GÉNESIS 13 - Biblia Guarani Tumpa Iñee

Abram jare Lot osɨrɨ oyougüi

¹ Abram oë Egipto güi, jare ojo ye ɨvɨ Neguev jee vae kotɨ jembireko ndive jare opaete imbaembae ndive. Jare jiɨ Lot vi ojo jupíe.

² Abram oikokatu yae ko, güɨnoi jeta oro, korepoti jare jeta mɨmba reta.

³ Jare Neguev güi ojo mbegüe mbegüe pe oväe ye tëta Bet-el jee vae kotɨ, jare joko güi ojo tenonde yave jo guakapi pegua güɨrekosea pe, tëta Bet-el jare Hai jee vae ipäu pe,

⁴ echa joko pe tenonde yave omopüa mɨmba oyeyuka oyeapɨ jese vae yandeYa peguarä; joko pe Abram oyerure ye yandeYa pe.

⁵ Lot oikokatu yae vi itutɨ Abram rami; güɨnoi vi jeta vecha, guaka reta jare jeta jembiokuai.

⁶ Ɨvɨ ñogüɨnoi pɨpe vae oupitɨä ma yogüɨreko päve vaerä meteia peño.

⁷ Jare Abram jɨmba iyangarekoa reta oñoraro reteiño ma Lot jɨmba iyangarekoa reta ndive. Jayave rupi, kuimbae cananeo reta jare ferezeo reta yogüɨreko vi jókuae ɨvɨ pe.

⁸ Jayave Abram jei Lot pe körai: “Ñañoëtara ko yande, mbaetɨ ikavi ñañoraro vaerä oyoupii aeño, mbaetɨ vi ikavi oñoraro vaerä yanderembiokuai reta.

⁹ ¿Mbaetɨ pa ɨvɨ tuicha? Añave, ikavi reiparavo kia pe reiko vaerä; eiko tee chegüi, nde reo yave ndeasu kotɨ, che taja ndeakatu kotɨ. Ërei nde reo yave ndeakatu kotɨ, jayave che taja ndeasu kotɨ.”

¹⁰ Lot omae yave oecha ɨvɨpe kavi ɨ̈aka Jordán jee vae iyɨ́vɨri, kuae ɨvɨ kavi ɨ katu, yandeYa oyapo arakae kó vae rami. Egipto pegua ɨvɨ rami. Kuae ɨvɨ kavi ojoi oya tëta raɨ Zoar re katu. YandeYa ndei opa omboai mbove tëta Sodoma jare Gomorra.

¹¹ Jayave Lot oiparavo iyeupe opaete kuae ɨvɨpe kavi ɨ̈aka Jordán iyɨ́vɨri rupigua. Jökorai Lot osɨrɨ itutɨ Abram güi, jare oyakavo kuaraɨ oëa kotɨ.

¹² Abram opɨta ɨvɨ Canaán pe, ërei Lot oñemoëta ɨvɨpe kavi pe tëta reta ñogüɨnoi vae rupi, jökorai ojoi oya tëta Sodoma re.

¹³ Ërei jókuae Sodoma pegua kuimbae reta jeko kaviä yae ete jare iyoa yae reta yandeYa kotɨ.

¹⁴ Jare Lot ojo güire, yandeYa jei Abram pe: “Emopüa neäka emae kuaraɨ oëa kotɨ jare kuaraɨ oikea kotɨ, jare emae ɨvɨtuguasu kotɨ jare arayevɨ kotɨ;

¹⁵ echa opaete kuae ɨvɨ remae reï jese vae ameeta ndeve jare neñemuña reta peguarä jekuae avei pegua.

¹⁶ Jare che jeta yaeta amoñemuña neñemuña reta, ɨvɨkúi jeta yae rami, mbaetɨta kia ipuere oipapa.

¹⁷ ¡Añave, epüa jare ekua emae kuae ɨvɨ ipukugüe re jare ipɨguasugüe re, echa ameeta ko ndeve!”

¹⁸ Jayave Abram oyupavo jare opa oekɨ güɨraja jo guakapi pegua, jare ou oñemoëta, kuimbae Mamre jee vae oikoa kotɨ, tëta Hebrón iyɨpɨ kotɨ. Joko pe omopüa mɨmba oyeyuka oyeapɨ jese vae yandeYa peguarä.