GÉNESIS 50 - Biblia Guarani Tumpa Iñee

¹ Jayave José oiküava tu jetegüe, jare oyaeo reve oovapɨte.

² Jaɨkue rupi José oyókuai jembiokuai oporopoano vae reta, oipoano vaerä tu Israel jetegüe, agüɨye vaerä oikomegua. Jare oporopoano vae reta oyapo jökorai.

³ Jare oipoano reta jetegüe cuarenta ara rupi; echa jökorai ara ko oñepoanota tëogüe. Jare Egipto pegua reta oäpiro setenta ara,

⁴ jare oasa güire ara reta mbɨatɨtɨ pegua, José omomiari Faraón jo pegua reta, jei reve: —Añave pepɨakatu ko chekotɨ yave, pomoñera pemomiari vaerä cheve Faraón, pere reve:

⁵ “Cheru omanota ma yave oyapouka cheve ñererökuavee Tumpa rovake ayapo vaerä, körai jei: ‘Mase, ko che amanota ma, Canaán pe ayoouka ɨvɨkua tɨvɨarä vae pe cheñotɨta.’ Pomoñera añave aja vaerä cheru añotɨ joko pe, jare ayu yeta.”

⁶ Faraón jei chupe: —Ekua eñotɨ nderu, reñererökuavee Tumpa rovake chupe rami.

⁷ Jayave José ojo oñotɨ vaerä tu; jare yogüɨraja jupíe opaete Faraón iyɨvɨrigua reta, jëta pegua tenondegua reta, Egipto pegua reta,

⁸ jare opaete José jo pegua reta, tɨkeɨ reta jare tu iñemuña reta, jaeño ete michia reta oeya ɨvɨ Gosén pe ivecha reta jare iguaka reta ndive.

⁹ Yogüɨraja vi jupíe käretou ndive jare kavayu regua reta, jare oyeapo metei äpɨta tuichagüe.

¹⁰ Jare yogüɨraja oväe reta Atad pe, Jordán jovaicho pe oï vae pe yave, ipɨatɨtɨ yae reve oyaeo reta. Jare José ipɨatɨtɨ chiu ara rupi tu re.

¹¹ Jare jókuae ɨvɨ pe Cam iñemuña reta yogüɨreko vae oecha mbɨatɨtɨ guasu Atad pe yave, jei reta: “Egiptoɨgua reta pe mbɨatɨtɨ tuicha yae vae ko kuae.” Jáeramo ombojee reta Abel-mizraim, kuae oï Jordán jovaicho pe.

¹² Jacob taɨ reta oyapo chupe, opaete jae oyokuaigüe.

¹³ Taɨ reta güɨraja ɨvɨ Canaán pe, oñotɨ reta ɨvɨkua Macpela pegua pe, Abraham ogua ɨvɨ ɨvɨkua tɨvɨarä ndive vae pe, jae ko Efrón, Het iñemuña imbaegüe, Mamre güi kuaraɨ oëa kotɨ oï vae.

¹⁴ Jare José oyerova ye Egipto kotɨ opa güire oñotɨ tu, tɨkeɨ reta ndive jare opaete jae ndive yogüɨraja vae.

José imano

¹⁵ José tɨkeɨ reta oecha tu omano ma yave, oyemongeta reta, güɨramoi José omotareɨ retata, jei reta: “Omboepɨukata yandeve opaete ikavimbae yayapo chupe vae.”

¹⁶ Jayave omondo reta jei José pe: “Nderu oreokuai ndei omano mbove, jei reve:

¹⁷ Körai pere José pe: ‘Neɨ̈ro nderɨkeɨ reta pe opaete ikavimbae oyapo ndeve vae jare iyoa reta re.’ Jáeramo añave romoñera neɨ̈ro vaerä ikavimbae yae royapo vae re, echa nderu iTumpa jembiokuai ko ore.” Ñee omombeu vae reta imiari ñogüɨnoi ramboeve José oyaeo ma.

¹⁸ Yogüeru vi tɨkeɨ reta oyetavatɨka itindɨasɨ jóvai, jare jei reta: —Ko roï, oreapo nderembiokuairä.

¹⁹ Ërei ngatu José jei chupe reta: —Agüɨye pekɨɨye. Ngaraa che añeñono Tumpa jekovia pe.

²⁰ Pe reta peyemongeta ikavimbae chekotɨ, ërei Tumpa oipoepɨ ikavimbae vae ikavi vae pe, oyeapo vaerä añave yaecha vae, oasayepe vaerä jeta tekove.

²¹ Añave, agüɨye pekɨɨye; che ameeta pekaru vaerä, jare pemichia reta okaru vaerä. Jökorai José ombopɨakatu reta, echa omomiari mboroaɨu reve.

²² Jare oiko José Egipto pe; jae jare tu, jare tu iñemuña reta vi; jare oikove José ciento diez año.

²³ José oecha Efraín taɨ jɨmɨmino reta; jaeramiño vi Maquir taɨ reta okuakuaa José iyɨ́vɨri. Maquir jae ko Manasés taɨ.

²⁴ Jare José jei jëtara reta pe: “Che amanota ma, ërei Tumpa outa metei ara pemborɨ, jae perenoeta kuae ɨvɨ güi, arakae ma Tumpa güɨrökuavee ɨvɨ Abraham pe vae, jare Isaac pe jare yanderu Jacob pe vae kotɨ.”

²⁵ Jare José oyapouka Israel taɨ reta pe ñererökuavee Tumpa rovake oyapo reta vaerä, jei reve: “Añetete Tumpa outa pemborɨ, jare pe reta perajauka kuri kuae güi cheretegüe.”

²⁶ Jare José omano ciento diez año güɨnoi yave; jare oipoano reta jetegüe; jare oñono reta jet.