GÉNESIS 15 - Biblia Guarani Tumpa Iñee

Tumpa omeeta Abram taɨrä

¹ Opa kuaekuae reta oasa güire yandeYa oyeechauka Abram pe, jei reve chupe: —Agüɨye ekɨɨye Abram, che ko jae ndeyeopiaka. Mbaeyekou ndeparavɨkɨ jepɨgüe jeta yaeta.

² Jare Abram jei körai: —CheYa Tumpa, ¿maera pa remeeiñota cheve? Echa mbaetɨ ko cheraɨ, jare chero pe cherembiokuai opaete chembaembae iyangarekoa, jae ko Eliezer Damascoɨgua yoapɨ.

³ Abram jei ye: —Mbaetɨ ko remee cheñemuñarä, jare chembaembae opɨtata kuae cherembiokuai chero pe oa vae imbaerä.

⁴ Jayave yandeYa jei ye chupe: —Ngaraa ko kuae Eliezer oiko ndembaembae iyarä, nderaɨ etei ko oikota ndembaembae iyarä.

⁵ Güɨraja ikatu pe jare jei chupe: —Añave emae ara re jare eipapa yasɨtata reta ndepuere yave, jökoraita ko neñemuña reta.

⁶ Jayave Abram güɨrovia yandeYa, jókuae iporogüɨrovia rupi omae jese jupi.

⁷ Jei chupe: —Che ko ndeYa, rogüɨnoe tëta Ur güi Caldeaɨgua reta iɨvɨ güi vae, amee vaerä ndembaerä kuae ɨvɨ.

⁸ Abram jei: —¡CheYa! ¿Kërai pa chepuereta aikuaa kuae ɨvɨ chembae ko vae?

⁹ Jae jei chupe: —Eru emee cheve metei guaka taɨrusu vae mboapɨ año vae, jare metei kavara mboapɨ año vae, jare metei vecha kuimbae mboapɨ año vae, metei pɨkasui vi jare metei pɨkasutï taɨrusu vae.

¹⁰ Abram oipɨɨ opaete kuae; jare omboyao mbɨte mbɨte rupi, jare mbɨte ñavo omboyóvai yóvai oñono; ërei mbaetɨ omboyao güɨra reta.

¹¹ Jare chucha reta ogüeyɨ mɨmba reta omanogüe re, jare Abram omondo chugüi.

¹² Ërei kuaraɨ oa ma ojo yave Abram jopeɨ yae ma, jare jae ou okɨɨye pɨtumimbi yae vae güi.

Tumpa imiari Abram iñemuña reta regua

¹³ Jayave yandeYa jei Abram pe: —Añetete, neñemuña reta yogüɨrekota ɨvɨ ambuae pe, joko pe yogüɨreko retata tembiokuai oyeguagüe rami, jare oiporara retata cuatrociento año rupi.

¹⁴ Ërei jókuae tëtaguasu oiporaraukata chupe reta vae, che aiporaraukata vi chupe reta; kuae jaɨkue rupi oë reta yeta jeta mbaeyekou ndive.

¹⁵ Reota mbɨakatu pe neñemuñagüe reta ndive, jökorai reñeotɨukata nendechi yae ma yave.

¹⁶ Nerɨmɨmino reta jɨmɨmino reta oyerova yeta kuae kotɨ; echa kuae ara rupi amorreo reta ndeiño omondo ete mbatee imbaeyoa.

¹⁷ Jare kuaraɨ oike ma ojo yave, omboɨpɨ ma pɨ̈tu yave, oyekuaa metei horno jätati oï vae, jare metei tatasɨgüe jendɨ vae oasa mɨmba reta oyemboyaogüe mbɨte rupi.

¹⁸ Jókuae ara etei yandeYa oyapo morogüɨrökuavee päve Abram ndive, jei reve körai: —Neñemuña reta pe ameeta kuae ɨvɨ, ɨ̈aka Egipto pegua güive ɨ̈aka guasu kotɨ, ɨ̈aka Éufrates jee vae pe.

¹⁹ Ceneo reta, cenezeo reta, cadmoneo reta,

²⁰ heteo reta, ferezeo reta, refaita reta,

²¹ amorreo reta, cananeo reta, gergeseo reta jare jebuseo reta iɨvɨ.