GÉNESIS 4 - Biblia Guarani Tumpa Iñee

Caín jare Abel

¹ Adán jembireko Eva ipurúa, jare imembɨ Caín oa, jare jei: “YandeYa jemimbota rupi ko chemembɨ kuimbae.”

² Jaɨkue rupi imembɨ ye Eva, jae kó Abel. Abel kó jae vecha omoñemuña vae, jare Caín ko jae kó rupi oparavɨkɨ vae.

³ Jökorai opa ma okuakuaa reta yave, metei ara Caín güeru jemitɨ iagüe omee vaerä mbota yandeYa pe.

⁴ Jare Abel güeru vi ivecha reta imembɨrɨpɨ ikɨra kavi vae. Jare yandeYa ipɨakatu omae Abel re jare mbota güeru vae re.

⁵ Ërei yandeYa mbaetɨ ipɨakatu omae Caín re jare mbota güeru vae re. Jare Caín iyarasɨ yae ete, oyekuaa jova ambuaeyee.

⁶ Jayave yandeYa jei Caín pe: “¿Maera pa ndearasɨ? ¿Maera pa nderova ambuae aveiño?

⁷ Reyapo yave viña ikavi vaeño, ngaraa tëi ko jökorai reï. Ërei mbaetɨ yave reyapo ikavi vaeño, eyeandu, mbaeyoa okätɨro oï nderé öke pe ndepɨɨ vaerä. Ërei nde ndepuere ko remoamɨri.”

⁸ Metei ara Caín jei tɨvɨ Abel pe: —Yaja yaguata kaa kotɨ. Mombɨrɨ ma ñogüɨnoi yave, Caín opüa tɨvɨ Abel re jare oyuka.

⁹ Jare yandeYa oparandu Caín pe: —¿Jama pa nderɨvɨ Abel? Caín jei: —Mbaetɨ aikuaa. ¿Cherɨvɨ iyangarekoa pa che?

¹⁰ Tumpa jei chupe: —¿Maera pa kuae reyapo? Nderɨvɨ jugüɨgüe ndemboeko oï cheve kuae ɨvɨ güive.

¹¹ Jáeramo, añave reikoasɨ katuta cheyepopeyu igüɨ pe jare reëta ko kuae ɨvɨ güi, echa ndepo güi kuae ɨvɨ re oyepɨyere nderɨvɨ jugüɨ.

¹² Reparavɨkɨ yae tëi reve ngaraa neremitɨ oñemuña kavi ndeve. Reguata reteiñota jare reiporara reve reikota ɨvɨ ambuae rupi.

¹³ Jayave Caín ipɨatɨtɨ tuicha, jare jei yandeYa pe: —Mbaetɨta chepuere aropɨa kuae tembiporara rere cheve vae.

¹⁴ Echa añave chemombo ma reï kuae ɨvɨ güi; mbaetɨta ma chepuere ayu nderóvai. Mombɨrɨ rupi aguata reteiñota, aiporara reve ɨvɨ ambuae rupi. Jökorai kia nunga vae cheväe yave cheyukata ko.

¹⁵ YandeYa jei chupe: —Kia nunga vae ndeyuka yave, jae oiporara yae eteta ko. Jayave yandeYa omokañɨmaa Caín, jökorai agüɨye vaerä kia nunga vae oväe yave oyuka.

¹⁶ Caín ojo yandeYa ndive imiari oikoa güi, oë jókuae ɨvɨ güi; ojo oiko vaerä ɨvɨ Nod jee vae kotɨ. Jókuae ɨvɨ oï Edén güi kuaraɨ oëa kotɨ.

Caín iñemuña reta

¹⁷ Caín jembireko ipurúa jare oa michia raɨ Enoc; jare omopüa tëta guasu jare ombojee taɨ, Enoc jee pe.

¹⁸ Enoc pe oa taɨ Irad, Irad taɨ Mehujael, jare Mehujael taɨ Metusael, Metusael taɨ Lamec.

¹⁹ Lamec jembireko mókoi, metei jee Ada, ïru jee Zila.

²⁰ Jare Ada imembɨ Jabal oa, jae ko o guakapi pegua rupi yogüɨreko vae reta iñemuñagüe, mɨmba omoñemuña vae reta.

²¹ Tɨvɨ jee Jubal, jae ko ombaembopu jare oyemimbɨ vae reta iñemuñagüe.

²² Jare Zila imembɨ oa vi Tubal-caín, jae ko ipoki oparavɨkɨ jiero pe jare jiero iyu vae pe vae; jare Tubal-caín jeindɨ jae ko Naama.

²³ Lamec jei jembireko Ada jare Zila pe: “Peyeapɨsaka cheñee re: Metei kuimbae ayuka chembopere ramo, jare metei kunumi chenupa ramo.

²⁴ Caín iyukaa re chiu ye oyepɨta yave, Lamec iyukaa re setenta vese chiu ko oyepɨta.”

Adán jare Eva imichia mboapɨa

²⁵ Adán jembireko imembɨ ye, jare ombojee Set, echa jei: “Tumpa omboekovia chemembɨ Abel cheve, Caín oyuka vae.”

²⁶ Jare Set pe oa vi taɨ, ombojee Enós. Jayave güive kuimbae reta omboɨpɨ oyerure yandeYa Tumpa jee re.