GÉNESIS 45 - Biblia Guarani Tumpa Iñee

José oyekuaauka tɨkeɨ reta pe

¹ Jare José mbaetɨ ma ipuere oyembopɨaguasu opaete jae ndive ñogüɨnoi vae reta jóvai, jare osapúkai: “¡Pemoë opaete vae cheróvai güi!” Jare mbaetɨ etei jembiokuai reta ñogüɨnoi jae ndive yave, oyekuaauka tɨkeɨ reta pe.

² Täta jäse oyaeo; jare jókuae oyandu Egiptoɨgua reta, jare oyeendu vi mburuvicha guasu Faraón oïa pe.

³ Jare José jei tɨkeɨ reta pe: —Che ko José. ¿Oikove vɨteri pa cheru? Jare tɨkeɨ reta mbaetɨ ipuere iñee omoë, echa ipɨakañɨ yae reta oecha yave tɨvɨ.

⁴ Jayave José jei tɨkeɨ reta pe: —Peeya añave cheré. Jayave jae reta oya katu jese yave, jae jei chupe reta: —Perɨvɨ José ko che, pe reta pemee Egipto kotɨ yogüeru vae reta pe vae;

⁵ jare añave agüɨye peyembopɨatɨtɨ jare agüɨye peyemboeko chemee vae re; echa Tumpa etei ko chembou perenonde aroasayepe vaerä tekove reta.

⁶ Echa mókoi año rupi ma oï karuai opaete ɨvɨ pe, jare oataño vɨteri pandepo año oime vaerä karuai, mbaetɨta maetɨ jare mbaarɨvo.

⁷ Tumpa ko chembou perenonde, peñemuña reta oikove vaerä ɨvɨ iárambo, jare pogüɨroasa vaerä mɨakañɨ tuicha vae rupi.

⁸ Jayave mbaetɨ ko pe reta chembou kuae kotɨ, Tumpa etei ko chembou jare cheñono Faraón imborɨarä, jo pegua reta iyarä, jare opaete kuae ɨvɨ Egipto juvicharä.

⁹ Añave pekua jarembae pegua, pekua cheru oïa pe jare pere chupe: “Körai jei nderaɨ José: Tumpa cheñono opaete Egipto iyarä; eyu chekotɨ jarembae, agüɨye epɨta joko pe.

¹⁰ Reikota ɨvɨ Gosén jee vae pe, jökorai reikota köiño chegüi nde jare nderaɨ reta, jare nerɨmɨmino reta, jare opaete nderɨmba reta jare ïru ndembaembae.

¹¹ Jare joko pe ameeta nderembiurä, echa oime vɨteri pandepo año rupi karuaita vae, agüɨye vaerä pemano mbaravete jeko pegua, nde jare ndero pegua reta jare opaete mbaembae renoi vae.”

¹² Mase, peresa chereecha oï, jare cherɨvɨ Benjamín vi chereecha che ko chemiari aï peve vae.

¹³ Peikuaauka cheru pe opaete mbaemboete kuae ɨvɨ Egipto pe anoi vae, jare opaete peechagüe. ¡Pekua peru jarembaeño cheru kuae kotɨ!

¹⁴ José oiküava tɨvɨ Benjamín iyayu rupi, jare oyaeo. Benjamín oyaeo vi oiküava reve tɨkeɨ.

¹⁵ Oovapɨte vi opaete tɨkeɨ reta oyaeo reve. Jayave ramo tɨkeɨ reta imiari jae ndive.

¹⁶ Jare jërakua Faraón jo pe, José tɨkeɨ reta yogüeru oväe vae regua. Faraón oyerovia yae jare iyɨvɨrigua reta.

¹⁷ Jare Faraón jei José pe: —Ere nderɨkeɨ reta pe tombovoɨta jɨmba reta jare toyerova reta ye Canaán kotɨ,

¹⁸ jare togüeru reta peru jare opaete jëtara reta chépɨri, echa che ameeta chupe reta Egipto pegua ɨvɨ ikavigüe, jare okaru retata mbaagüɨye kuae ɨvɨ pe oñemee vae güi.

¹⁹ Jare nde eyókuai kuae Egipto güi togüɨraja reta käretou güeru reta vaerä pɨpe ikuña reta jare imichia reta, jare peru.

²⁰ Agüɨye toaɨu toeya mbaembae güɨnoi vae, echa Egipto pegua mbaembae imbae ko.

²¹ Jare Israel taɨ reta oyapo jökorai. José omee chupe reta käretou Faraón oyókuai rami, jare omee chupe reta tembíu tape rupi jou reta vaerä.

²² Omee vi chupe reta temimonde, ërei Benjamín pe omee tresciento reare korepoti pegua jare pandepo temimonde oyemonde vaerä.

²³ Jare tu pe omondo payandepo mburika kuimbae ivoɨta ndive, mbae ikavi yae Egipto pe vae ndive, jare payandepo vi mburika kuña trigo voɨta ndive jare tembíu, tu jou vaerä tape rupi.

²⁴ Omboyupavo jare omondo tɨkeɨ reta, jare jei chupe reta: —Agüɨye pekua peñoraro tape rupi. Jare jae reta yogüɨraja.

²⁵ Yogüɨraja Egipto güi, jare opa yogüɨraja oväe Canaán pe, tu Jacob pɨri.

²⁶ Omombeu reta tu pe José oikoveño vae, jare jae ko mburuvicharä oï opaete ɨvɨ Egipto pe vae. Jare Jacob ipɨa kërai oyapo, echa mbaetɨ güɨrovia jei reta chupe vae.

²⁷ Jare jae reta omombeu opaete José jeigüe jare Jacob oecha José ombou käretou chupe güɨraja vaerä vae yave, ipɨa yerovia ye.

²⁸ Jayave Jacob jei: “¡Aikuaa ma cheraɨ José oikoveño vae! Taja taecha ndei amano mbove.”