GÉNESIS 25 - Biblia Guarani Tumpa Iñee

Abraham iñemuña reta

¹ Abraham güɨreko ïru kuña, jae ko jee Cetura.

² Jae imembɨ reta jee: Zimram, Jocsán, Medán, Madián, Isbac jare Súa.

³ Jocsán jae ko Seba jare Dedán tu. Jare Dedán iñemuña reta jae: Asurim, Letusim jare Leumim.

⁴ Madián taɨ reta ko jae: Efa, Efer, Hanoc, Abida jare Elda. Opaete kuae reta jae ko Cetura iñemuña reta.

⁵ Abraham omee opaete güɨnoigüe Isaac imbaerä.

⁶ Ërei kuña reta güɨrekoiño vae imembɨ reta pe, jaeño omee mbota, jare opa omondo mombɨrɨ kuaraɨ oëa kotɨgua ɨvɨ pe, taɨ Isaac güi, jae oikoveño ramboeve.

Abraham imano jare iñeotɨ regua

⁷ Opaete ara Abraham oikove vae, jae ko: Ciento setenta y cinco año,

⁸ jare omano Abraham indechi yae pe ma, jeta año güɨnoi yave, jare oñeotɨ iñemuñagüe reta oñeotɨa pe.

⁹ Isaac jare Ismael oñotɨ tu, ɨvɨkua Macpela pegua pe, Efrón, Zohar taɨ Het iñemuña iɨvɨ pe, Mamre jóvai oï vae pe.

¹⁰ Kuae ɨvɨ jae ko Abraham ogua Het iñemuña reta güi vae, joko pe oñeotɨ Abraham jare jembireko Sara.

¹¹ Abraham omano güire, Tumpa iporerekua Isaac re, jare Isaac oiko ɨkua: “Oikove jare chereecha vae” jee vae iyɨpɨ pe.

Ismael iñemuña reta

¹² Kuae ko jae Ismael taɨ reta, jae ko Abraham taɨ, Agar Egiptoɨgua imembɨ chupe vae, Sara jembiokuai kuña,

¹³ kuae jae ko Ismael taɨ reta jee taɨrɨpɨ güive; jae ko: Nebaiot, jaɨkue rupi Cedar, Adbeel, Mibsam,

¹⁴ Misma, Duma, Massa,

¹⁵ Hadar, Tema, Jetur, Nafis jare Cedema.

¹⁶ Jae ko kuae doce Ismael taɨ reta, jee ndive jare iɨvɨ jeyupa ñavo ñogüɨnoi tenondegua vae rupi.

¹⁷ Ismael güɨnoi ciento treinta y siete año yave omano, jare oñeotɨ iñemuñagüe reta oñeotɨa pe.

¹⁸ Jare iñemuñagüe reta oñemoëta Havila güive Shur kotɨ, jae ko oï Egipto jóvai, Asiria kotɨ güi tape ou vae rupi; joko pe oñemoëta reta jëtara reta omotareɨ tëi reve.

Jacob jare Esaú oa vae regua

¹⁹ Jae ko kuae Isaac iñemuña reta, Abraham taɨ.

²⁰ Isaac cuarenta año güɨnoi yave omenda Rebeca ndive, Betuel Aram pegua tayɨ, Labán Aram pegua jeindɨ, Padan-aram pe yogüɨreko vae.

²¹ Isaac oyerure yandeYa pe jembireko re, echa imembɨmbae ko; jare yandeYa oendu chupe iyerure, jare ipurúa chupe jembireko Rebeca.

²² Jare oyandu jɨe pe oñoraro michia raɨ reta, jáeramo jei: “Köraita ko yave, ¿maera ye pa aikoveta aiko?” Jare ojo oparandu kuae re yandeYa pe.

²³ Jare yandeYa jei chupe: “Mókoi tëtaguasu retarä vae oime renoi nderɨe pe; mókoi tëta oyomboyaota nderɨe güi voi vae; metei tëta imbaepuere yaeta ïru tëta güi. Tenondegua oyeokuaita taɨkuegua pe.”

²⁴ Jare ou ma oväe imembɨ oa vaerä yave, oyekuaa chaguakiri ko.

²⁵ Tenondegua oa vae ipireyu jare jaa yae, jare ombojee reta Esaú.

²⁶ Jaɨkue rupi oa tɨvɨ, oyepɨɨ reve tɨkeɨ Esaú ipɨta re; jare ombojee reta Jacob. Isaac sesenta año ma güɨnoi yave oa jembireko imembɨ.

Esaú omee iyeugüi membɨrɨpɨyekou

²⁷ Opa okuakuaa michia reta, jare Esaú ko kuimbae ipoki yae maepïaro pe vae; ërei ko Jacob kuimbae oñeraä vae, mbaetɨ omomora guata.

²⁸ Jare Isaac oaɨu yae Esaú, echa jou jembia; ërei Rebeca oaɨu Jacob.

²⁹ Metei ara Jacob omboyɨ oï tembíu, jare Esaú ikangɨ yae ou guataa güi.

³⁰ Jayave jei Jacob pe: —Eyapo ikavi vae cheve, emee tau jókuae tembíu pɨ̈ta kavi vae, echa chekangɨ yae aipo. Jáeramo, Esaú jee ïru ko Edom.

³¹ Jare Jacob jei: —Eguauka räri cheve membɨrɨpɨyekou renoi vae.

³² Jayave Esaú jei: —Ko yɨmbɨaɨ cheyukata ma; ¿jare mbaerä pa ikavita cheve membɨrɨpɨyekou?

³³ Jacob jei: —Ere añave voi cheve Tumpa rovake kuae rere reï cheve vae. Esaú jei Tumpa rovake jókuae oyapota vae re. Jökorai Esaú oguauka Jacob pe membɨrɨpɨyekou güɨnoi vae.

³⁴ Jayave Jacob omee Esaú pe mbɨyape jare tembíu kumanda lenteja jee vae pegua; jayave Esaú okaru, oɨu, jare opüa ojo. Jökorai oaɨumbae reve omee iyeugüi opaete membɨrɨpɨyekou.