GÉNESIS 14 - Biblia Guarani Tumpa Iñee

Abram oepɨ Lot

¹ Jókuae ara rupi oiko Amrafel mburuvicha Sinar pegua, Arioc mburuvicha Elasar pegua, Quedorlaomer mburuvicha Elam pegua jare Tidal mburuvicha Goim pegua.

² Kuae reta oñoraro mburuvicha Bera Sodoma pegua ndive, Birsa mburuvicha Gomorra pegua ndive, Sinab mburuvicha Adma pegua ndive, Semeber mburuvicha Zeboim pegua ndive jare mburuvicha Bela pegua ndive; kuae tëta Bela oyembojee vi Zoar.

³ Kuae pandepo mburuvicha oyomboatɨ ɨvɨtɨ päu ipe kavi vae Sidim pe, jae ko Ɨguasu Jembochɨ vae jembeɨ pe.

⁴ Doce año rupi oyeokuai reta mburuvicha Quedorlaomer pe, ërei trece añoa re etei oñemopüa reta ikotɨ.

⁵ Catorce añoa re ou mburuvicha Quedorlaomer jare opaete ïru mburuvicha reta omborɨ katu vae. Yogüeru reta ɨvɨ Astarot Karnaim jee vae kotɨ, jare joko pe omoamɨri Refaim pegua reta, jare Ham pe omoamɨri zuzita reta, Save-quiriataim pe omoamɨri reta emita reta;

⁶ jare ɨvɨtɨ Seir jee vae pe omoamɨri horeo reta, jare omoña reta ɨvɨpe kavi Parán pe oï vae kotɨ, kuae ko oï ɨvɨ ipombae vae jembeɨ pe.

⁷ Jare oyerova yogüeru reta tëta En-mispat jee vae kotɨ, kuae ko jee vi Cades. Joko pe opaetei omboai reta oeya Amalec reta iɨvɨ. Jaeramiño vi amorreo Hazezon-tamar pe yogüɨreko vae reta.

^8-9 Jayave oë reta mburuvicha Sodoma pegua, mburuvicha Gomorra pegua, mburuvicha Adma pegua, mburuvicha Zeboim pegua jare mburuvicha Bela pegua, kuae tëta ko jee vi Zoar. Joko pe kuae pandepo reta yogüeru oñeraro vaerä ɨvɨtɨ päu Sidim pe, jókuae irundɨ mburuvicha reta kotɨ, kuae reta ko jae: Quedorlaomer Elam pegua, Tidal Goim pegua, Amrafel Sinar pegua jare Arioc Elasar pegua.

¹⁰ Jókuae ɨvɨtɨ päu Sidim rupi jeta yae mbae ipomoasɨ ɨvɨ yasuru vae rami vae; jare mburuvicha Sodoma pegua jare Gomorra pegua isundaro reta ndive otekuarai tëi yave jovaicho reta güi oasavi pɨpe amogüe, ërei ïru reta otekuarai kaa kotɨ.

¹¹ Jare oporomoamɨri vae reta opa güɨraja jeta mbaembae jepɨ vae Sodoma güi jare Gomorra güi, jaeramiño vi opaetei güɨraja reta chugüi jembíu reta. Jökorai opa yogüɨraja reta ye jëta kotɨ.

¹² Jare Lot, Abram tɨvɨ taɨ Sodoma pe oiko vae, oipɨɨ vi güɨraja reta opaete imbaembae ndive.

¹³ Ërei metei kuimbae oasayepe jovaicho reta güi vae, ou omombeu vaerä hebreo Abram pe opaete mbaembae oasa vae regua; echa Abram oiko amorreo Mamre iɨvɨ pe ɨvɨra encinarupa pe; jare Mamre jae ko Escol jare Aner tɨkeɨ. Kuae kuimbae reta oñomoïru Abram ndive.

¹⁴ Abram oendu jiɨ oï tembipɨɨrä yave, omboatɨ opaete jemimbokuakuaa reta, jo pe oa vae reta, jare omee chupe reta tembiporu ñeraro pegua; opaete reve tresciento dieciocho kuimbae reta, jare oaɨkuemoña jiɨ ipɨɨa reta. Jare tëta Dan jee vae pe oupitɨ reta,

¹⁵ Jökorai Abram jare jembiokuai reta, iparanoe pɨ̈tu yave oë chupe reta, jare omboɨpɨ reta oñoraro. Mombɨrɨ tëta Hoba jee vae pe, Damasco güi ɨvɨtuguasu kotɨ oaɨkuemoña reta güɨraja oeya.

¹⁶ Jökorai Abram opɨ̈ro ye chugüi reta opaete mbaembae güɨrajagüe. Güeru ye vi jiɨ Lot, jare opaete imbaembae, kuña reta jare kuimbae reta.

Melquisedec iñee kavi Abram pe

¹⁷ Abram oyerova ye yave, omoamɨri güire mburuvicha Quedorlaomer jare ïru mburuvicha imborɨa reta. Mburuvicha Sodoma pegua oë oövaiti ɨvɨtɨ päu ipe kavi vae Save jee vae pe. Kuae ko jae mburuvicha iɨvɨpe kavi.

¹⁸ Jayave Melquisedec mburuvicha guasu Salem pegua, jae ko Tumpa Tuichagüe yae ete vae isacerdote güɨnoe mbɨyape jare vino.

¹⁹ Jare jei Abram pe körai: “Tumpa Tuichagüe yae ete vae ara jare ɨvɨ iyapoa tiporerekua nderé.

²⁰ Jare opaete vae reta tomboete Tumpa Tuichagüe yae ete vae, echa jae ko ndemborɨ remoamɨri nderovaicho reta.” Jayave Abram omee payandepo güi metei, jókuae opaete güeru ye vae güi Melquisedec pe.

²¹ Jaɨkue rupi mburuvicha Sodoma pegua jei körai Abram pe: —Aipota remee cheve opaete kuimbae reta reru ye vaeño, jare topɨta ndeveguarä opaete mbaembae.

²² Ërei Abram jei chupe: —Körai jae cheYa, Tumpa Tuichagüe yae ete vae jesa róvai, ara jare ɨvɨ iyapoa,

²³ mbaetɨta aipɨɨ mbae michi vae ave ndembaembae nderovaicho reta güi apɨ̈ro ye vae, inimbo yepe ani pɨapaa iïcha yepe, echa mbaetɨ aipota rere: “Che ko amboikokatu Abram.”

²⁴ Che mbaetɨ etei aipota mbaembae cheyeupeguarä, jaeño tembíu cheremimbokuakuaa reta jou ma vae. Ërei Aner, Escol jare Mamre, jae reta ipuere oipɨɨ iyeupe imbaerä vae.