Gálatas 2 - Biblia Guarani Tumpa Iñee

¹ Kuae jaɨkue rupi, catorce año oasa ma güire, aja ye Jerusalén pe Bernabé ndive, jare araja vi Tito cherupíe.

² Aja, Tumpa oechauka cheve ramo, jare amombeu kavi chupe reta jókuae ñee ikavi vae amoërakua judiombae vae reta pe vae. Ërei chemiari tenondegua reta peño oikuaa kavi reta vaerä, aipotaä ramo cheparavɨkɨ okañɨtei.

³ Jare mbaetɨ Tito che ndive oï vae ave ombocircuncida reta, yepe tëi jae griego ko,

⁴ jare yepe tëi amogüe oporogüɨrovia raanga vae reta oike vɨari orepɨte pe, orepïaro vaerä kërai ra Cristo oreyora mborookuai güi vae rupi roiko vae, echa oipota roiko ye vaerä mborookuai re.

⁵ Ërei mbaetɨ etei roñemaeño jese reta, echa roipota jekuaeño penoi vaerä ñee ikavi vae añetete vae.

⁶ Ërei jókuae tenondegua reta mbaetɨ etei omombeu mbae ipɨau vae cheve (mbaetɨ mbae cheve tenonde güive ma yogüɨreko reta vae, echa Tumpa mbaetɨ ko oporomboyoavɨ).

⁷ Ërei jae reta oikuaa ma Tumpa omee ko cheve amoërakua vaerä ñee ikavi vae judiombae vae reta pe, Pedro pe oñemee omoërakua vaerä ñee ikavi vae judío reta pe rami.

⁸ Echa Tumpa oñono Pedro oiko vaerä jemimondorä judío reta peguarä. Jae vi cheñono aiko vaerä jemimondorä judiombae vae reta peguarä.

⁹ Jáeramo oporogüɨrovia vae reta itenondegua Jacobo, Cefas jare Juan oikuaa reta kërai Tumpa ko omee cheve kuae mbaravɨkɨ. Jare oechauka vaerä ore ko jae jae reta iñeïru vae, orepopɨɨ che jare Bernabé; rojo vaerä judiombae vae reta pɨri jare jae reta yogüɨraja vaerä judío reta pɨri.

¹⁰ Jaeño jei reta oreve oremaendúa vaerä iparavete vae reta re. Jókuae che ayapoño mai chekɨ̈reɨ reve vae.

Pablo omboeta Pedro pe Antioquía pe

¹¹ Ërei Pedro ou yave Antioquía pe, amboeta chupe etei, ikavimbae oyapo vae re.

¹² Echa amogüe judío reta Jacobo jemimbou reta ndei yogüeru mbove, Pedro okaruñoi judiombae vae reta ndive. Ërei yogüeru ma yave, Pedro mbaetɨ ma okaru judiombae vae reta ndive, jare oyembosɨrɨ chugüi reta, echa okɨɨye judío reta güi.

¹³ Jare ïru judío reta vi oyemboe Pedro jeko re, jare Bernabé vi oyererajauka chupe reta, oyapo vaerä jae reta oyapo rami.

¹⁴ Jáeramo aecha yave mbaetɨ oyapo jupi rupi ñee ikavi vae jei vae rami, jae Pedro pe opaete vae jovake: “Nde ko judío, ërei reiko judiombae vae reta yogüɨreko rami, mbaetɨ reiko judío rami. Jáeramo, ¿maera pa reipota judiombae vae reta yogüɨreko judío reta rami?”

¹⁵ Yande ko judío yandesɨ güi yaa rupive voi vae, judiombae vae reta ipɨte pe ikavimbae vae oyapo vaeä ko yande,

¹⁶ yaikuaa ko ngaraa kia ipuere oyembojupiuka mborookuai jei vae oyapo vae rupi. Jaeño ipuere oyembojupiuka güɨrovia yave Jesucristo re. Jáeramo yande vi yarovia ma Jesucristo re yayembojupiuka vaerä mborogüɨrovia rupi Cristo re, mbaetɨ ko mborookuai jei vae yayapo vae rupi, echa jókuae rupi ngaraa kia ave oyembojupiuka.

¹⁷ Jare yande vi yayembojupiuka Cristo rupi yave, yaecha yande vi yepe jae iyoa vae, jayave ¿Cristo jae ra mbaeyoa pe oyeokuai vae? ¡Mbaetɨ ko!

¹⁸ Echa amopüa ye yave jókuae amboaigüe, ayemboeko ko.

¹⁹ Mborookuai rupi ko che amano, mborookuai peguarä, aikove vaerä Tumpa peguarä.

²⁰ Cristo ndive ko che ayekutu kurusu re, jáeramo mbaetɨ ma aikove, jaeño Cristo oikove chepɨa pe. Jare añave aikove aiko ramboeve, aiko mborogüɨrovia Tumpa Taɨ re anoi vae re. Echa jae cheraɨu, jare jae aeño oñemee omano vaerä cheré.

²¹ Mbaetɨ aröɨro Tumpa ipɨakavi; echa mborookuai jei vae rupi yandepuere yayembojupi yave, Cristo omanoiñota ma ko.