GÉNESIS 3 - Biblia Guarani Tumpa Iñee

Kuimbae iñeereenduä

¹ Ërei ngatu mboi oasa ipoki oporombotavɨ vaerä opaete ïru mbaemɨmba reta ñana rupigua yandeYa Tumpa oyapogüe güi. Jare kuae mboi jei kuña pe: —¿Tumpa jei pa jayave peve agüɨye vaerä peu opaete ɨvɨra reta kó pegua iagüe?

² Jayave kuña jei mboi pe: —Opaete ɨvɨra reta kó pegua iagüe orepuere rou;

³ ërei jókuae ɨvɨra kó mbɨte pegua iagüe re oreokuai Tumpa, jei oreve: “Agüɨye peu, agüɨye peyavɨkɨ, agüɨye vaerä pemano.”

⁴ Jayave mboi jei kuña pe: —Ngaraa ko pemano.

⁵ Echa Tumpa oikuaa katu ko jókuae ara peu ko yave, oyepeata peresa, jare peikota Tumpa rami, peikuaata ikavi vae jare ikavimbae vae.

⁶ Jare kuña oecha jókuae ɨvɨra iagüe ikavi yae oyeu vaerä, ipöra yae oyekuaa jesa pe, ikavi yae oupitɨ vaerä arakuaa katu; jare oipɨɨ jókuae ɨvɨra iagüe jare jou. Omee vi ime pe, jare jae jou vi jembireko rami.

⁷ Jayave jesa reta oyepea, jare oikuaa reta inandi yepe yogüɨreko vae; jayave ombovɨvɨ reta ɨva joogüe oñeova reta pɨpe vaerä.

⁸ Oendu reta yandeYa Tumpa kó rupi oguata oiko kaaru yave, jare kuimbae oñemi jembireko ndive yandeYa Tumpa güi, ɨvɨra pɨte pe kó pe.

⁹ Ërei yandeYa Tumpa oenɨi kuimbae, jei chupe: —¿Ketɨ pa aipo reï?

¹⁰ Kuimbae jei Tumpa pe: —Aendu neñee kó rupi, jare akɨɨye, echa chenandi aï, jáeramo añemi.

¹¹ Tumpa jei chupe: —¿Kia pa ndemboe nenandi ko reï vae? ¿Reu pa jókuae ɨvɨra iagüe royókuai agüɨyeta tëi reu vae?

¹² Kuimbae jei: —Kuña remee cheïrurä vae omee cheve ɨvɨra iagüe, jare jau.

¹³ Jayave yandeYa Tumpa jei kuña pe: —¿Maera pa ko kuae reyapo? Kuña jei Tumpa pe: —Mboi ko chembotavɨ, jare jau.

¹⁴ Jayave yandeYa Tumpa jei mboi pe: —Kuae reyapo vae jeko pegua, repɨtata cheyepopeyu igüɨ pe opaete ïru mɨmba reta ipɨte güi. Ndepɨtía re reguatata, jare ɨvɨkúi reuta nderekove iyapɨ regua.

¹⁵ Añonota ñemotareɨ peyokotɨ, peñomotareɨ vaerä kuña ndive, neñemuña ndive jare kuña iñemuña ndive; jae ndembopereta neäka pe, jare nde rembopereta ipɨta pe.

¹⁶ Kuña pe jei: —Ndepurúa yave ambojetata ndeve mbae jasɨ; membɨrasɨ reiporarata reiko; ndepɨa jemimbota neme jeia re oikota, jare jae ipo igüɨ pe reikota.

¹⁷ Kuimbae pe jei: —Nderembireko iñee re reyeapɨsaka vae jeko pegua, jare reu jókuae ɨvɨra iagüe royókuai tëi agüɨye vaerä reu; jáeramo ndereko pegua ɨvɨ oiporarata cheyepopeyu; reiporara reve rekaruta opaete ara reikove reiko ramboeve.

¹⁸ Ñurati reta jare ñana pɨ̈chɨi vae reta ɨvɨ omoñemuñata ndeve, jare temitɨ ñana rupigua rerekota nderembiurä.

¹⁹ Nderɨaipoagüe rekaruta, jökorai reo ye regua reyea ɨvɨ ndive, echa ɨvɨ güi ko reyeapo; ɨvɨkúi ko nde, jare ɨvɨkuirä ko reo yeta.

²⁰ Jare Adán ombojee jembireko Eva pe, echa jae ko opaete vae reta ichɨrä.

²¹ YandeYa Tumpa oyapo kuimbae jare jembireko jemimonderä mɨmbapiregüe, jare omondeuka chupe reta.

²² YandeYa Tumpa jei iyeupe: “Añave, kuimbae oiko ma yande rami, oikuaa ma ikavi vae jare ikavimbae vae re; ërei añave agüɨye tipóyai toekɨ tou ɨvɨra tekove pegua iagüe, echa jou yave oikopukuta.”

²³ Jayave yandeYa omoë kó Edén pegua güi, omaetɨ vaerä ɨvɨ pe, jókuae chugüi oyeapo vae pe.

²⁴ Jayave omombo joko güi kuimbae, jare oñono araɨgua reta Edén güi kuaraɨ oëa kotɨ jare metei kɨsepuku jendɨ vae jare oyembovava opaete rupi oguata vae, oyopia vaerä ɨvɨra tekove pegua jape.