GÉNESIS 22 - Biblia Guarani Tumpa Iñee

Tumpa ojäa Abraham iporogüɨrovia

¹ Opa kuaekuae reta oasa güire, Tumpa ojäa Abraham iporogüɨrovia jare oenɨi jee pe; jare Abraham jei: —Mbae pa cheYa.

² Javoi Tumpa jei chupe: —Eraja añave nderaɨ Isaac jaeño vae, reaɨu yae vae, jare ekua ɨvɨ Moriah jee vae pe, jare joko pe nderaɨ emee cheve mɨmba oyeyukagüe opaetei oyeapɨ vae rami, jókuae metei ɨvɨtɨ che amombeuta ndeve vae re.

³ Jayave, pɨareve pe ndeimboveasɨ Abraham opüa oyupavo, oyokua imburika jare güɨraja vi mókoi jembiokuai reta jupíe jare vi taɨ Isaac; jare oyasɨa yepea mɨmba oyeyukagüe opaetei oyeapɨ vae oapɨ vaerä, jare opüa ojo Tumpa jei chupea kotɨ.

⁴ Mboapɨa ara pe Abraham omopüa iñäka jare oecha matɨ güi jókuae ɨvɨtɨ Tumpa omombeu chupe vae.

⁵ Jayave Abraham jei jembiokuai reta pe: —Pepɨta kuae pe mburika ndive, che jare kunumi rojota romboete Tumpa jare royu yeta pekotɨ kuri.

⁶ Javoi Abraham oupi yepea mɨmba oyeyukagüe opaetei oyeapɨ vae oapɨ pɨpe vaerä vae jare oñono taɨ Isaac iyatiɨ re, jare jae güɨraja ipo pe tata jare kɨse; jare opa yogüɨraja reta.

⁷ Jayave Isaac omoë iñee jare oparandu tu pe körai: —¡Cheru! Abraham jei: —¿Mbae pa cheraɨ? Isaac jei: —Ko yaraja yepea jare vi tata, ¿jare jama pa vecha kuimbae taɨrusu vae, mɨmba oyeyukagüe opaetei oyeapɨ vaerä vae?

⁸ Jare Abraham jei taɨ pe: —Tumpa etei ko omeeta yandeve vecha kuimbae taɨrusu vae mɨmba oyeyukagüe opaetei oyeapɨ vaerä vae cheraɨ. Jökorai yogüɨraja päve yogüɨreko.

⁹ Opa ma yogüɨraja oväe Tumpa jei chupea pe yave, joko pe Abraham omopüa mɨmba oyeyuka oyeapɨ jese vae, jare oñono iárambo yepea, jare oipokua taɨ Isaac jare oñono yepea iárambo;

¹⁰ javoi Abraham oekɨ kɨse jare omopüa ipo taɨ oñaseokɨ̈ti vaerä.

¹¹ Jayave yandeYa iAraɨgua ombou iñee chupe osapúkai reve: —¡Abraham! ¡Abraham! Jare Abraham jei: —Mbae pa cheYa.

¹² Jei chupe: —¡Agüɨye emopüa ndepo kunumi re, agüɨye maratu eyapo. Echa aikuaa ma kërai ko ndeporogüɨrovia Tumpa kotɨ vae, aecha kërai mbaetɨ reipoɨu remee nderaɨ cheve; nderaɨ jaeño vae!

¹³ Jayave Abraham omopüa iñäka jare oecha ikupe kotɨ ñurati tëɨ vae ipäu pe oï metei vecha kuimbae, jäti rupi oyepókoi oï vae. Jare ojo Abraham oipɨɨ jare omee mɨmba oyeyukagüe opaetei oyeapɨ vae Tumpa pe, taɨ jekovia pe.

¹⁴ Abraham ombojee jókuae ɨvɨ: “YandeYa ko omeeta mbae oata vae.” Jáeramo jókuae güive añave rupi jei reta: “YandeYa iɨvɨtɨ re omeeta mbae oata vae.”

¹⁵ Jare yandeYa iAraɨgua oenɨi ye ara güi Abraham,

¹⁶ jei chupe: —YandeYa jei körai: “Cheyé aeño arökuavee ndeve reyapo kuaekuae ramo, jare mbaetɨ reipoɨu remee nderaɨ jaeño vae cheve;

¹⁷ añave añetete cheporerekuata nderé jare ambojetata neñemuña reta yasɨtata rami, jare ɨguasu jembeɨ rupi ɨvɨkuitï oï rami. Neñemuña reta opɨ̈rota jovaicho reta güi jëta.

¹⁸ Neñemuña rupi outa cheporerekua opaete kuimbae reta ɨvɨ pegua re, nde reyandu cheñee ramo.”

¹⁹ Jare Abraham ou ye jembiokuai reta ñogüɨnoia pe, jare opa yogüɨraja Beerseba kotɨ; jare jókuae Beerseba pe oñemoëta Abraham.

Nacor taɨ reta

²⁰ Jare kuae mbaembae reta jaɨkue rupi Abraham pe omombeu reta Milca imembɨ vi tɨvɨ Nacor pe vae.

²¹ Taɨrɨpɨ jee Uz, jare tɨvɨ Buz jare Kemuel, jae ko Aram tu.

²² Quesed, Hazo, Pildas, Jidlaf jare Betuel.

²³ Betuel jae ko Rebeca tu. Kuae chiu vae jae Milca imembɨ Nacor pe vae, jae ko Abraham tɨvɨ.

²⁴ Jare kuña güɨrekoiño vae Reúma jee vae, imembɨ vi chupe, jae ko Teba, Gaham, Tahas jare Maaca.