GÉNESIS 40 - Biblia Guarani Tumpa Iñee

José oikuaauka mókoi mbaɨu reta

¹ Opa ma kuaekuae reta oasa güire, mburuvicha guasu oëɨ vino pe vae jare mbɨyape iyapoa, ombaeyavɨ reta mburuvicha guasu Egipto pegua kotɨ.

² Jare Faraón iyarasɨ kuae mókoi tembiokuai ruvicha reta kotɨ; oporoëɨ vae reta itenondegua kotɨ jare mbɨyape iyapoa reta itenondegua kotɨ,

³ jare oñono tembipɨɨrɨru pe, mburuvicha guasu isundaro reta juvicha jëta pe oï vae pe, José oïa pe.

⁴ Jare jókuae sundaro ruvicha oyókuai José oyangareko vaerä jókuae mókoi tembipɨɨ reta re, jare jae oyangareko jese reta; jare yogüɨreko reta mbovɨ ara rupi tembipɨɨrɨru pe.

⁵ Jare mburuvicha guasu oëɨ vae jare mbɨyape iyapoa tembipɨɨrä ñogüɨnoi vae. Metei pɨ̈tu opaɨu reta mókoi reve, jare kuae ipaɨu ñavo oime mbae oipota jei vae.

⁶ Jare José ou ndeimbove omae jese reta yave, oecha ipɨatɨtɨ yae ñogüɨnoi;

⁷ jare jae oparandu kuae Faraón jembiokuai ruvicha reta ñogüɨnoi jae ndive tembipɨɨrɨru pe vae pe: —¿Maera pa añave perova ambuaeyee yae peï?

⁸ Jayave jae reta jei chupe: —Ropaɨu, jare mbaetɨ kia oikuaauka oreve mbae ra oipota jei vae. Jayave José jei chupe reta: —Tumpaño ko oikuaaukata mbae ko oipota jei vae. Añave pemombeu cheve.

⁹ Jayave oporoëɨ vae reta itenondegua imiari ipaɨu re José pe, körai: —Chepaɨu pe aecha temitɨ uva oï cheróvai,

¹⁰ jare temitɨ re oï mboapɨ jäka; jare jeñɨi rami, jare ipotɨ, jare ou yagüɨye iagüe.

¹¹ Jare chepo pe oï Faraón ikopa, jare aipɨɨ uva iagüe jare aitɨami Faraón ikopa pe, jare che amee kopa Faraón ipo pe.

¹² Jayave José jei chupe: —Kuae ko jae ndepaɨu oipota jei vae: Jókuae mboapɨ uva jäka reta mboapɨ ara ko,

¹³ mboapɨ araa pe Faraón iñɨ̈rota ndeve jare neñono yeta ndeparavɨkɨa pe; jökorai remee yeta kopa Faraón ipo pe, oporoëɨ vaerä reiko yave reyapose rami.

¹⁴ Nemaendúa cheré kuri reï kavi ye ma yave, romoñera ndeporoparareko vaerä cheré kuri jare nemiari cheré Faraón pe, cherenoe kuae tembipɨɨrɨru güi.

¹⁵ Echa cheñomi ko hebreo reta iɨvɨ güi; jare mbaetɨ tëi mbae ayapo aï vaerä kuae tembipɨɨrɨru pe.

¹⁶ Oecha yave mbɨyape iyapoa reta itenondegua, kërai José imiari mbae ikavi vae re jókuae ïru pe yave, jei chupe: —Che apaɨu vi, cheke pe aecha mboapɨ kanata raɨ tïiasɨ vae cheäka re.

¹⁷ Jare kanata raɨ iárambo ete oï vae pe, oï opaño oyea yea mbɨyape jëe ngatugüe Faraón peguarä; ërei güɨra reta jou kanata raɨ güi cheäka regua güi.

¹⁸ Jayave José omoë iñee jare jei chupe: —Jókuae mboapɨ kanata raɨ repaɨu jese vae, mboapɨ ara ko,

¹⁹ mboapɨ araa pe Faraón ndeyuvɨukata ɨvɨra re, jare chucha reta opata ndereu.

²⁰ Mboapɨa ara pe Faraón iara oväe, año oupitɨ ye vae, jare mburuvicha guasu oyapo arete opaete jembiokuai reta pe; jare omondo güɨnoeuka tembipɨɨrɨru güi oporoëɨ vae reta itenondegua jare mbɨyape iyapoa reta itenondegua, opaete vae jembiokuai reta jóvai.

²¹ Jare oporoëɨ vae reta itenondegua omondo ye iparavɨkɨa pe; jökorai kuae omee ye Faraón ipo pe kopa;

²² ërei mbɨyape iyapoa reta itenondegua oyuvɨuka, José omombeu chupe rami.

²³ Jare oporoëɨ vae reta itenondegua mbaetɨ imaendúa José re, ñakañɨ chugüi.