GÉNESIS 47 - Biblia Guarani Tumpa Iñee

¹ José ou oikuaauka Faraón pe, jare jei: —Cheru jare cherɨkeɨ reta yogüeru oväe ɨvɨ Canaán güi, ivecha jare iguaka reta ndive, jare oime ñogüɨnoi ɨvɨ Gosén pe.

² Tɨkeɨ reta güi oiparavo pandepo güeru, oikuaauka vaerä Faraón pe.

³ Jayave Faraón oparandu José tɨkeɨ reta pe: —¿Mbaerero pa pe? Jae reta jei: —Ore nderembiokuai reta vecha iyangarekoa ko, oreñemuñagüe reta rami.

⁴ Jei reta vi Faraón pe: —Royu ko roiko vaerä kuae ɨvɨ pe; echa mbaetɨ kapii ore nderembiokuai reta ivecha peguarä, karuai jasɨ yae ko Canaán pe; jáeramo romoñera añave remaeño vaerä ore nderembiokuai reta yogüɨreko ɨvɨ Gosén pe.

⁵ Jayave Faraón imiari José pe jei reve: —Nderu jare nderɨkeɨ reta yogüeru ndépɨri.

⁶ Ɨvɨ Egipto ndepo pe ko oï; ɨvɨ Gosén emee nderu pe jare nderɨkeɨ reta pe yogüɨreko vaerä pɨpe, jare chugüi reta maangarekoa ikavi vae, peñono cherɨmba iyangarekoa itenondeguarä.

⁷ José güɨraja vi tu Jacob oikuaauka vaerä Faraón pe, Jacob oyapo maraetei Faraón pe omboete reve,

⁸ jare Faraón oparandu chupe: —¿Mbovɨ año pa renoi?

⁹ Jacob jei chupe: —Anoi ma ciento treinta año oipota rupi aguata vae, mbovɨ yae jare mbaetɨ ikavi ara reta cherekove pe, jare ndeiño aupitɨ cheñemuñagüe reta yogüɨreko rami.

¹⁰ Jaɨkue rupi Jacob oyupavo Faraón pe jare oë ojo jóvai güi.

¹¹ Jökorai José omee yogüɨreko vaerä tu jare tɨkeɨ reta Egipto pe, ɨvɨ ikavi yae vae pe, Ramesés pe, Faraón jei rami.

¹² Jare José omongaru tu jare tɨkeɨ reta, opaete jo pegua reta ndive, imichia reta güɨnoi rupi.

José omaemee

¹³ Mbaetɨ etei tembíu opaete ɨvɨ rupi, jare yɨmbɨaɨ jasɨ yae oï ɨvɨ Egipto pe jare ɨvɨ Canaán pe.

¹⁴ Jare José omboatɨ opaetei korepoti ɨvɨ Egipto pegua jare Canaán pegua tembíu yogüeru ogua chugüi vae re; jare José oñovatu korepoti Faraón jo pe.

¹⁵ Opa ma korepoti Egipto pe jare Canaán pe ave yave, Egipto pegua reta yogüeru jei José pe: —Emee tembíu oreve; mbaetɨ jupi romano vaerä nderóvai opa ma korepoti oregüi güiño.

¹⁶ José jei: —Korepoti opa ko pegüi yave, peru perɨmba reta jare che tamee peve tembíu mɨmba regua.

¹⁷ Jayave güeru reta José pe mɨmba, jare José omee chupe reta tembíu: Kavayu regua, vecha regua, guaka regua, jare mburika regua, jökorai jókuae año omee chupe reta tembíu opaete jɨmba reta regua.

¹⁸ Oasa jókuae año jare omboɨpɨ mokoía año yave, yogüeru reta ye jei José pe: —Mbaetɨ roikuaku ndegüi korepoti añetete opa ko oregüi vae, jare orerɨmba reta ndembae ma ko; mbaetɨ ye mbae opɨta, jaeño orerete jare oreɨvɨ.

¹⁹ ¿Maera pa romanota nderóvai oreɨvɨ ndive? Oregua jare egua oreɨvɨ tembíu regua, toroiko oreɨvɨ ndive Faraón jembiokuairä; jare emee oreve temitɨ romaetɨ vaerä, ɨvɨ agüɨye vaerä okañɨtei jare roikove vaerä.

²⁰ Jayave José ogua opaete ɨvɨ Egipto pegua Faraón imbaerä echa Egiptoɨgua reta omee iɨvɨ yɨmbɨaɨ jasɨ yae vae jeko pegua. Jökorai ɨvɨ ou opɨta Faraón imbaerä.

²¹ Jare Egiptoɨgua reta opa opɨta tembiokuairä tëta guasu rupi, opaete ɨvɨ Egipto rupi.

²² Jaeño ete sacerdote reta iɨvɨ mbaetɨ ogua, echa Faraón omee sacerdote reta jembiurä; jare okaru yogüɨreko Faraón omee chupe reta vae güi. Jáeramo mbaetɨ omee reta iɨvɨ.

²³ Jare José jei opaete vae pe: —Mase, ko opa ma pogua peɨvɨ ndive Faraón imbaerä, añave ko oï temitɨ jäɨ peñotɨ vaerä.

²⁴ Mbaagüɨye reta ñavo güi pemeeta Faraón pe pandepo vae güi metei, jare irundɨ vae pembaerä, peñotɨ ye vaerä jare peiko jese vaerä, pero pegua reta ndive, okaru vaerä pemichia reta.

²⁵ Jae reta jei chupe: —Remee ma roikove vaerä, jare ndepɨakavi oreve. ¡Toroiko Faraón jembiokuairä!

²⁶ Jayave José oñono kuae mborookuai opaete ɨvɨ Egipto re, pandepo vae güi metei Faraón peguarä mbaagüɨye reta ñavo güi; jaeño ete sacerdote reta mbaetɨta omee, echa jae reta iɨvɨ mbaetɨ ko opɨta Faraón imbaerä.

Jacob oiporu oyeapo chupe vaerä

²⁷ Jökorai Israel ou oiko Egipto pe, ɨvɨ Gosén pe; jare güɨnoi imbaembae pɨpe jare okuakuaa jare oñemuña reta jeta yeyé.

²⁸ Jare Jacob oiko Egipto pe diecisiete año; jare opaete reve Jacob oikove ciento cuarenta y siete año.

²⁹ Jare oväe ara Israel omano vaerä yave, oenɨi taɨ José, jare jei chupe: —Añetete ndepɨakatu ko chekotɨ yave, romoñera reñono vaerä ndepo cheu päu pe, jare eyapo che ndive mboroparareko jare jupi vae. ¡Romoñera agüɨye vaerä cheñotɨ Egipto pe!

³⁰ Amano ma yave ayea vaerä cheñemuñagüe reta ndive, chereraja kuae Egipto güi jare cheñotɨ jae reta ndive. Jare José jei chupe: —Ayapota nde rere rami.

³¹ Israel jei ye: —¡Ere Tumpa rovake reyapota ko vae! Jare José jei Tumpa rovake oyapo vaerä. Jayave Israel itindɨ jupa iñäkandɨta re.