GÉNESIS 11 - Biblia Guarani Tumpa Iñee

O ɨvate yae vae Babel pe

¹ Jókuae ara rupi opaete vae ɨvɨ pegua reta imiarise metei vae ñee peño.

² Oyakavo reta yave kuaraɨ oëa kotɨ güi, oväe reta chupe metei ñuu kavi ɨvɨ Sinar jee vae pe, jare joko pe oñemoëta reta.

³ Jayave jei reta oyoupe: “Yayapo ladrillo jare yamboyɨ tata pe.” Jare jökorai ikavi yae chupe reta ladrillo, ita jekovia pe, jare mbae ipomoasɨ ɨvɨ yasuru rami vae oiporu reta tuyuapo jekovia pe.

⁴ Jayave jei reta: “Yayapo metei tëta guasu jare ñamopüa metei o ɨvate yeyé vae, ojo ara re oya vae; ñanerërakua vaerä güɨramoi opa yave ñañemoai moai ɨvɨ iárambo.”

⁵ Jare yandeYa ogüeyɨ omae vaerä tëta guasu re jare o ɨvate yeyé kuimbae reta oyapo ñogüɨnoi vae re,

⁶ jare jei: “Kuae reta metei ramiño, jare iñee reta metei ramiño vi; añave omboɨpɨ reta kuae mbaravɨkɨ jare ngaraa mbae omboavai reta kuae oyemongeta oyapo vaerä vae güi.

⁷ Añave, ikavi yagüeyɨ joko pe yamoambuae chugüi reta iñee, agüɨye vaerä ipuere oikuaa reta iñee oyoupe.”

⁸ Jökorai yandeYa opa omoai moai joko güi ɨvɨ iárambo rupi. Jare mbaetɨ ma ipuere opa oyapo reta jókuae tëta guasu.

⁹ Jáeramo kuae tëta jee Babel, echa joko pe yandeYa opa omoambuae opaete vae reta iñee, jökorai joko güi opa omoai moai ɨvɨ iárambo rupi.

Sem iñemuña regua

¹⁰ Kuae jae ko Sem iñemuña reta: Sem güɨnoi cien año yave oa chupe taɨ Arfaxad, mókoi año ma ɨporu guasu oasa güire.

¹¹ Sem oiko taɨ Arfaxad oa güire quiniento año, oa vi chupe taɨ reta jare tayɨ reta.

¹² Arfaxad güɨnoi treinta y cinco año yave oa chupe taɨ Sala.

¹³ Arfaxad oiko taɨ Sala oa güire cuatrociento tres año, oa vi chupe taɨ reta jare tayɨ reta.

¹⁴ Sala güɨnoi treinta año yave oa chupe taɨ Heber.

¹⁵ Sala oiko taɨ Heber oa güire cuatrociento tres año, oa vi chupe taɨ reta jare tayɨ reta.

¹⁶ Heber güɨnoi treinta y cuatro año yave oa chupe taɨ Peleg.

¹⁷ Heber oiko taɨ Peleg oa güire cuatrociento treinta año, oa vi chupe taɨ reta jare tayɨ reta.

¹⁸ Peleg güɨnoi treinta año yave oa chupe taɨ Reu.

¹⁹ Peleg oiko taɨ Reu oa güire dosciento nueve año, oa vi chupe taɨ reta jare tayɨ reta.

²⁰ Reu güɨnoi treinta y dos año yave oa chupe taɨ Serug.

²¹ Reu oiko taɨ Serug oa güire dosciento siete año, oa vi chupe taɨ reta jare tayɨ reta.

²² Serug güɨnoi treinta año yave oa chupe taɨ Nacor.

²³ Serug oiko taɨ Nacor oa güire dosciento año, oa vi chupe taɨ reta jare tayɨ reta.

²⁴ Nacor güɨnoi veintinueve año yave oa chupe taɨ Taré.

²⁵ Nacor oiko taɨ Taré oa güire ciento diecinueve año, oa vi chupe taɨ reta jare tayɨ reta.

²⁶ Taré güɨnoi setenta año yave oa chupe taɨ Abram, Nacor jare Harán.

Taré iñemuña reta

²⁷ Kuae jae ko Taré iñemuña reta: Taré taɨ jae ko Abram, Nacor jare Harán; jare Harán taɨ jae ko Lot.

²⁸ Jare Harán räri omano tu Taré güi, tëta Ur pe, Caldeaɨgua reta iɨvɨ pe. Harán joko pe oa jare joko pe vi omano.

²⁹ Abram jare Nacor opa omenda. Abram jembireko jee Sarai, jare Nacor jembireko jee Milca. Milca jare Isca tu jae ko Harán.

³⁰ Ërei ngatu Sarai mbaetɨ imembɨ, echa imembɨmbae ko.

³¹ Jare Taré oë tëta Ur güi, Caldeaɨgua reta iɨvɨ güi, ojo vaerä ɨvɨ Canaán jee vae kotɨ. Güɨraja jupíe taɨ Abram, jare jɨmɨmino Lot, jare taɨtatɨ Sarai. Ërei yogüɨraja ma oväe reta tëta Harán jee vae pe yave, joko pe opɨta reta oñemoëta.

³² Jare Taré omano tëta Harán pe, dosciento cinco año güɨnoi yave.