GÉNESIS 16 - Biblia Guarani Tumpa Iñee

Agar jare imembɨ Ismael

¹ Sara mbaetɨ imembɨ Abram pe; jare jae güɨnoi metei tembiokuai kuña Egiptoɨgua, Agar jee vae.

² Jayave Sarai jei Abram pe: —Reecha ma kërai yandeYa cheapo chemembɨmbae vaerä; añave romoñera rereko vaerä kuae cherembiokuai; güɨramoi jupi anoita chemembɨ retarä. Jare Abram oyapo jembireko Sarai jei vae.

³ Jayave Sarai omee jembiokuai Agar Egiptoɨgua ime Abram jembirekorä, payandepo año ma yogüɨreko reta Canaán pe yave.

⁴ Güɨreko, jare ipurúa chupe; jare jae oikuaa ipurúa ma yave omotareɨ omae iya kuña re.

⁵ Jayave Sarai jei Abram pe: —¡Nde teko renoi cheve Agar chemotareɨ vaerä! Che amee ndeve rereko vaerä, jare oikuaa ipurúa ma yave chemotareɨ omae cheré. YandeYa tojäa kuae teko ndegüi ani chegüi.

⁶ Abram jei Sarai pe: —Mase, ko nderembiokuai ndepo pe ko oï, eyapo chupe nde reipota vae. Jare Sarai güɨreko kaviä vae jeko pegua, Agar otekuarai chugüi.

⁷ Jare yandeYa iaraɨgua oväe chupe ñuu pe, ɨesaɨ oï tape tëta Shur kotɨ ojo vae pe,

⁸ jei chupe: —Agar, Sarai jembiokuai. ¿Ketɨ güi pa reyu jare ketɨ pa reo? Agar jei: —Atekuarai ko aiko cheya Sarai güi.

⁹ YandeYa iaraɨgua jei chupe: —Eyerova ye ekua ndeya kuña kotɨ, jare eiko jeia re.

¹⁰ Jei ye chupe: “Ambojetata neñemuña, ngaraa opa oyepapa jeta yae güi.

¹¹ Añave ndepurúa reï, oata jókuae nemembɨ jare rembojeeta Ismael. Echa yandeYa oendu ndepɨatɨtɨ.

¹² Jae kuimbae pochɨ yae vaerä ko, oñorarota opaete vae ndive jare opaete vae oñorarota jae ndive, jare jae oikota jëtara reta ndive, omotareɨ tëi reve.”

¹³ Jayave Agar ombojee yandeYa jae ndive imiari vae: “Nde jae Tumpa chereecha vae”, echa jei: “Tumpa chereecha jare aikoveño.”

¹⁴ Jáeramo ɨkua ombojee: “Oikove jare chereecha vae iɨkua.” Kuae ɨkua oï Cades jare Bered ipäu pe.

¹⁵ Agar imembɨ oa, Abram taɨ, jare ombojee Ismael.

¹⁶ Abram ochenta y seis año güɨnoi yave oa Ismael.