GÉNESIS 39 - Biblia Guarani Tumpa Iñee

José jare Potifar jembireko

¹ Jare güɨraja reta ma güɨroväe José Egipto pe yave, Potifar ogua Ismael iñemuña reta güi; Potifar jae ko mburuvicha guasu Faraón Egipto pegua isundaro reta juvicha.

² Ërei yandeYa oï José ndive, jare José ko jae kuimbae opaete jembiapo reta oë kavi chupe vae; jare oiko iya Egiptoɨgua jo pe.

³ Jare iya oecha kërai yandeYa etei oï José ndive vae, jare oecha vi kërai opaete jembiapo reta rupi yandeYa omborɨ vae.

⁴ Jökorai iya oyerovia katu omae José re, jare oyeokuai avei chupe. Jare jae oñono jo pe opaete imbaembae iyangarekoarä, omee chupe mbaepuere opaete imbaembae re.

⁵ Jare kuae Egiptoɨgua omee güire José ipo pe opaete imbaembae, ou yandeYa iporerekua José rupi kuae Egiptoɨgua jo re; yandeYa etei oyangareko imbaembae jo pegua re, jɨmba reta jare iko reta re.

⁶ Oeya opaete mbaembae güɨnoi vae José ipo pe, jökorai mbaetɨ oyemoambeko mbaembae re, jaeño ma tembíu jou vae re. Jare José ko kunumi kavi,

⁷ jare metei ara iya jembireko iporopota José re, jare jei chupe: —Eyu eyapakua che ndive.

⁸ Jare jae mbaetɨ oipota, jare jei iya jembireko pe: —Mase, cheya mbaetɨ ko oyemoambeko jo pegua reta re, jare oeya ko chepo pe opaete imbaembae.

⁹ Mbaetɨ ye kia tenondegua chegüi kuae o pe, jare cheya mbaetɨ mbae oyopia chegüi; jaeño ma nde, echa nde ko jae jembireko. ¿Këraita pa che ayapo kuae mbae ikavimbae yae vae, jare cheyoa Tumpa kotɨ?

¹⁰ Ara ñavo jae omoñera José, ërei José mbaetɨ oyeapɨsaka jese ou vaerä oyapakua ipoe, oï vaerä jae ndive.

¹¹ Jökorai metei ara oike o pe oyapo vaerä iparavɨkɨ, jare mbaetɨ ñogüɨnoi joko pe jókuae o pegua reta yave,

¹² jae oipɨɨ José jemimonde pe jare jei chupe: —Eke che ndive. Jayave jae oeya jemimonde ipo pe, jare oë osɨi.

¹³ Jare jae oecha ma oeya ko jemimonde ipo pe, jare otekuarai ikatu kotɨ yave,

¹⁴ oenɨi jo pegua reta jare jei chupe reta: —Mase, cheme güeru yandeve kuae hebreo, oyuvanga katu yanderé vaerä. Ou cheve, oyapakua vaerä chepoe, ërei che täta cheräse;

¹⁵ jare oecha ma täta cheräse yave, oeya jemimonde cheɨpɨ pe jare oë osɨi.

¹⁶ Jayave jae oñovatu José jemimondegüe, ime ou regua oike jo pe.

¹⁷ Jayave imiari chupe tenonde jei rami etei: —Tembiokuai hebreo reru yandeve vae, ou oipota oyapakua chepoe,

¹⁸ jare che cheräse yave, jae oeya jemimonde cheve, jare oë osɨi ikatu kotɨ.

¹⁹ Jayave José iya oendu yave jembireko imiari chupe vae, echa jei: “Körai cheapo nderembiokuai.” Kuae omboarasɨ yae José iya.

²⁰ Jare oipɨɨ oñono tembipɨɨrɨru pe, mburuvicha guasu jembipɨɨ reta ñogüɨnoia pe; jare jókuae tembipɨɨrɨru pe oiko,

²¹ ërei yandeYa oï José ndive, jare iporerekua jese, omboeko kavi tembipɨɨ reta iyangarekoa jesa róvai.

²² Jare jókuae mburuvicha tembipɨɨrɨru pegua omee José ipo pe, oyangareko vaerä opaete tembipɨɨ reta ñogüɨnoi jókuae o pe jae ndive vae re, jae oyapouka opaete mbaembae joko pe oyeapota vae.

²³ Jökorai jókuae mburuvicha mbaetɨ ma oyemoambeko jókuae tembipɨɨ reta ñogüɨnoi José ipo pe vae re, echa yandeYa oï José ndive, jare opaete jae oyapo vae, yandeYa etei omborɨ jese.