GÉNESIS 18 - Biblia Guarani Tumpa Iñee

Tumpa güɨrökuavee omee vaerä Abraham taɨrä

¹ Jaɨkue rupi yandeYa oyekuaa Abraham pe ɨvɨra encina jee vae jupa pe, Mamre iɨvɨ pe, oputuu oï jo guakapi pegua jöke pe araku güi yave, kuaraɨ ara mbɨte jaɨkue rupi.

² Abraham omopüa iñäka jare oecha mboapɨ kuimbae reta yogüeru oväe jóvai; jare oecha yave osɨi oë ojo oövaiti reta vaerä, jare oyetavatɨka itindɨasɨ ɨvɨ re.

³ Jare jei: —CheYa, ndepɨakatu ko chekotɨ yave, romoñera repɨta vaerä kuae nderembiokuai jo pe.

⁴ Taruruka peve ɨ peyoe vaerä pepɨ; jare peyapakua peputuu ɨvɨra iküaraɨa igüɨ pe.

⁵ Jare peyu ramboeve chépɨri, aruta peu mbɨyape perete täta vaerä, jare opa pekaru yave peasa kuri. Jae reta jei chupe: —Eyapo nde rere rami.

⁶ Jayave Abraham oike jaɨai reve jo guakapi pegua pe jare jei Sara pe: —Eipɨɨ veinte kilo rupi trigokúi ipɨuasɨ kavi vae jare nderaɨai eyapo mbɨyape tanimbugüɨ pe oyɨ vae.

⁷ Abraham osɨi guaka reta kotɨ, jare oiparavo toro taɨrusu vae ikɨra kavi vae, omee metei jembiokuai pe, jare jókuae jembiokuai oyapo tembíu ɨmambae pegua.

⁸ Jare güeru toro taɨrusu vae isoo jare güeru vi guara, güeru imboupa reta jóvai oñono; jare imboupa reta okaru ramboeve ɨvɨra igüɨ pe, jae oyemboɨ jae reta jóvai oyeokuai vaerä chupe reta.

⁹ Jare jei reta chupe: —¿Jama pa nderembireko Sara? Jae jei: —Oime oï kuae o guakapi pegua japɨpe.

¹⁰ Jayave jei Abraham pe: —Ayu yeta ndépɨri kuri kuae año ou vae re, jayave nderembireko Sara oimeta ma imembɨ. Jare ikupe kotɨ, o guakapi pegua jöke japɨpe Sara oyeapɨsaka oï opaete kuaekuae re.

¹¹ Abraham jare Sara okuakuaa yae reta ma; jare Sara güi opɨta ma, kuña reta yasɨ ñavo oiporara vae.

¹² Kuae oendu yave Sara opuka vɨari oyeyóyai jare jei ipɨa pe: “¿Chetɨ̈aro pei ra chepɨayekouta, jare cheya ko indechi yae ma vi?”

¹³ Jayave yandeYa jei Abraham pe: —¿Maera pa Sara opuka jei reve: Añetete ra ko chemembɨta chetɨ̈aro pei?

¹⁴ ¿Oime pa mbae yavai yae cheve vae? Kuae año ou ye vae re ayu yeta ndépɨri, jayave Sara oimeta ma imembɨ.

¹⁵ Sara jókuae oendu yave okɨɨye, jare oyekuaku tëi, jei: —Mbaetɨ ko apuka. Ërei Tumpa jei: —Repuka ko, che ko aikuaa.

Abraham oiporu Tumpa pe Sodoma re

¹⁶ Jayave jókuae kuimbae reta opüa joko güi jare omae reta Sodoma kotɨ; jare Abraham güɨraja omondo reta.

¹⁷ Jayave yandeYa jei: “Tamombeu Abraham pe ayapota vae,

¹⁸ echa chugüi oñemuñata tëtaguasu imbaepuere yaeta vae. Jare jese vi opaete tëtaguasu reta ɨvɨ rupigua oyekouta.

¹⁹ Echa aiparavo ko güɨroata vaerä taɨ reta jare opaete iñemuña reta cheporomboe rupi; oyapo reta vaerä jupi vae jare sɨmbi vae; jökorai yave aruta Abraham re opaete arökuavee chupe vae.”

²⁰ Jayave yandeYa jei Abraham pe: —Sodoma pegua jare Gomorra pegua reta mbaetɨ etei ma jërakua kavi ara ñavo, iyoa reta jeiete yae ma ikaviä,

²¹ añave agüeyɨta jokotɨ, jare aechata oyapo reta ra mbaeyoa, jërakua cheve rami. Ërei mbaetɨ yave aikuaata.

²² Jare mókoi kuimbae reta opa yogüɨraja joko güi Sodoma kotɨ; ërei Abraham opɨta yandeYa jóvai.

²³ Abraham oya katu jese jare oparandu chupe: —¿Remboaita vi pa jupi vae, jeko vae ndive?

²⁴ Güɨramoi oime cincuenta jupi vae tëta guasu pe: ¿Remboaita pa jeseve tëta guasu? ¿Ngaraa pa neɨ̈ro jókuae cincuenta vae reaɨu jeko pegua?

²⁵ ¿Reyukata pa jupi vae, jeko vae ndive, jare jupi vae remboyovakeñota pa jeko vae ndive? Nde reporojäa opaete ɨvɨ re vae, ¿ngaraa pa reyapo jupi vae?

²⁶ Jayave yandeYa jei: —Aväe yave cincuenta jupi vae tëta guasu pe, cheɨ̈rota opaete pe, jae reta aɨu jeko pegua.

²⁷ Abraham jei ye chupe: —Neɨ̈ro cheve cheYa, mase chemiari ye, yepe tëi che ko ɨvɨkúi jare tanimbu rami.

²⁸ Güɨramoi cincuenta jupi vae güi oatata pandepo. ¿Remboaita pa jókuae pandepo oata vae jeko pegua? Jae jei: —Ngaraa amboai aväe yave cuarenta y cinco.

²⁹ Jekuae jei ye: —Güɨramoi reväeta chupe cuarenta. Jae jei: —Ngaraa ayapo, cuarenta vae aɨu jeko pegua.

³⁰ Abraham jei ye: —Romoñera agüɨye vaerä ndepochɨ cheve: Güɨramoi reväeta jaeño treinta. Jare jei chupe: —Ngaraa ayapo, aväe yave chupe treinta.

³¹ Jekuae Abraham jei ye chupe: —Mase, ko chemiari ye ndeve cheYa aipoɨumbae reve: Güɨramoi reväeta chupe veinte jupi vae. Jae jei: —Jókuae veinte vae aɨu vae re, ngaraa amboai tëta guasu.

³² Abraham jekuae jei ye: —Agüɨye ndepochɨ cheYa chemiari yave metei ye yepe: Güɨramoi reväeta payandepo. YandeYa jei: —Ngaraa amboai payandepo vae aɨu jeko pegua.

³³ YandeYa opa ma imiari Abraham ndive yave ojo joko güi; jare Abraham oyerova ye oikoa kotɨ.