GÉNESIS 10 - Biblia Guarani Tumpa Iñee

Noé iñemuña reta

¹ Noé taɨ reta jae Sem, Cam jare Jafet; kuae reta iñemuña oa chupe reta ɨporu guasu oasa güire vae reta jae kuae.

² Jafet taɨ reta jae: Gomer, Magog, Madai, Javán, Tubal, Mesec jare Tiras.

³ Gomer taɨ reta jae: Askenaz, Rifat jare Togarma.

⁴ Javán taɨ reta jae: Elisa, Tarsis, Quitim jare Dodanim.

⁵ Kuae reta oñemoëta ɨguasu jembeɨ rupi tëtaguasu reta metei tëtara jare metei iñee pe imiari vae.

⁶ Cam taɨ reta jae: Cus, Mizraim, Fut jare Canaán.

⁷ Cus taɨ reta jae: Seba, Havila, Sabta, Raama jare Sabteca. Jare Raama taɨ reta jae: Seba jare Dedán.

⁸ Jare Cus pe oa taɨ Nimrod, jae ko tenondegua kuimbae imbaepuere yae ɨvɨ pe vae.

⁹ Kuae jäta ngatu jare ata regua yandeYa jóvai, jókuae jeko pegua jei vae: “Nimrod rami jäta ngatu jare ata regua yandeYa jóvai.”

¹⁰ Jae omboɨpɨ oporookuai tëta tuicha vae reta Babel, Erec, Acad jare Calne re, ɨvɨ Sinar pe.

¹¹ Kuae ɨvɨ güi oë oiko vaerä tëta Asiria jare oyapo tëta guasu Nínive, Rehobot, Cala,

¹² jare Resén tëta tuicha yae vae oï Nínive jare Cala ipäu pe.

¹³ Mizraim taɨ Ludim, Anamim, Lehabim, Naftuhim,

¹⁴ Patrusim, Casluhim, chugüi filisteo reta oñemuña, jare Caftorim.

¹⁵ Canaán taɨrɨpɨ jae ko Sidón jare Het jae vi taɨ.

¹⁶ Canaán güi oñemuña jebuseo, amorreo, gergeseo,

¹⁷ heveo, araceo, sineo,

¹⁸ arvadeo, zemareo jare hamateo. Jaɨkue rupi opa oñemoai Canaán iñemuña reta.

¹⁹ Cananeo iɨvɨ Sidón güive Gerar re katu, Gaza re ojo oya, jare Sodoma re katu, Adma jare Seboim, ojo oya Lasa re.

²⁰ Kuae ko jae Cam iñemuña reta, metei ñee pe imiari vae jare metei tëtara vae, iɨvɨ ae pe jëtaguasu ae ae pe.

²¹ Sem pe oa vi taɨ reta, jae ko Jafet tɨkeɨ, chugüi oñemuña opaete Heber taɨ reta.

²² Sem taɨ reta jae: Elam, Asur, Arfaxad, Lud jare Aram.

²³ Aram taɨ reta jae: Uz, Hul, Geter jare Mas.

²⁴ Arfaxad pe oa taɨ Sala, jare Sala pe oa taɨ Heber.

²⁵ Heber pe oa mókoi taɨ reta: Metei jee Peleg, echa jae iara pe ɨvɨ pegua reta oyemboyao oyougüi; jare tɨvɨ jee Joctán.

²⁶ Joctán taɨ reta jae: Almodad, Selef, Hazar-mavet, Jera,

²⁷ Adoram, Uzal, Dicla,

²⁸ Obal, Abimael, Seba,

²⁹ Ofir, Havila jare Jobab; opaete kuae reta jae ko Joctán taɨ reta.

³⁰ Jare ɨvɨ yogüɨreko pɨpe vae Mesa güive Sefar re katu; opaete ɨvɨtɨ kuaraɨ oëa kotɨgua.

³¹ Kuae ko jae Sem iñemuña reta metei ñee pe imiari vae jare metei tëtara vae, iɨvɨ ae pe jëtaguasu ae ae pe.

³² Kuae jae Noé iñemuña reta, kuae reta güi oñemoai opaete ɨvɨ re jare oyeapo tëtaguasu reta, ɨporu guasu oasa güire.