GÉNESIS 24 - Biblia Guarani Tumpa Iñee

Abraham oeka Isaac jembirekorä

¹ Abraham indechi yae ma, jare opaete pe yandeYa iporerekua jese.

² Jare Abraham jei jembiokuai ñɨma yae ma jo pe vae pe, jae ko tenondegua yae oyangareko opaete mbaembae re vae: —Eñono ndepo cheu päu pe,

³ jare yandeYa jee re ere añetete reyapota vae, Tumpa ara pe jare ɨvɨ pe oï vae, agüɨye emaeño cheraɨ Isaac tomenda Canaán pegua tayɨ ndive, che aï ipɨte pe vae,

⁴ ekua cheɨvɨ pe, cherëtara reta yogüɨrekoa güi eru kuña cheraɨ jembirekorä.

⁵ Tembiokuai jei: —Güɨramoi kuña mbaetɨ yave oipota ou cherupíe kuae ɨvɨ pe, ¿arajata ra jayave nderaɨ jókuae ɨvɨ nde reyúa güi?

⁶ Abraham jei chupe: —¡Mbaetɨ, agüɨye eraja cheraɨ jokotɨ!

⁷ YandeYa Tumpa ara pe oï vae cherenoe cheru jëta güi jare cherëtara reta güi vae, güɨrökuavee cheve jae jee re aeño: “Neñemuña pe ameeta kuae ɨvɨ” jae ko omondota iAraɨgua nderenonde jare nde reruta joko güi kuña cheraɨ peguarä.

⁸ Ërei ngatu kuña ñäteɨ ou nderupíe yave, nde mbaetɨta renoi teko kuae ñererökuavee kotɨ; jaeño, ¡cheraɨ agüɨye tojo jokotɨ!

⁹ Jayave tembiokuai oñono ipo iya Abraham iu ipäu pe, jare jei Tumpa rovake kuae mbaravɨkɨ oyapota chupe vae re.

¹⁰ Jókuae tembiokuai oipɨɨ payandepo iya icamello, jare ojo güɨnoe mbotarä vae oipotagüe iya imbae güi, jare omboɨpɨ oguata ojo regua oväe Mesopotamia pe, Nacor jëta pe.

¹¹ Jare omombutuu camello reta tëta güi ikatu pe ɨkua oïa pe, kaaru ma jare kuñatai reta iora ma ou vaerä ɨ güɨraja,

¹² oyerure yandeYa pe jei: “CheYa Tumpa, cheya Abraham iTumpa, romoñera añave aväe vaerä ayu aeka vae, ndeporoparareko cheya Abraham ndive.

¹³ Mase, ko aï ɨkua iyɨpɨ pe, jare kuimbae reta kuae tëta pegua tayɨ oë ɨkua pe ɨ güɨraja vaerä.

¹⁴ Jókuae kuñatai pe, che jaeta: ‘Embogüeyɨ ndeɨrɨru che aɨu vaerä.’ Jare jae jei yave cheve: ‘Eɨu jare tamboɨu vi ndeve camello reta.’ Jae toiko reiparavo nderembiokuai Isaac peguarä vae; jare kuae re taikuaa ndeporoparareko yae cheya kotɨ vae.”

¹⁵ Jare ndei jae opa imiari mbove, ko ou Rebeca güeru reve iyatiɨ re ɨrɨru, jae ko Betuel tayɨ; Betuel ko jae Milca imembɨ Nacor pe vae, jae ko Abraham tɨvɨ.

¹⁶ Jókuae kuñatai maepöra yae, ndeiño etei oasa kuimbae ndive vae. Jae ogüeyɨ ɨkua pe jare omotɨnɨe iɨrɨru yave oë ojo ye vaerä.

¹⁷ Jayave tembiokuai opɨ̈roata ojo ikotɨ jare jei chupe: —Romoñera remee vaerä aɨu ndeɨrɨru güi.

¹⁸ Jókuae kuñatai jei chupe: —Eɨu cheya. Iyandeko ombogüeyɨ iɨrɨru ipo pe jare omee oɨu.

¹⁹ Tembiokuai opa ma oɨu yave, kuñatai jei: —Tanoe vi ndeve camello reta peguarä, opaete oɨu regua.

²⁰ Iyandeko oikuavo iɨrɨru mɨmba iɨguarɨru pe, jare osɨi ye ɨkua kotɨ güɨnoe vaerä ɨ, jökorai güɨnoe opaete camello reta peguarä.

²¹ Jare tembiokuai ipɨakañɨ omae jese, kïrii ngatu omae oikuaa vaerä yandeYa ra omboekopo iguata vae.

²² Camello reta opa ma yangapɨɨ yave, kuimbae oekɨ metei moäka-vera oro pegua ova gramo ipoɨ vae jare mókoi poapɨ regua cien gramo oasa ipoɨ vae,

²³ jare jei chupe: —¿Kia tayɨ pa nde jare oime pa nderu jo pe roputuu vaerä?

²⁴ Jae jei: —Betuel tayɨ ko che; Betuel jae ko Milca imembɨ Nacor pe vae,

²⁵ oime ko peputuu vaerä orero pe, jare jeta kapii jare jeta atiɨgüe.

²⁶ Jayave jókuae kuimbae itindɨ jare omboete yandeYa,

²⁷ jare jei: “¡Toyemboete yandeYa, cheya Abraham iTumpa, echa mbaetɨ ombosɨrɨ iporoparareko cheya Abraham güi, chereru yandeYa jare aväe cheya jëtara reta jëta!”

²⁸ Jayave kuñatai osɨi ichɨ jo kotɨ oikuaauka vaerä kuae mbaembae re.

²⁹ Labán, Rebeca ikɨvɨ osɨi oë ikatu kotɨ kuimbae oïa pe, ɨkua jenda pe,

³⁰ echa oecha jeindɨ ipo pe moäka-vera jare poapɨ regua oro pegua; Rebeca imiari opaete jókuae kuimbae jei chupe vae yave, ou jare oecha jókuae kuimbae icamello ndive oï ɨkua iyɨpɨ pe,

³¹ jare jei chupe: —Eyu, yandeYa iporerekua jese vae. ¿Maera pa reï ikatu pe? ¡Ko añono kavi ma o jare camello reta jendarä!

³² Jayave jókuae kuimbae ojo o pe jare Labán oyora camello reta, omee jou kapii jare atiɨgüe, jare jaɨkue rupi güeru ɨ chupe oyoe vaerä ipɨ jare jupíe yogüeru vae reta.

³³ Oñono tembíu jóvai okaru reta vaerä, ërei jae jei: —Mbaetɨta akaru jaeta vae ndei jae mbove. Labán jei: —Nemiari.

³⁴ Jayave tembiokuai jei: —Che ko jae Abraham jembiokuai.

³⁵ YandeYa iporerekua yae cheya re, jare oikokatu yae: Omee chupe jeta vecha, guaka, korepoti oro, tembiokuai kuña jare tembiokuai kuimbae, camello jare mburika.

³⁶ Jare Sara, cheya jembireko imembɨ itɨ̈aro pei, chupe omee opaete mbaembae güɨnoigüe.

³⁷ Jare cheya oyapouka cheve ñererökuavee Tumpa rovake jei reve: “Agüɨyeta cheraɨ remaeño omenda Canaán pegua kuimbae reta tayɨ ndive, kuae ɨvɨ aiko pɨpe vae.

³⁸ Ërei reota cheru jëta pe cherëtara reta ñogüɨnoia pe, jare joko güi reruta kuña cheraɨ peguarä.”

³⁹ Jare che jae: “Güɨramoi kuña ñäteɨta ou cherupíe.”

⁴⁰ Jayave cheya Abraham jei: “YandeYa jae ndive aguata vae omondota iAraɨgua nde ndive, jae ndereraja kavita cherëtara reta pɨri, cheru jëta pe, joko güi reruta kuña cheraɨ peguarä.

⁴¹ Jayave nde mbaetɨta renoi teko kuae ñererökuavee Tumpa jee re yayapo vae kotɨ, reo reväe yave cherëtara reta pe. Ërei mbaetɨ omee reta yave ndeve, nde mbaetɨta renoi teko kuae ñererökuavee kotɨ.”

⁴² “Jökorai añave ayu aväe ɨ jenda pe yave, jae: ‘CheYa Tumpa, cheya Abraham iTumpa, rembopo yave cheguata, ayu jese vae,

⁴³ mase, ko aï ɨ jenda pe, jókuae kuñatai ou ɨ güɨraja vae pe jae yave: Emee taɨu ndeɨrɨru güi,

⁴⁴ jare tei cheve: Eɨu, nde jare tanoe vi ɨ ndecamello reta peguarä, jókuae kuñatai toiko reiparavo cheya taɨ peguarä vae.’

⁴⁵ Jare ndei opa chemiari chepɨa pe mbove, ko Rebeca ojo oväe iɨrɨru ndive iyatiɨ re, ogüeyɨ ɨ jenda pe jare güɨnoe ɨ jare jae chupe: ‘Romoñera remee vaerä ɨ jau.’

⁴⁶ Jare iyandeko iɨrɨru ombogüeyɨ, jare jei: ‘Eɨu jare tamboɨu vi ndecamello reta.’ Jau ɨ jare omee vi oɨu checamello reta.

⁴⁷ Jayave aparandu chupe: ‘¿Kia tayɨ pa nde?’ Jare jae jei cheve: ‘Betuel tayɨ ko che; Betuel jae ko Milca imembɨ Nacor pe vae.’ Jayave añono itï re moäka-vera jare ipoapɨ re poapɨ regua,

⁴⁸ chetindɨ amboete yandeYa; amboete yandeYa, cheya Abraham iTumpa, chereru tape ikavi vae rupi cheya jëtara oïa pe, araja vaerä kuña, cheya taɨ peguarä.

⁴⁹ Añave pe reta peyapo yave jupi vae jare mboroparareko cheya kotɨ, pemombeu cheve jare mbaetɨ yave pemombeu vi cheve; aikuaa vaerä mbae ra ayapota vae.”

⁵⁰ Jayave Labán jare Betuel jei chupe: —YandeYa güi ko opaete kuae oë, mbaetɨ orepuere roe ndeve ikavimbae ani ikavi vae.

⁵¹ Ko Rebeca oï nderóvai; eipɨɨ eraja jare toiko ndeya taɨ jembirekorä, yandeYa jei rami.

⁵² Abraham jembiokuai oendu yave iñee reta, itindɨ reve omboete yandeYa.

⁵³ Jayave tembiokuai güɨnoe mbaembae ikavi vae korepoti pegua jare oro pegua, jare temimonde reta, omee Rebeca pe. Jaeramiño vi omee mbae jepɨ vae ikɨvɨ pe jare ichɨ pe.

⁵⁴ Jaɨkue rupi okaru jare jou reta vino, kuimbae reta jupíe yogüeru vae ndive, jare oke reta. Pɨareve pe ndeimbove yave opüa jare jei: —Chemondo cheya kotɨ.

⁵⁵ Ërei ngatu Rebeca ikɨvɨ jare ichɨ jei chupe: —Topɨta yeño räri kuñatai ore ndive payandepo ara yepe, javoi eraja kuri.

⁵⁶ Jare jae jei chupe reta: —Agüɨye chemombɨta, yandeYa omboekopo ma ko cheguata, chemboyupavo aja vaerä cheya kotɨ.

⁵⁷ Jayave jae reta jei: —Ñaenɨi kuñatai yaparandu chupe, yaecha mbae jei.

⁵⁸ Oenɨi reta Rebeca, jare jei reta chupe: —¿Nekɨ̈reɨ pa reo kuae kuimbae ndive? —Chekɨ̈reɨ —jei.

⁵⁹ Jayave ikɨvɨ omaeño ojo Rebeca jare kuña oyangareko aeño jese vae, Abraham jembiokuai jare iñeïru reta ndive.

⁶⁰ Jare omboyupavo ñee kavi reve jei reta chupe: “¡Orereindɨ! ¡Eiko jeta vae reta ichɨrä, neñemuña reta topɨ̈ro jovaicho reta jöke!”

⁶¹ Jayave opüa Rebeca jare iyangarekoa kuñatai reta opo camello re, jare ojo Abraham jembiokuai jupíe; tembiokuai oipɨɨ Rebeca jare yogüɨraja.

⁶² Jare Isaac ou ɨkua “Oikove jare chereecha vae” jee vae güi; echa jae oiko Neguev pe.

⁶³ Oë yepe jae omae ñuu rupi kaaru yave, jare oupi iñäka, oecha camello reta yogüeru.

⁶⁴ Jaeramiño vi Rebeca oupi iñäka jare omae yave oecha Isaac, jare ogüeyɨ camello güi

⁶⁵ echa oparandu ma yepe tembiokuai pe, jei: —¿Kia pa pea kuimbae ou yande kotɨ vae? Jare tembiokuai jei chupe: —Cheya ko. Jayave jae oipɨɨ iñäka-soia oñova jova.

⁶⁶ Jayave tembiokuai imiari Isaac pe opaete mbaembae oyapo vae.

⁶⁷ Jare Isaac güɨraja ichɨ Sara jogüe guakapi pegua pe, jare güɨreko Rebeca, jare oaɨu. Jökorai Isaac ipɨakatu opɨta ichɨ omano vae güi jaɨkue rupi.