Filipenses 4 - Biblia Guarani Tumpa Iñee

Peyerovia katu avei yandeYa re

¹ Jáeramo, cherɨvɨ poaɨu vae reta, aipota yae poecha vae reta, ayerovia peré vae reta, cheparavɨkɨ jekovia reta, peñemomɨ̈rata avei yandeYa re.

² Amoñera Evodia jare Síntique yogüɨreko kavi vaerä oyoupi yandeYa re.

³ Jare che romoñera, nde cheparavɨkɨ ïru ete, remborɨ vaerä kuae kuña reta. Echa jae reta oparavɨkɨ täta che ndive, romombeu vaerä ñee ikavi vae. Oparavɨkɨ reta Clemente ndive jare ïru che ndive oparavɨkɨ vae reta ndive vi. Kuae reta jee oñemoapɨta ma tupapire tekove pegua pe.

⁴ Peyerovia katu avei yandeYa re. ¡Peyerovia katu avei!

⁵ Pepɨakavi toikuaa opaete vae. YandeYa ou yeta ete ma ko.

⁶ Agüɨye etei peyemoambaeko mbae re, jaeño peyerure Tumpa pe opaete mbaembae re, pemee reve yasoropai chupe.

⁷ Jare Tumpa omeeta peve ipɨakatu yandepuereä etei yaikuaa vae; jókuae mbɨakatu oñovatuta pepɨa jare peyemongeta Cristo Jesús re.

Peyemongeta kuae re

⁸ Jare añave cherɨvɨ reta, peyemongeta opaete mbae añetete vae re, opaete mbae jaekavi vae re, opaete mbae jupi vae re, opaete mbae ikɨambae vae re, opaete mbae ikavi vae re, jare opaete mbae yandepuere ñanemiari kavi jese vae re. Peyemongeta opaete ikavi vae jare mbaemboete pegua re.

⁹ Peyemboe vae, pemboresive vae, peendu jare peecha cheré vae peyapo. Jare Tumpa oporombopɨakatu vae oïta pe ndive.

Filipoɨgua reta mbota ombou Pablo pe vae

¹⁰ Ayerovia yae yandeYa re peré, pembou ye ma chemborɨ vae re. Añete ko, jekuaeño pemaendúa avei cheré, jaeño mbaetɨ jëgua peve chemborɨ vaerä.

¹¹ Mbaetɨ ko kuae jae mbae oata cheve ramo. Echa aikuaa ma kërai aiko vaerä chepɨakatu reve anoi rupi.

¹² Aikuaa kërai aiko vaerä, mbae oata yave. Aikuaa vi kërai aiko vaerä, jeta mbae anoi yave. Aikuaa ma kërai aiko vaerä opaete pegua, aiko vaerä cheangapɨɨ reve ani cheyɨmbɨaɨ reve; aikuaa ma kërai aiko vaerä, jeta mbaembae anoi yave ani oata mbaembae cheve yave.

¹³ Opaete chepuere ayapo Cristo re, echa jae chemomɨ̈rata.

¹⁴ Ërei, peyapo ma ikavi vae cheve, chemborɨ ma aiporara aï yave.

¹⁵ Jare pe Filipoɨgua reta, peikuaa vi kërai ñee ikavi vae amboɨpɨ amombeu yave, aja Macedonia güi yave, mbaetɨ yé ïru oporogüɨrovia vae reta chemborɨ, jaeño pe reta.

¹⁶ Echa Tesalónica pe aiko yave ave, pembou chemborɨ vaerä mbovɨ yé.

¹⁷ Mbaetɨ ko aeka mbota, jaeño aipota vae jae ko jeta Tumpa omboekovia vaerä peve.

¹⁸ Ërei che opaete mbaembae amboresive. Mbaetɨ mbae oata cheve. Echa amboresive ma Epafrodito güi pembou cheve vae. Jókuae pembou vae metei mbota ipiche katu vae oñemee Tumpa pe vae rami ko. Jókuae omboyerovia Tumpa vae.

¹⁹ Jáeramo, cheRu Tumpa omeeta peve opaete mbaembae oata peve vae, Cristo Jesús re jeta mbaeyekou güɨnoi vae rupi.

²⁰ ¡YandeRu Tumpa toyemboeteuka jekuaekuae avei rupi! ¡Amén!

Tamaraeme reta

²¹ Tamaraeme toñogüɨnoi opaete Cristo Jesús re güɨrovia vae reta. Yanderɨvɨ reta che ndive ñogüɨnoi vae vi omondo tamaraeme peve.

²² Jaeramiño vi opaete oporogüɨrovia vae reta omondo peve tamaraeme. César pe oyeokuai vae reta etei vi omondo peve tamaraeme.

²³ YandeYa Jesucristo ipɨakavi toï opaete pe reta ndive. ¡Amén!