GÉNESIS 20 - Biblia Guarani Tumpa Iñee

Abraham jare Abimelec

¹ Abraham oë ojo joko güi ɨvɨ Neguev kotɨ, jare oyembojeyupa Cades jare Shur ipäu pe. Jare oiko ketɨgua rami Gerar pe.

² Abraham jei jembireko Sara kotɨ: ¡Chereindɨ ko! Jare Abimelec mburuvicha guasu Gerar pegua omondo güeruruka Sara;

³ ërei ngatu Tumpa ou Abimelec pe ike pe pɨ̈tu yave, jare jei chupe: “Mase, remanota ko, kuña reruruka vae jeko pegua, echa omenda vae ko.”

⁴ Ërei ngatu, Abimelec mbaetɨ yepe güɨroke, jare jei: “CheYa, ¿reyukata vi pa jekombae?

⁵ Abraham etei ko jei cheve: ‘Chereindɨ ko’ jare kuña jei: ‘Chekɨvɨ ko.’ Chepɨa jupi reve ko kuae ayapo, mbaetɨ mbae ikavimbae ayapo.”

⁶ Tumpa jei chupe ipaɨu pe: “Che aikuaa vi ndepɨa jupi reve kuae reyapo vae; che vi ko royopia agüɨye vaerä ndeyoa chekotɨ, jökorai mbaetɨ amaeño repoko jese.

⁷ Jayave, emee ye kuña ime pe, echa jae ko ñeemombeúa, oyerureta nderé jare reikoveta. Ërei ngatu mbaetɨ yave remee ye, añetete remanota jare opaete neñemuña.”

⁸ Jayave Abimelec opüa ndeimboveasɨ jare oenɨi opaete jembiokuai reta, omombeu opaete pe ipaɨu, jare kuimbae reta okɨɨye yae kuae oendu yave.

⁹ Jaɨkue rupi Abimelec oenɨi Abraham jare jei chupe: —¿Mbae pa reyapo oreve? ¿Oime pa mbae pe cheyoa ndekotɨ, reru vaerä cheré jare cheporookuaía re mbaeyoa tuichagüe yae? Mbaetɨta tëi reyapo vae reyu reyapo che ndive.

¹⁰ Abimelec jei vi Abraham pe: ¿Mbae pa reyemongeta kuae reyapo vaerä?

¹¹ Abraham jei chupe: —Jae cheyeupe: “Añetete kuae pe mbaetɨ Tumpa güi oipoɨu vae, cheyuka retata ko cherembireko re.”

¹² Añetete jae vi ko chereindɨ, cheru tayɨ, ërei mbaetɨ chesɨ imembɨ, jare amenda jae ndive.

¹³ Tumpa cherenoe yave cheru jëta güi, che jae chupe: “Köraita rere chekotɨ tëta pe ñaväe ñavo: ‘Chekɨvɨ ko.’ ”

¹⁴ Jayave Abimelec oipɨɨ vecha reta, jare guaka reta, tembiokuai kuimbae jare tembiokuai kuña, jare omee Abraham pe, jare omee ye chupe jembireko Sara.

¹⁵ Jare Abimelec jei: —Mase, ko oï ɨvɨ nderóvai; eiko pɨpe ikavi ndevea pe.

¹⁶ Jei Sara pe: —Mase, ko amee mil reare korepoti pegua ndekɨvɨ pe; kuae ko jae ndereepɨ vaerä opaete ndeɨvɨrigua omae ñogüɨnoi nderé vae reta güi, jare opaete pegua, jökorai mbaetɨta kia mbae jei ndekotɨ.

¹⁷ Jayave Abraham oyerure Tumpa pe; jare Tumpa oipoano Abimelec jare jembireko, jare jembiokuai kuña reta, oime vaerä iñemuña reta.

¹⁸ Echa Tumpa oyokenda opaete membɨrɨru Abimelec jo pegua güi, Sara jeko pegua.