GÉNESIS 46 - Biblia Guarani Tumpa Iñee

Jacob jare taɨ reta Egipto pe

¹ Israel oë ojo opaete imbaembae ndive. Ou yave oväe Beerseba pe, omee mɨmba oyeyukagüe tu Isaac iTumpa pe.

² Jare jókuae pɨ̈tu oyekuaa Tumpa jare imiari Israel pe ipaɨu rupi jare jei chupe: —Jacob, Jacob. Jare jae jei: —Ko aï.

³ Jayave Tumpa jei: —Che ko jae Tumpa, nderu iTumpa; agüɨye ekɨɨye reo vaerä Egipto pe, echa joko pe che ayapota ndegüi tëta tuichagüe.

⁴ Che ajata nde ndive Egipto pe, jare che vi anoe yeta joko güi neñemuña reta. José oïta nde ndive remano yave.

⁵ Jacob opüa; jare taɨ reta omboyeupi tu Jacob käretou Faraón ombou chupe vae pe, jare ojo Beerseba güi opaete imichia reta jare ikuña reta ndive.

⁶ Güɨraja reta jɨmba Canaán pe omoñemuñagüe jare opaete imbaembae, jare yogüɨraja Egipto pe.

⁷ Opaete taɨ reta, tayɨ reta jɨmɨmino reta yogüɨraja jae ndive Egipto pe.

⁸ Kuae jae Israel taɨ reta jee, Egipto pe yogüɨraja vae. Israel jae ko Jacob. Jacob jare taɨ reta. Jacob taɨrɨpɨ ko Rubén.

⁹ Rubén taɨ reta jae ko: Hanoc, Falú, Hezrón jare Carmi.

¹⁰ Simeón taɨ reta jae ko: Jemuel, Jamín, Ohad, Jaquín, Zohar jare Saúl. Ërei Saúl jae ko metei kuña Canaán pegua imembɨ.

¹¹ Leví taɨ reta jae ko: Gersón, Coat jare Merari.

¹² Judá taɨ reta jae ko: Er, Onán, Sela, Fares jare Zara. Ërei Er jare Onán omano Canaán pe. Fares taɨ reta jae ko: Hezrón jare Hamul.

¹³ Isacar taɨ reta jae ko: Tola, Fúa, Job jare Simrón.

¹⁴ Zabulón taɨ reta jae ko: Sered, Elón jare Jahleel.

¹⁵ Jae ko kuae reta Lea imembɨ Jacob pe Padan-aram pe yogüɨreko yave vae, jare tayɨ Dina. Opaete reve iñemuña reta jae ko treinta y tres kuimbae jare kuña.

¹⁶ Gat taɨ reta jae ko: Zifión, Hagui, Ezbón, Suni, Eri, Arodi jare Areli.

¹⁷ Aser taɨ reta jae ko: Imna, Isúa, Isúi, Bería jare jae reta jeindɨ jee Sera. Bería taɨ reta jae ko: Heber jare Malquiel.

¹⁸ Kuae reta ko jae Zilpa imembɨ Jacob pe vae. Labán omee tayɨ Lea pe jembiokuairä vae; opaete reve diecisei ko iñemuña.

¹⁹ Raquel, Jacob jembireko imembɨ jae ko: José jare Benjamín.

²⁰ Jare Asenat imembɨ José pe ɨvɨ Egipto pe vae jae ko: Manasés jare Efraín. Asenat jae ko Potifera sacerdote On pegua tayɨ.

²¹ Benjamín taɨ reta jae ko: Bela, Bequer, Asbel, Gera, Naamán, Ehi, Ros, Mupim, Hupim jare Ard.

²² Kuae reta ko jae Raquel jare Jacob iñemuña reta, opaete reve catorce.

²³ Dan taɨ jae ko: Husim.

²⁴ Neftalí taɨ reta jae ko: Jahzeel, Guni, Jezer jare Silem.

²⁵ Kuae reta ko jae Bilha imembɨ Jacob pe vae. Labán omee tayɨ Raquel pe jembiokuairä vae; opaete reve chiu ko iñemuña.

²⁶ Opaete reve Jacob ndive yogüeru Egipto pe vae, chugüi oñemuña vae reta jae ko sesenta y seis, oyepapambae reve taɨ reta jembireko.

²⁷ José taɨ reta Egipto pe oa vae, mókoi. Opaete Jacob iñemuña reta yogüeru Egipto pe vae, setenta.

²⁸ Jacob omondo tenonde Judá José pɨri; ou vaerä omae jese Gosén pe; jare yogüeru reta oväe Gosén pe.

²⁹ Jare José opa ma omboyupavo ikäretou yave ojo oövaiti vaerä tu Israel ɨvɨ Gosén pe. Ojo jare oiküava tu iyayu rupi, jare ɨma oñoäpiro.

³⁰ Jayave Israel jei José pe: —¡Tamano añave! Echa aecha ma nderova jare reikoveño yepe.

³¹ José jei tɨkeɨ jare jëtara reta pe: —Ayerova yeta aja Faraón pɨri. Jaeta chupe cherɨkeɨ reta cheru jo pegua reta Canaán pegua, yogüeru chépɨri vae;

³² jae reta ko vecha iyangarekoa, echa mbaemɨmba iya reta ko; güeru ivecha, iguaka jare opaete güɨnoigüe.

³³ Jare Faraón pereenɨiuka jare jei peve yave: —¿Mbae pa ko jae peparavɨkɨ?

³⁴ Jayave pere chupe: —Ore nderembiokuai reta jare oreñemuñagüe reta mbaemɨmba iya ko oretaɨrusu güive voi. Jökorai pepuere vaerä peiko ɨvɨ Gosén pe, echa Egiptoɨgua reta pe ikaviä ko yogüɨreko päve vaerä vecha iyangarekoa reta ndive.