GÉNESIS 42 - Biblia Guarani Tumpa Iñee

José tɨkeɨ reta yogüeru ogua tembíu

¹ Jacob oikuaa yave oime ko tembíu Egipto pe vae, jei taɨ reta pe: “¿Maera pa pemaeiño peï oyoe?

² Aendu Egipto pe oimeño tembíu, jayave pekua jokotɨ jare pegua yandeve tembíu, yandepuere vaerä yaiko jese, agüɨye vaerä ñamano.”

³ Jayave yogüɨraja payandepo reve José tɨkeɨ reta ogua vaerä trigo Egipto pe;

⁴ ërei Jacob mbaetɨ omondo Benjamín, José tɨvɨ tɨkeɨ reta jupíe; echa jei: “Güɨramoi maratu oásane.”

⁵ Yogüeru Israel taɨ reta ombaegua, ïru ombaegua vae reta ndive; echa karuai yae opaete ɨvɨ Canaán pe.

⁶ Jare José ko jae mburuvicha jókuae ɨvɨ pe, jae omaemee opaete tëta ɨvɨ pegua pe; jayave opa yogüeru oväe tɨkeɨ reta José oïa pe, jare itindɨasɨ reta ɨvɨ re jóvai.

⁷ José oecha tɨkeɨ reta rupive oikuaa; ërei ngatu jae oikuaambae rami oyeapo, jare omomiari iyarasɨ reve, jei chupe reta: —¿Ketɨ güi pa peyu? Jare jae reta jei: —Ɨvɨ Canaán kotɨ güi ko royu rogua vaerä tembíu.

⁸ José oikuaa tɨkeɨ reta, ërei ngatu jae reta mbaetɨ oikuaa.

⁹ Jayave José imaendúa ipaɨu re, tɨkeɨ reta regua, jare jei chupe reta: —Oporopïaro vae ko pe reta; peyu ko pemae, peikuaa kavi vaerä jëgua ra kuae ɨvɨ vae.

¹⁰ Jae reta jei: —¡Mbaetɨ ko jökorai oreruvicha! Ore nderembiokuai reta royu ko rogua tembíu.

¹¹ Opaete ore metei tu vaeño ko; jare ore kuimbae jeko kavi vae reta ko; ore nderembiokuai reta mbaetɨi ko metei tëta re roporopïaro.

¹² Ërei José jei chupe reta: —Mbaetɨ, peyu ko pemae, peikuaa kavi vaerä jëgua ra kuae ɨvɨ vae.

¹³ Jae reta jei: —Ore nderembiokuai reta doce metei tu vaeño ko, metei kuimbae Canaán pegua taɨ reta; orerɨvɨ taɨkuegua opɨtaño oreru ndive, jare ïru mbaetɨve ma oiko.

¹⁴ José jei chupe reta: —¡Che jae vae rami etei ko pe reta, oporopïaro vae ko pe reta!

¹⁵ Kuae rupi yaikuaata; Faraón jee re tae peve: ¡Ngaraai peë kuae güi, ou regua kuae pe perɨvɨ!

¹⁶ Pemondo metei pepɨte güi togüeru perɨvɨ, jare pe reta pepɨta tembipɨɨrä, jare peñee reta oñejäata, añetete ra pere vae; mbaetɨ yave, oporopïaro vae ko pe reta. ¡Kuae jae peve Faraón jee re!

¹⁷ Jayave oñono reta tembipɨɨrɨru pe mboapɨ ara pegua.

¹⁸ Jare mboapɨa ara pe José jei chupe reta: —Tumpa güi oipoɨu vae ko che; peyapo kuae, jayave ngaraa pemano.

¹⁹ Kuimbae jeko kavi vae ko pe reta yave, metei topɨta pepɨte güi, kuae pe tembipɨɨrɨru oï vae pe; jare pe reta pekua peraja tembíu pero pe okaruai ñogüɨnoi vae reta pe.

²⁰ Jare peru perɨvɨ taɨkuegua, jayave yaikuaata añetete ra pemiari vae, agüɨye vaerä pemano. Jare jökorai oyapo reta.

²¹ Jayave jei reta oyoupe: —Añetete yepe yandeyoa yanderɨvɨ José kotɨ, echa yaecha ko ipɨatɨtɨ reve ñanemoñera tëi, ërei yande mbaetɨ yaendu chupe; jáeramo ou yanderé kuae mbɨatɨtɨ.

²² Jayave Rubén jei ye chupe reta: —¿Amoëä pa cheñee peve, agüɨye peyoa kunumi kotɨ, jaeä pa peve? Ërei mbaetɨ peendu. Mase, añave jugüɨgüe ko oyeapa yandekotɨ.

²³ Ërei jae reta mbaetɨ oikuaa José oikuaa ko iyemongeta chugüi reta vae, echa ñee oipoepɨ vae rupi imiari jae reta ndive.

²⁴ Jare José osɨrɨ chugüi reta, jare oyaeo; jaɨkue rupi ou ye tɨkeɨ reta ñogüɨnoia pe jare omomiari; jare jae reta ipɨte güi oipɨɨ Simeón jee vae jare oñono tembipɨɨrɨru pe jae reta jovakei.

²⁵ Jaɨkue rupi José oporookuai omotɨnɨe vaerä chupe reta ivoɨtarɨru reta trigo pe, jare ikorepoti reta oñono ye vaerä ivoɨtarɨru ñavo pe chupe reta, jare omee tembíu tape rupi jou reta vaerä. Jökorai oyapo reta.

²⁶ Jare jae reta ombovoɨta imburika reta trigo pe jare yogüɨraja joko güi.

²⁷ Ërei ngatu oguatagüe reta opɨtaa pe ñogüɨnoi yave, metei chugüi reta oipea ivoɨtarɨru omongaru vaerä imburika yave, oecha ikorepoti voɨtarɨru iyuru pe.

²⁸ Jei tɨkeɨ reta pe: —¡Chekorepoti omee ye cheve! ¡Mase, ko oï chevoɨtarɨru pe! Jayave ipɨakɨɨye reta jare jei reta oyoupe: —¿Mbae pa ko kuae Tumpa oyapo yande ndive vae?

²⁹ Yogüeru reta oväe ɨvɨ Canaán pe tu Jacob oïa pe yave, omombeu reta chupe opaete maratu oasagüe, jei reta reve:

³⁰ —Jókuae kuimbae ɨvɨ iya oremomiari iyarasɨ reve, tëta re oporopïaro vae reta rami omae oreré.

³¹ Jare ore roe chupe: “Ore ko jae kuimbae jeko kavi vae reta, mbaetɨi ko roipïaro tëta.

³² Doce tëi ko ore, metei tu vae ko ore, metei mbaetɨve ma oiko ore ndive, jare taɨkuegua ete oimeño oï oreru ndive ɨvɨ Canaán pe.”

³³ Jayave jókuae kuimbae ɨvɨ iya, jei oreve: “Kuae pe pokuaata, añetete ra kuimbae jeko kavi pe reta vae; peeya metei cheve pepɨte güi, javoi pekua pemboɨru jare peraja tembíu pero peguarä.

³⁴ Jare peru cheve perɨvɨ taɨkuegua, aikuaa vaerä añetete ra ko kuimbae jeko kavi vae pe reta, jare mbaetɨ ko oporopïaro vae pe reta; jökorai amee yeta peve perɨkeɨ, jare pepuere pembaegua peipoɨumbae reve kuae ɨvɨ rupi.”

³⁵ Ërei ngatu oikuavo reta ramboeve ivoɨta; voɨtarɨru ñavo pe oväe chupe reta ikorepoti jɨru reve; jare oecha reta yave, jare tu vi oecha korepoti jɨru reve yave ipɨakɨɨye yae reta.

³⁶ Jayave tu Jacob jei chupe reta: —Opa pemokañɨtei cheraɨ reta peï chegüi; José mbaetɨve ma oiko yande ndive, Simeón jaeramiño vi, ¡jare peraja yeta ma Benjamín chegüi! ¡Opaete kuaekuae ikavimbae reta chepɨatɨtɨrä ko!

³⁷ Jare Rubén omomiari tu, jei reve: —Emee cherɨvɨ Benjamín chepo pe, jare che aru yeta ndeve; jare mbaetɨ yave, eyuka mókoi reve cheraɨ reta.

³⁸ Jae jei: —Ngaraa cheraɨ ojo pe ndive, echa tɨkeɨ omano ma, jaeño ma ko opɨta; maratu oasa tape rupi pegüi yave, pe reta cheyukaukata mbɨatɨtɨ pe.