Gálatas 6 - Biblia Guarani Tumpa Iñee

Peyomborɨ mborɨ

¹ Cherɨvɨ reta, oime yave kia oyepokouka mbae ikavimbae vae oyapo yave vae, pe reta peguata kavi Tumpa kotɨ vae peñono kavi peñemomichi reve. Peyeandu reve, agüɨye vaerä pe vi peyapo mbae ikavimbae vae.

² Peyomborɨ mborɨ, pevoɨta ipoɨ vae re rami, jökorai pembopo Cristo iporookuai.

³ Ërei oime yave kia oyembotuicha vae mbaeä reve, oyembotavɨ ko.

⁴ Jayave, metei ñavo tomae kavi kërai mbae oyapo vae re, javoi ramo ipuere oyerovia iyé. Mbaetɨta ïru vae re.

⁵ Metei ñavo toyapo kavi iparavɨkɨ ae.

⁶ Tumpa iñee re oyemboe vae, tomee mbaembae güɨnoi vae güi imboea pe.

⁷ Agüɨye peyembotavɨ. Tumpa oyeyóyai yoyaiukambae ko. Echa metei ñavo oyapogüe, jókuae ko oarɨvota.

⁸ Echa kia oyapo yave isoo jemimbotaño, oarɨvota mano; ërei Espíritu Santo jemimbota oyapo vae, oarɨvota tekove opambae vae.

⁹ Jare agüɨye yandekuérai yayapo ikavi vae; echa mbaetɨ yandepɨtu yave, yaarɨvota iara pe.

¹⁰ Jáeramo yandepuere yave, yayapo ikavi vae opaete vae pe, ërei yambotenonde oporogüɨrovia vae reta.

Pablo oyemboete yandeYa Jesucristo ikurusu re

¹¹ Mase, tuicha ko kuae chepo pe etei aikuatía peve vae.

¹² Oipota oyemboeteuka ïru vae reta pe vae, oipota peyembocircuncida, agüɨye vaerä oiporara reta Cristo ikurusu jeko pegua.

¹³ Ërei jae reta etei oyapoä mborookuai jei vae, yepe tëi oyembocircuncidauka reta. Ërei oipota pe reta peyembocircuncidauka, jae reta oyemboete vaerä peré.

¹⁴ Ërei yandeYa Jesucristo ikurusu reño ayemboeteta. Jesucristo re arovia ramo, chevegua ɨvɨ pegua teko omano, jare chupegua che amano vi.

¹⁵ Echa Cristo Jesús re mbaeä ko yayembocircuncidauka vae ani mbaetɨ vae. Ikavi vae jae ko ñanoi vaerä tekove ipɨau vae.

¹⁶ Jare opaete kuae tekove ipɨau vae re yogüɨreko vae ndive toï Tumpa ipɨakatu jare iporoparareko, jare opaete Israel pegua reta Tumpa imbae vae ndive.

¹⁷ Añave güive agüɨye kia tachemoambeko. Echa cherete re anoi chepere reta vae oikuaauka, yandeYa Jesús jembiokuai ko che vae.

¹⁸ Cherɨvɨ reta, yandeYa Jesucristo ipɨakavi toï pe ndive. ¡Amén!