Gálatas 4 - Biblia Guarani Tumpa Iñee

¹ Jae vi peve kuae: Metei kuimbae mbae iyarä vae michia vɨteri ramboeve, oyovakeño ko metei tembiokuai ndive, yepe tëi jae opaete mbae iya.

² Echa imboea reta jare iyangarekoa reta güɨnoi mbaepuere jese, oupitɨ regua iaño tu jei chupe rami.

³ Jökoraiño vi yande tenonde yave mboromboe ɨvɨ pegua güɨnoi vi mbaepuere yanderé. Echa jayave yaikose michia rami.

⁴ Ërei ara oväe ma oyembopo vaerä yave, Tumpa ombou Taɨ. Jae oa kuña güi, mborookuai iara pe,

⁵ jae oepɨ vaerä mborookuai imbaepuere igüɨ pe ñogüɨnoi vae, yaiko vaerä Tumpa taɨ retarä.

⁶ Jare taɨ reta ma yaiko ramo, Tumpa ombou yandepɨa pe Taɨ iEspíritu. Jae jei: “CheRu, cheRu.”

⁷ Jáeramo yande reta mbaetɨ ma ko tembiokuai reta, taɨ reta ma ko. Jare taɨ reta ma yaiko ramo, Tumpa omee vae yandembae ma ko Cristo rupi.

Pablo omboarakuaa oporogüɨrovia vae reta

⁸ Añete ko, tenonde rupi mbaetɨ peikuaa Tumpa yave, peyeokuaise tumpambae reta pe.

⁹ Ërei añave peikuaa ma Tumpa, ani Tumpa pekuaa ma, jayave, ¿maera pa peyerova ye jókuae mboromboe ɨvɨ pegua paravete jare mbaeä etei vae kotɨ, peñeapɨti ye vaerä pɨpe?

¹⁰ Echa pemboarete peiko ara reta, yasɨ reta, arete reta jare año reta.

¹¹ Chepɨatɨtɨ yae peré, echa ayemongeta güɨramoi aparavɨkɨiño ma pepɨte pe.

¹² Cherɨvɨ reta, pomoñera peyapo vaerä che ayapo rami. Echa che ayeapo vi pe rami. Mbaetɨ etei mbae ikavimbae vae peyapo chekotɨ.

¹³ Echa pe reta peikuaa ko kërai chembaerasɨ jeko pegua tenonde yave amombeu peve ñee ikavi vae.

¹⁴ Jare mbaetɨ chereröɨro jare chemotareɨ chembaerasɨ tëi reve, ërei chemboresive kavi, metei Tumpa iaraɨgua rami, Cristo Jesús etei rami.

¹⁵ ¿Jama pa jókuae yerovia penoi yepi vae? Echa chepuere jae peregua kuae: Pepuere yave mona, peekɨta ko viña peresäɨ peyeugüi, pemee vaerä cheve.

¹⁶ ¿Añete vae jae peve vae rupi ayemboyovaicho ra pe ndive?

¹⁷ Jókuae pembojopa vae reta jägüɨro yae peré, ërei ikavi vae peguarää. Echa oipota pemombia oregüi, pe reta perägüɨro vaerä jese reta.

¹⁸ Ërei ikavi ko perägüɨro vaerä ikavi vae reño, mbaetɨ pépɨri aï yaveño.

¹⁹ Cheraɨ reta, jekuae oiporara ye peré, metei kuña imembɨrasɨ vae oiporara yae oï rami; Cristo etei oyekuaa regua peré.

²⁰ Aipotaecha aï pe reta ndive añave voi, agüɨye vaerä jökorai pomomiari, echa chepɨaä yae aï peré.

Oyembojaanga Agar jare Sara re vae

²¹ Pe reta peipota mborookuai jei vae pemomoe vae reta, pere cheve: ¿Mbaetɨ pa peendu mborookuai jei vae?

²² Echa oyekuatía oï kërai Abraham güɨnoi mókoi taɨ. Metei taɨ jae ko tembiokuai kuña rupi, jare ïru taɨ jae ko jembireko imembɨ.

²³ Jare jókuae tembiokuai kuña imembɨ oa kuimbae jemimbota rupi. Ërei jembireko imembɨ oa Tumpa iporogüɨrökuavee rupi.

²⁴ Jare kuae ko yembojaanga. Echa kuae kuña reta oyembojaanga jókuae mókoi morogüɨrökuavee päve re. Metei morogüɨrökuavee päve ko jae ɨvɨtɨ Sinaí re oñemee vae. Kuae ko oyembojaanga Agar re, jare iñemuña reta oa ko tembiokuai.

²⁵ Echa kuae Agar oyembojaanga ɨvɨtɨ Sinaí Arabia pegua re, jare oyembojaanga vi tëta guasu Jerusalén añave pegua re. Echa jókuae tëta guasu jare ipo reta tembiokuai reta ko.

²⁶ Ërei jókuae Jerusalén ara pegua, oyeokuaimbae ko. Jare jae ko yandesɨ.

²⁷ Echa Tumpa Iñee oyekuatía oï körai: “Imembɨmbae vae, eyerovia, nde mbaetɨi nemembɨ vae; esapúkai, eyerovia güi, nde mbaetɨ membɨrasɨ reiporara vae; echa kuña oyeeyagüe, jeta yaeta ko imembɨ, kuña ime ndive oï vae güi.”

²⁸ Jayave cherɨvɨ reta, yande ko Isaac oa morogüɨrökuavee rupi vae rami.

²⁹ Ërei jayave rupi kuimbae jemimbota rupi oa vae, oiporarauka jókuae Espíritu Santo imbaepuere rupi oa vae pe. Jökorai vi añave oyeapo yandeve.

³⁰ Ërei ¿mbae pa jei Tumpa Iñee?, jei ko: “¡Emombo kuae tembiokuai kuña jare imembɨ; echa tembiokuai kuña imembɨ ngaraa ko oiko päve mbaembae iyarä tembiokuaimbae vae imembɨ ndive!”

³¹ Jáeramo, cherɨvɨ reta, yande mbaetɨ ko jókuae tembiokuai kuña imembɨ rami. Yande ko jae jókuae kuña oyeokuaimbae vae imembɨ rami.