GÉNESIS 43 - Biblia Guarani Tumpa Iñee

José tɨkeɨ reta güeru Benjamín

¹ Karuai jeiete yae ikaviä jókuae ɨvɨ pe.

² Opa jou reta trigo Egipto güi güerugüe yave, tu jei chupe reta: —Pekua ye pegua yandeve mbovɨ yepe tembíu.

³ Jayave Judá jei tu pe: —Jókuae kuimbae jei kavi yae ko oreve: “Mbaetɨ yave peru perɨvɨ pe ndive, agüɨye ye peyu cheróvai.”

⁴ Remondota orerɨvɨ orerupíe yave, torojo jare torogua tembíu ndeve;

⁵ ërei mbaetɨ yave remondo orerupíe, mbaetɨta rojo, echa jókuae kuimbae jei ko oreve: “Mbaetɨ peru perɨvɨ pe ndive yave agüɨye ye peyu cheróvai.”

⁶ Jayave Israel jei: —¿Maera pa ko peyapo ikavimbae yae vae cheve? ¿Pemombeu pa jókuae kuimbae pe oime ye ko ïru perɨvɨ vae?

⁷ Jae reta jei: —Jókuae kuimbae oparandu kavi yae ko oreve opaete orero pegua reta re, jei reve: “¿Oikove vɨteri pa peru? ¿Oime pa ïru perɨvɨ?” Jare ore oremiari chupe oparandu oreve vae rami; jare ore, ¿këraita pa roikuaa: “Peru perɨvɨ” jeita ko oreve vae?

⁸ Jayave Judá jei tu Israel pe: —Emondo kunumi cherupíe, jare torojo, agüɨye vaerä romano jare nde vi jare oremichia reta vi.

⁹ Che tayangareko jese, cheve eeka jesegua; mbaetɨ aru ye ndeve yave, che chemboeko jese jekuae avei pegua.

¹⁰ Echa rojo ye voi yave mona, ¡mókoi ye ma ko royu yeta tëi!

¹¹ Jayave tu Israel jei taɨ reta pe: —Körai ko añete, jayave peyapo jökorai: Peñoña pevoɨtarɨru pe opaete mbaembae ikavigüe kuae yandeɨvɨ pe oñemuña vae, peraja jókuae kuimbae pe mbota; peraja mbovɨ ɨvɨra iyaɨsɨgüe Bálsamo jee vae, ei jare mbae ikäti kavi vae, mirra jare nuez jäɨ jare almendra jäɨgüe.

¹² Jare peraja mókoi jɨru korepoti: Metei jɨru pembaegua vaerä jare ïru jókuae korepoti ou ye pevoɨtarɨru iyuru pe vae; güɨramoi oyavɨ ramo jökorai.

¹³ ¡Pepüa jare peyupavo! Pekua jókuae kuimbae oïa kotɨ; jare peraja vi perɨvɨ.

¹⁴ Jare Tumpa imbaepuere yae ete vae tomee mboroparareko jókuae kuimbae pe pekotɨ, jare toyora ye jókuae perɨkeɨ ïru jare kuae Benjamín pe tipɨakavi. Jare mbaetɨta ma cheraɨ reta oyembou ye chekotɨ yave, ¡jökorai toiko!

¹⁵ Jayave jókuae kuimbae reta güɨraja mbota, jare mókoi jɨru korepoti, jare güɨraja reta vi tɨvɨ Benjamín; jökorai ogüeyɨ reta yogüɨraja Egipto kotɨ, jare opa yogüɨraja oyemboɨ ye José jóvai,

¹⁶ jare José oecha tɨvɨ jae reta ndive, jare jei imbaembae iyangarekoa pe: —Eraja kuae kuimbae reta chero pe, jare eyuka metei guaka, jare eyapo tembíu, echa kuae kuimbae reta okaruta che ndive kuaraɨ ara mbɨte pe.

¹⁷ Jayave jókuae kuimbae oyapo José jei chupe rami, güɨraja jókuae kuimbae reta José jo pe.

¹⁸ Jayave jókuae kuimbae reta okɨɨye, opa güɨraja reta José jo pe yave, jei reta: —Korepoti yaraja ye yaikuaambae reve yandevoɨtarɨru pe, tenonde yayu yave vae re ndipo yandereru kuae pe; yandembotavɨ ndipo yandereru yandeapo vaerä jembiokuairä, jare yandemburika reta vi.

¹⁹ Jare oya reta José imbaembae iyangarekoa re, jare omomiari reta José jo jöke pe,

²⁰ jei reta chupe: —Oreruvicha, ore reta añetete ko tenonde yave royu rogua tembíu,

²¹ ërei rojo roväe oguatagüe reta opɨtaa pe yave, roipea orevoɨtarɨru yave, ko roväe orevoɨtarɨru ñavo iyuru pe orekorepoti rombaegua pɨpe vae, jare oatambae reve rogüeru ye añave,

²² jaeramiño vi rogüeru ïru korepoti rogua vaerä tembíu jese. Ërei ore mbaetɨ ko roikuaa kia ko oñono ye orekorepoti orevoɨtarɨru pe vae.

²³ Jae jei chupe reta: —Pepɨakatuño, agüɨye pekɨɨye; peTumpa ko jare peru iTumpa ko omee mbaeyekou peve pevoɨtarɨru pe; che etei ko aipɨɨ pekorepoti. Jare güɨnoe Simeón chupe reta;

²⁴ jare jókuae kuimbae güɨraja reta José jo pe; jare ɨ omee chupe reta jare oyoe reta ipɨ, omboɨu vi imburika reta.

²⁵ Jae reta oyapo katu mbota ndei ou mbove José kuaraɨ ara mbɨte pe, echa oendu reta jae ndive ko okaru retata vae.

²⁶ Jare José ou jo pe yave jae reta güeru chupe mbota oäro güɨnoi pɨpe vae, jare itindɨasɨ reta ɨvɨ re jae jóvai.

²⁷ Jayave José oparandu tɨkeɨ reta pe, kërai ra ñogüɨnoi vae, jei körai: —Peru, indechi yae ma vae re pemiari cheve vae, ¿ikaviño pa oï? ¿Oikoveño pa?

²⁸ Jae reta itindɨ omboete reve jei: —Oreru ikaviño oï; oikoveño ko.

²⁹ Jare José omopüa iñäka yave oecha tɨvɨ Benjamín, jae ko ichɨ imembɨ, jare jei: —¿Kuae jae pa perɨvɨ taɨkuegua ete pemiari jese cheve vae? ¡Tumpa tandeparareko cheraɨ!

³⁰ Jayave José mbaetɨ ipɨaguasu oecha ramboeve tɨvɨ, jare oeka kia pe oyaeo vaerä; jökorai oike jo okea pe jare joko pe oyaeo.

³¹ Oyembopɨaguasu jare oyuvae jare oë jei: “¡Peñono mo tembíu!”

³² Jare oñono tee reta chupe tembíu, jare Jacob taɨ reta pe oñono tee reta vi, jökorai vi Egiptoɨgua jae ndive okaru vae reta pe; echa Egiptoɨgua reta mbaetɨ ko okaru hebreo reta ndive, echa mbae pɨ̈chɨi yae ko chupegua reta.

³³ Jare opaete vae reta oguapɨ jóvai, tenondegua güive taɨkuegua kotɨ omoñesɨro kavi omboguapɨ reta; jare kuae kuimbae reta ipɨakañɨ yae päve omae oyoe.

³⁴ Jare José omee jóvai tembíu oï vae chupe reta, ërei Benjamín pe omee jeta, pandepo ye omoïru chupe ïru reta güi; okaru jare jou reta vino jae ndive oyerovia katu reve.