GÉNESIS 26 - Biblia Guarani Tumpa Iñee

Isaac ojo Gerar pe

¹ Jókuae ara rupi karuai yae opaete jókuae ɨvɨ rupi, Abraham iara pe karuai rami; jare Isaac ojo Abimelec filisteo reta juvicha guasu, tëta Gerar pe.

² Joko pe yandeYa oyekuaa jare jei chupe: “Agüɨye ekua Egipto pe, epɨta eiko che jaeta ndevea pe,

³ eiko oguataiño vae rami kuae ɨvɨ pe, che aïta nde ndive, cheporerekuata nderé, echa ndeve jare neñemuña reta pe ameeta opaete kuae ɨvɨ. Jökorai amoañeteta ñererökuavee ayapo nderu Abraham ndive vae.

⁴ Ambojetata neñemuña, ara re yasɨtata rami, jare ameeta ndeve opaete kuae ɨvɨ. Jare neñemuña rupi opaete tëtaguasu reta re outa mborerekua.

⁵ Echa Abraham oendu jaegüe jare oyapo cheporookuai reta, cheporomboe mborookuai iyɨpɨ oyepoepɨmbae vae.”

⁶ Isaac oiko Gerar pe.

⁷ Jókuae tëta pegua kuimbae reta oparandu yave chupe jembireko re, Isaac okɨɨye jei: “Cherembireko” echa oyemongeta güɨramoi oyukata Rebeca jeko pegua, echa maepöra yae ko, jáeramo jei: “Chereindɨ ko.”

⁸ Ɨma ma oiko joko pe yave, Abimelec filisteo reta juvicha guasu, omae ventana rupi oiko yave oecha Isaac oiküava güɨnoi jembireko Rebeca.

⁹ Jare Abimelec oenɨiuka Isaac, jare jei chupe: —Jae yepe nderembireko. ¿Maera pa rere, “chereindɨ ko”? Isaac jei: —Echa ayemongeta güɨramoi cheyukata jae jeko pegua.

¹⁰ Abimelec jei: —¿Maera pa kuae reyapo oreve? Ipuere viña amogüe kuimbae tëta pegua oke nderembireko ndive, reruta viña oreré mbaeyoa.

¹¹ Jayave Abimelec oyókuai opaete vae: —Kia nunga vae oyapo yave ikavimbae kuae kuimbae pe, ani jembireko re opoko yave, tomano jókuae nunga.

¹² Jare Isaac omaetɨ jókuae ɨvɨ pe, jare jókuae año jeta imbaagüɨye, echa yandeYa iporerekua jese.

¹³ Oyemboikokatu yae, mbaetɨ mbae oata chupe, jare okuakuaa güɨnoi regua mbaepuere tuichagüe.

¹⁴ Güɨnoi jeta vecha jare guaka, jare jeta kó pe oparavɨkɨ vae; jókuae jeko pegua filisteo reta omotareɨ.

¹⁵ Jare tu Abraham jembiokuai reta oipea ɨkua vae, filisteo reta opa oyatɨ jare omotɨnɨe ɨvɨ pe.

¹⁶ Jayave Abimelec jei Isaac pe: —Ekua oregüi, echa reikokatu yae ete ma oregüi.

¹⁷ Isaac ojo joko güi oñemoëta ɨvɨtɨ päu pe, Gerar pe, jare oiko joko pe.

¹⁸ Isaac oipea ye ɨkua reta, tu Abraham oiko yave oipea vae reta, Abraham omano güire filisteo reta opa oyatɨ vae, jare ombojee tu ombojee rami.

¹⁹ Ërei Isaac jembiokuai reta oyoo yave ɨkua ɨvɨtɨ päu pe, oväe chupe metei ɨ jesaɨ vae.

²⁰ Jare mɨmba iyangarekoa reta Gerar pegua, oñomoata Isaac jɨmba iyangarekoa reta ndive ɨkua re. Jáeramo jókuae ɨkua ombojee Esek, echa oyoaka reta jese.

²¹ Oipea reta ye ïru ɨkua, jare jekuae oñoraro ye jese, jare ombojee, Sitna.

²² Oyakavo joko güi, jare oipea ïru ɨkua, joko pe mbaetɨ ma oñomoata reta jese jare ombojee Rehobot, jare jei: “Echa yandeYa añave omee yandeve, ñamoñemuña vaerä jeta mbae kuae ɨvɨ pe.”

²³ Joko güi ojo Beerseba pe.

²⁴ Jókuae pɨ̈tu yandeYa oyekuaa chupe, jare jei: “Che ko jae nderu Abraham iTumpa. Agüɨye ekɨɨye, echa che aï nde ndive, cherembiokuai Abraham jeko pegua cheporerekuata nderé, jare ambojetata neñemuña reta.”

²⁵ Jayave Isaac omopüa joko pe mɨmba oyeyuka oyeapɨ jese vae, jare oyerure yandeYa jee re, oyatɨka vi jo guakapi pegua jare jembiokuai reta oipea ɨkua joko pe.

Isaac jare Abimelec oyapo reta morogüɨrökuavee päve

²⁶ Abimelec jare ichëi Ahuzat jare isundaro ruvicha Ficol, yogüeru Gerar güi Isaac pɨri.

²⁷ Isaac jei chupe reta: —¿Maera pa peyu chépɨri, pe reta chemotareɨ vae jare chemombo pepɨte güi vae?

²⁸ Jayave jae reta jei: —Roecha yandeYa oiko nde ndive; jare royemongeta yayapo vaerä oyoupe morogüɨrökuavee päve Tumpa rovake;

²⁹ agüɨye vaerä mbae ikavimbae reyapo oreve, echa ore mbaetɨ mbae ikavimbae royapo ndeve. Jaeño ikavi vae royapo ndeve, rombou mbɨakatu ndive kuae kotɨ; nde ko jae yandeYa iporerekua jese vae.

³⁰ Jayave jae oyapouka tembíu kavi chupe reta; okaru jare jou reta vino.

³¹ Jare ndeimboveasɨ opüa reta oyapo oyoupe morogüɨrökuavee päve Tumpa rovake, jare oyupavo reta mbɨakatu reve oyougüi.

³² Jókuae ara Isaac jembiokuai reta yogüeru imiari ɨkua oipea vae pe oväe ɨ vae re.

³³ Jare ombojee reta Seba, jáeramo jókuae tëta jee Beerseba añave rupi.

³⁴ Esaú cuarenta año ma güɨnoi yave omenda Judit ndive, jae ko Beeri Het iñemuña tayɨ, jare omenda vi Basemat ndive, jae ko Elón Het iñemuña tayɨ.

³⁵ Kuae mókoi kuña reta ombopɨatɨtɨ yae Isaac jare Rebeca.