GÉNESIS 23 - Biblia Guarani Tumpa Iñee

Sara imano jare iñeotɨ

¹ Sara oikove oiko ciento veintisiete año;

² jare omano Quiriat-arba pe, jae ko Hebrón, ɨvɨ Canaán pe; jare Abraham ou ipɨatɨtɨ jese jare oyaeo.

³ Abraham opüa jembireko jëogüegüe iyɨpɨ güi, jare ojo omomiari Het iñemuña reta, jei reve:

⁴ —Ketɨgua jare oguataiño vae che pepɨte pe, pemee ɨvɨ cheve anoi vaerä pepɨte pe tëogüe renda, cherembireko añotɨ vaerä pɨpe.

⁵ Het iñemuña reta jei Abraham pe:

⁶ —¡Eyeapɨsaka oreré oreya! Nde ko orepɨte pe metei Tumpa oiparavo vae; eñotɨ nderembireko jëogüegüe tëogüe-rɨru ikavi yae opaete güi vae pe; metei ave orepɨte güi ngaraa mbae jei ani ndemboavai reñotɨ vae re.

⁷ Jayave Abraham opüa, jare itindɨasɨ jókuae ɨvɨ pegua reta pe, Het iñemuña reta.

⁸ Jei chupe reta: —Añetete pe reta pekɨ̈reɨ ko añotɨ vaerä cherembireko kuae pe yave, peiporu cheree re Efrón, Zohar taɨ pe,

⁹ omee vaerä cheve ɨvɨkua Macpela pegua, jae iɨvɨ jembeɨ pe oï vae. Amboepɨta chupe jepɨ rupi kavi, anoi vaerä pepɨte pe tëogüe renda chembae ae.

¹⁰ Echa Efrón oiko jëtara Het iñemuña reta ipɨte pe, jare jae jei Abraham pe opaete vae jovake, jare opaete oike öke rupi vae reta jovake:

¹¹ —¡Ngaraa jökorai cheya! Torombopota ɨvɨ pe, jare tamee vi ndeve ɨvɨkua joko pe oï vae; opaete vae reta jovake tamee ndeve; eñotɨ nderembireko pɨpe.

¹² Jayave Abraham itindɨ opaete jókuae ɨvɨ pegua reta jóvai,

¹³ jare jei Efrón pe opaete vae jovake: —¡Eyeapɨsaka cheré! Romoñera reipɨɨ vaerä korepoti ɨvɨ jepɨgüe, jare jaɨkue rupi añotɨta cherembireko jëogüegüe.

¹⁴ Jayave Efrón jei Abraham pe:

¹⁵ —¡Cheya! Eyeapɨsaka cheré: Ɨvɨ jepɨ ko cuatrociento korepoti reare; kuae re agüɨye yayoaka, eñotɨño nderembireko jëogüegüe.

¹⁶ Jayave Abraham ikɨ̈reɨ, jare omboepɨ Efrón pe opaete Het iñemuña reta jovake jei rami, cuatrociento korepoti reare pe, korepoti omaemee vae reta oiporu vae.

¹⁷ Jökorai ɨvɨ Macpela pegua Efrón imbae, Mamre güi kuaraɨ oëa kotɨ oï vae: Ɨvɨkua jare ɨvɨra reta jare opaete mbaembae pɨpegua,

¹⁸ Abraham imbae opɨta opaete Het iñemuña reta jovake, jare opaete jókuae öke rupi oike vae reta jovake.

¹⁹ Kuae jaɨkue rupi, Abraham güɨraja oñotɨ jembireko jëogüegüe, ɨvɨ Macpela pe, Mamre güi kuaraɨ oëa kotɨ oï vae pe, jae ko Hebrón ɨvɨ Canaán pe.

²⁰ Jare opaete mbaembae jókuae ɨvɨ pegua, jare ɨvɨkua opɨta Abraham ipo pe, Het iñemuña reta omee tëogüe oñeotɨ vaerä vae.