GÉNESIS 33 - Biblia Guarani Tumpa Iñee

Jacob jare Esaú iñɨ̈ro oyoupe

¹ Jacob omopüa iñäka yave oecha ou Esaú, jare yogüeru jupíe cuatrociento kuimbae, jayave jae opa omboyao michia reta, Lea ndive, Raquel jare jókuae mókoi jembiokuai kuña reta ndive.

² Oñono tenonde tembiokuai kuña reta michia reta ndive, jaɨkue Lea jare imembɨ reta, jare Raquel, José ndive taɨkue ete.

³ Jare jae oasa tenonde chugüi reta, oyetavatɨka itindɨasɨ ɨvɨ re chiu ye, ojo regua oväe tɨkeɨ pe.

⁴ Ërei Esaú osɨi oövaiti jare oiküava iyayu rupi oovapɨte, jare oyaeo reta.

⁵ Jaɨkue rupi Esaú omopüa iñäka, omae, oecha kuña reta jare michia reta, yave oparandu: —¿Kia pa kuae reta? Jacob jei chupe: —Jae ko michia reta Tumpa omee che nderembiokuai pe vae.

⁶ Jayave tembiokuai kuña imembɨ reta ndive oya katu jare itindɨasɨ reta.

⁷ Jaɨkue rupi oya katu Lea imembɨ reta ndive, itindɨasɨ reta reve; jaɨkue rupi ou oväe José jare Raquel jaeramiño vi itindɨasɨ reta.

⁸ Jare Esaú oparandu: —¿Mbae pa reyemongeta reyapo opaete kuae mbovɨ äpɨta aövaiti ayu aiko vae rupi? Jacob jei chupe: —Cheya ipɨakavi omae cheré vaerä.

⁹ Esaú jei: —Maera pa cherɨvɨ, jeta ko che anoi mbae. Ndeveguaräño topɨta opaete ndembaembae.

¹⁰ Jacob jei: —Agüɨye jökorai, romoñera ndepɨakavi ko remae cheré yave eipɨɨ mbota ndeveguarä vae, echa aecha nderova Tumpa jova etei aecha rami, echa mboroparareko ndive cherövaiti.

¹¹ Romoñera reipɨɨ vaerä mbota aru ndeve vae, echa Tumpa chemboikokatu jare opaete mbaembae anoi vae chembae ko. Jacob jeta omoñera, Esaú oipɨɨ,

¹² jare jei: —Yaja jayave; che taja nderenonde.

¹³ Jare Jacob jei: —Cheya reecha ko michia reta ndei yae, jare anoi vecha imembɨ oa ramo vae reta; ambokangɨ yae yave opata ko omano metei ara pe.

¹⁴ Ekua tenonde che nderembiokuai güi, jare che mbegüe pe kavi taraja mɨmba reta jare michia reta iguata re, aja regua aväe ndépɨri Seir pe.

¹⁵ Esaú jei: —Ërei, jayave taeya ndeve mbovɨ kuimbae reta yogüeru che ndive vae. Jacob jei: —¡Maera pa cheya! Ndepɨakavi ma ko chekotɨ.

¹⁶ Jökorai Esaú jókuae ara oyerova ye ojo Seir kotɨ.

¹⁷ Jare Jacob ojo Sucot pe, jare joko pe omopüa jorä jare oyapo jɨmba jokairä; jáeramo ombojee Sucot.

¹⁸ Jacob ou ye Padan-aram güi yave, ou kavi oväe tëta Siquem pe, ɨvɨ Canaán pe oï vae. Jare oyembojeyupa tëta Siquem jóvai.

¹⁹ Joko pe ogua ɨvɨ cien reare pe Hamor taɨ reta güi, jae ko Siquem tu, jare joko pe oñono jeyupa.

²⁰ Jaɨkue rupi omopüa mɨmba oyeyuka oyeapɨ jese vae, jare ombojee El-Elohe-Israel.