecha kërai kuimbae reta ipɨa iyemongeta jekuaekuae mbaeyoa kotɨ reteiño.

⁶ Jayave yandeYa ombopɨatɨtɨ, arakae oyapo kuimbae vae, jare jókuae jasɨ ipɨa pe.

⁷ YandeYa jei: “Amokañɨteita kuae ɨvɨ güi kuimbae reta ayapogüe. Amokañɨteita kuimbae jare opaete mɨmba jare mɨmba ipɨtía re oguata vae, jare güɨra reta. ¡Echa chembopɨatɨtɨ arakae ayapo vae reta!”

⁸ Ërei Noé re yandeYa ipɨakatu reve omae.

Noé oyapo arca

⁹ Echa körai arakae Noé: Noé ko jae metei kuimbae jupi vae, ikavi jembiapo opaete vae reta güi jókuae ara rupi; oiko Tumpa jemimbota rupi kavi.

¹⁰ Oa Noé pe mboapɨ taɨ: Sem, Cam jare Jafet.

¹¹ Tumpa jóvai ɨvɨ ipo reta opa oikomegua. Jeta tekorai oyekuaa ɨvɨ pe.

¹² Tumpa omae ɨvɨ pegua reta re, jare oecha opaetei oikomegua ɨvɨ pe, echa opaete vae reta jeko kavi opa oikomegua.

¹³ Jayave Tumpa jei Noé pe: “Ayemongeta opa amokañɨtei vaerä kuimbae reta, echa jae reta jeko pegua opa teko kavi oikomegua. Jáeramo añave opata amokañɨtei kuae ɨvɨ kuimbae reta ndive.

¹⁴ Jayave eyapo ndeyeupe metei arca ɨvɨra iyaɨsɨ vae güi. Jare arca japɨpe emboyao yao. Eyapeteasɨ kavi japɨpe rupi jare ikupe rupi mbae ipomoasɨ vae pe.

¹⁵ Köraita reyapo jókuae arca: Ciento treinta y cinco metro pukugüe, veintidó metro y medio ipɨgüe, jare trece metro y medio ɨvategüe.

¹⁶ Mboapɨ yemboyao reyapota kuae arca: Igüɨasɨ pe, mbɨte pe jare ɨvateasɨ. Reñonota metei ventana ɨvateasɨ, jare igüɨ ete pe jöke.

¹⁷ Aruta ɨporu guasu ɨvɨ re, amokañɨtei vaerä opaete oikove kuae ara igüɨ pe vae reta. Jökorai opaete vae omanota.

¹⁸ Ërei ayapo morogüɨrökuavee päve nde ndive: Nde reiketa arca pe nderembireko ndive, jare nderaɨ reta jembireko reve reve.

¹⁹ Jare opaete oikove vae güi remoingeta mókoi mókoi rupi arca pe; jökorai oikove reta vaerä vi nde ndive. Remoingeta mɨmba kuimbae jare mɨmba kuña.

²⁰ Güɨra reta ñavo ambuaeyee vae, jare mbaemɨmba ñavo ambuaeyee vae jare opaete ipɨtía re oguata vae, oiketa nde ndive mókoi mókoi päve, oikove reta vaerä.

²¹ Eraja jeta oipotagüe tembíu, jare eñovatu, pepuere vaerä peu jare mɨmba reta vi.”

²² Jökorai oyapo Noé. Oyapo opaete Tumpa jei chupe rami.