GÉNESIS 5 - Biblia Guarani Tumpa Iñee

Adán iñemuña reta

¹ Jae ko kuae tembikuatía Adán iñemuña reta oñemoapɨta oï pɨpe vae regua. Tumpa oyapo yave arakae kuimbae, Tumpa rami oyapo.

² Kuimbae jare kuña oyapo; iporerekua jese reta. Jare ombojee reta Adán jókuae ara oyapo yave.

³ Adán ciento treinta año güɨnoi yave oa chupe taɨ Set jae rami etei vae.

⁴ Adán taɨ Set oa güire oiko ochociento año, oa vi chupe ïru taɨ reta jare tayɨ reta;

⁵ opaete ara Adán oikove oiko vae, noveciento treinta año, jare omano.

⁶ Set güɨnoi ciento treinta año yave oa taɨ Enós.

⁷ Set oiko taɨ Enós oa güire ochociento siete año, oa vi chupe ïru taɨ reta jare tayɨ reta;

⁸ opaete ara Set oikove oiko vae, noveciento doce año jare omano.

⁹ Enós güɨnoi noventa año yave oa chupe taɨ Cainán.

¹⁰ Enós oiko taɨ Cainán oa güire ochociento quince año, oa vi chupe ïru taɨ reta jare tayɨ reta;

¹¹ opaete ara Enós oikove oiko vae, noveciento cinco año jare omano.

¹² Cainán güɨnoi setenta año yave oa chupe taɨ Mahalaleel.

¹³ Cainán oiko taɨ Mahalaleel oa güire ochociento cuarenta año, oa vi chupe ïru taɨ reta jare tayɨ reta;

¹⁴ opaete ara Cainán oikove oiko vae noveciento diez año jare omano.

¹⁵ Mahalaleel güɨnoi sesenta y cinco año yave oa chupe taɨ Jared.

¹⁶ Mahalaleel oiko taɨ Jared oa güire ochociento treinta año, oa vi chupe ïru taɨ reta jare tayɨ reta;

¹⁷ opaete ara Mahalaleel oikove oiko vae, ochociento noventa y cinco año jare omano.

¹⁸ Jared güɨnoi ciento sesenta y dos año yave oa chupe taɨ Enoc.

¹⁹ Jared oiko taɨ Enoc oa güire ochociento año, oa vi chupe ïru taɨ reta jare tayɨ reta;

²⁰ opaete ara Jared oikove oiko vae noveciento sesenta y dos año jare omano.

²¹ Enoc güɨnoi sesenta y cinco año yave oa chupe taɨ Matusalén.

²² Enoc oiko Tumpa jemimbota rupi. Jare oiko taɨ Matusalén oa güire tresciento año, oa vi chupe ïru taɨ reta jare tayɨ reta;

²³ opaete ara Enoc oikove oiko vae tresciento sesenta y cinco año.

²⁴ Enoc oiko Tumpa jemimbota rupi kavi, metei ara okañɨ echa Tumpa güɨraja.

²⁵ Matusalén güɨnoi ciento ochenta y siete año yave oa chupe taɨ Lamec.

²⁶ Matusalén oiko taɨ Lamec oa güire seteciento ochenta y dos año, oa vi chupe ïru taɨ reta jare tayɨ reta.

²⁷ Jökorai opaete ara Matusalén oikove oiko vae, noveciento sesenta y nueve año jare omano.

²⁸ Lamec güɨnoi ciento ochenta y dos año yave oa chupe metei taɨ.

²⁹ Jare ombojee Noé, echa jei: “Kuae yandemombutuuta oasa ete yaparavɨkɨ yandeYa oyepopeyu ɨvɨ re jeko pegua.”

³⁰ Lamec oiko taɨ Noé oa güire quiniento noventa y cinco año, oa vi chupe ïru taɨ reta jare tayɨ reta.

³¹ Opaete ara Lamec oikove oiko vae seteciento setenta y siete año jare omano.

³² Noé güɨnoi quiniento año yave, oa chupe taɨ reta: Sem, Cam jare Jafet.