Gálatas 3 - Biblia Guarani Tumpa Iñee

Mborookuai ani mborogüɨrovia

¹ Galaciaɨgua reta, iyarakuaambae reta. ¿Kia pa pembotavɨ kavi yae, agüɨye vaerä perovia añete vae? Echa roechauka kavi yae ma peve, kërai Jesucristo oyekutu kurusu re vae.

² Kuaeño aipota pemombeu vaerä cheve: ¿Pemboresive pa Espíritu Santo, mborookuai jei vae peyapo vae rupi?, ani ¿ñee ikavi vae peendu yave perovia vae rupi?

³ ¿Mbaetɨ etei pa ko pearakuaa? Pemboɨpɨ güire Espíritu rupi, jare añave peyerova ye jókuae pereko tenondegua pe.

⁴ ¿Peiporaraiño ma pa jeta mbaembae jayave? ¡Mbae mona agüɨye peiporaraiño!

⁵ Tumpa omee peve Espíritu Santo vae, jare oyapo mɨakañɨ reta pepɨte pe vae. ¿Oyapo pa kuae mbaembae mborookuai jei vae peyapo vae rupi, ani ñee ikavi vae peendu yave peporogüɨrovia vae rupi?

⁶ Jökorai vi Abraham güɨrovia Tumpa re, jókuae iporogüɨrovia rupi omae jese jupi.

⁷ Jáeramo, peikuaa mborogüɨrovia güɨnoi vae reta ko jae Abraham iñemuña reta rami.

⁸ Tumpa Iñee pe jei voi kërai Tumpa ombojupiukata iporogüɨrovia rupi judiombae vae reta ramo, omombeu voi ñee ikavi vae Abraham pe, jei reve: “Ndereko pegua opaete ɨvɨ pegua reta oyekouta.”

⁹ Jáeramo, Tumpa iporerekua oporogüɨrovia vae reta re, Abraham re iporerekua rami.

¹⁰ Echa opaete oyeko oyembojupi vaerä mborookuai jei vae rupi vae reta, ñogüɨnoi ko yepopeyu igüɨ pe. Echa oyekuatía oï körai: “Tijeko opaete mbaetɨ omboete ani mbaetɨ oyapo kuae mborookuai reta jeigüe vae.”

¹¹ Echa oyekuaa kavi ko, kërai mbaetɨ metei ave ipuere oyembojupiuka Tumpa jóvai mborookuai jei vae oyapo vae rupi. Echa oyekuatía oï körai: “Tumpa ombojupi vae güɨnoita tekove oporogüɨrovia ramo.”

¹² Jare mborookuai mbaetɨ ko mborogüɨrovia pegua. Echa oyekuatía oï körai: “Kuaekuae oyapo vae, oikoveta jókuae re.”

¹³ Ërei Cristo yandereepɨ ma mborookuai iyepopeyu güi, echa jae oyemboekouka yanderekovia pe. Echa oyekuatía oï körai: “Tijeko ɨvɨra re osagüɨu omano vae.”

¹⁴ Abraham pe Tumpa güɨrökuavee vae oupitɨ vaerä Cristo Jesús rupi judiombae reta, jare yande ñanoi vaerä Espíritu mborogüɨrovia rupi.

¹⁵ Cherɨvɨ reta, tachemiari peve kuae ɨvɨ pe mbae oyeapo vae re: Ɨvɨ pegua reta morogüɨrökuavee päve oyapo oyoupe yave, ngaraa ye ma kia omboai, ngaraa vi kia ipuere omoïru ye.

¹⁶ Jáeramo Tumpa güɨrökuavee omee vaerä Abraham jare iñemuña pe. Mbaetɨ jei: “Neñemuña reta”, jeta vae re rami. Imiari metei reño, jei: “Neñemuña.” Jókuae jae ko Cristo.

¹⁷ Jáeramo che jae peve kuae: Tumpa tenonde oyapo morogüɨrökuavee päve Abraham ndive Cristo regua vae, mbaetɨ omboai mborookuai cuatrociento treinta año oasa ma yave ramo ou vae.

¹⁸ Echa Tumpa güɨrökuavee vae oñemee yave mona mborookuai rupi, morogüɨrökuaveeä ma ko; ërei Tumpa omee ko Abraham pe morogüɨrökuavee rupi.

Mbaerä oñemee mborookuai vae

¹⁹ Jayave ¿mbaerä pa ikavi mborookuai? Omoïru vi ko mbaeyoa reta jeko pegua, ou regua jókuae Abraham iñemuña Tumpa güɨrökuavee vae. Jókuae mborookuai oñemee ñee imboasaa Moisés pe araɨgua reta rupi.

²⁰ Jare ñee imboasaa mbaetɨ ko oyeokuai metei peño, ërei Tumpa ko meteiño.

²¹ Jayave, ¿oyovaicho ra mborookuai Tumpa iñererökuavee kotɨ? ¡Mbaetɨ ko! Echa mborookuai omee yave mona tekove, añetete ko mborookuai oporombojupita tëi.

²² Tumpa Iñee pe jei rami, opaete vae iyoa vae ko, ërei oñemeeta Jesucristo re güɨrovia vae reta pe, Tumpa güɨrökuavee vae.

²³ Ërei ndei yaporogüɨrovia mbove, yaiko yepi mborookuai imbaepuere pe, tembipɨɨrɨru pe yaiko rami, Tumpa oikuaauka regua yarovia vaerä Jesucristo re.

²⁴ Jáeramo mborookuai yandeangarekoa rami ko, yandereraja vaerä Cristo pe, yandembojupi vaerä mborogüɨrovia rupi.

²⁵ Ërei yaporogüɨrovia ma yave, mbaetɨ ma yaiko yandeangarekoa ipo pe,

²⁶ echa opaete pe reta Tumpa taɨ reta ko, perovia Cristo Jesús re vae rupi;

²⁷ echa opaete Cristo re peyembobautisa vae, peyemonde ma rami ko Cristo pe.

²⁸ Mbaetɨ ma ko judío ani judiombae vae; mbaetɨ ma tembiokuai ani tembiokuaimbae vae, kuimbae ani kuña. Echa Cristo Jesús re opaete pe reta metei ramiño ko.

²⁹ Pe reta Cristo imbae ko yave, Abraham iñemuña ma ko pe reta, jare pembae ko jókuae Tumpa güɨrökuavee Abraham pe vae.