Filipenses 3 - Biblia Guarani Tumpa Iñee

Ñemoäta ngatu avei regua

¹ Jare añave cherɨvɨ reta, peyerovia yandeYa re. Mbaetɨ etei chekuérai amboaɨkuere ye aikuatía peve, echa ikavi ko peveguarä.

² Peyeandu jókuae yaɨmba reta güi, peyeandu oporomboe kavimbae reta güi, peyeandu oporombocircuncida vae reta güi.

³ Echa yande ko jae añetete oyembocircuncida vae reta, echa yande yamboete Tumpa Espíritu rupi, mbaetɨ etei yayeko yandesoo pe oyeapo vae re.

⁴ Yepe tëi che oime anoi mbae re ayeko vaerä. Oime yave kia oyemongeta mbae re oyeko vaerä iyé vae, che ko ayapɨraa yé reta:

⁵ Ayembocircuncidauka juri ara ma anoi yave, che ko Israel iñemuña pegua, Benjamín iñemuña pegua, hebreo taɨ añetegüe vae, che ko fariseo mborookuai jei vae oyapo vae,

⁶ cherägüɨro ramo ayapo yepi ikavimbae vae Cristo re güɨrovia vae reta pe. Mbaetɨ kia ipuere chemboeko mbae re, echa aiko jupi rupi mborookuai jei rami.

⁷ Opaete kuaekuae tuichagüe yae yepi cheve, ërei añave mbaetɨ etei mbae cheve Cristo aaɨu jeko pegua.

⁸ Jökoraiño vi opaete ïru mbaembae mbaeä etei cheve cheYa Cristo Jesús aikuaa vae jeko pegua. Jae aaɨu vae jeko pegua mbaeä etei jare ɨtɨ rami ko cheve opaete mbaembae, amongana vaerä Cristo,

⁹ jare oñeväe vaerä jae imbae ko che. Mbaetɨ aipota ayembojupi mborookuai jei vae ayapo vae rupi, jaeño Cristo re arovia vae rupi; jae ko yembojupi Tumpa güi mborogüɨrovia rupi.

¹⁰ Aipota ko aikuaa kavi Cristo. Aipota anoi jókuae mbaepuere Cristo oikove ye vae pegua. Aiporara yave, aipota aikuaa aiporara ko Cristo jeko pegua, chekɨ̈reɨ amano Cristo omano rami.

¹¹ Aäro reve aikove ye vaerä omanogüe reta ipɨte güi.

¹² Kuae mbaetɨ ko oipota jei, aupitɨ ma ko opaete mbae, ani jupi kavi yae ma che. Ërei añemoäta ngatu avei ko aupitɨ vaerä, echa jokuaerä Cristo Jesús chepɨɨ.

¹³ Cherɨvɨ reta, che etei mbaetɨ ayemongeta aupitɨ ma ko; ërei ayapo vae jae ko cheakañɨ oasagüe güi, jare añejäa aupitɨ vaerä cherenonde oï vae.

¹⁴ Jáeramo añemoäta ngatu avei, aupitɨ vaerä Tumpa omeeta cheve Cristo Jesús rupi vae.

¹⁵ Jáeramo, opaete ñanepɨ̈rata ma vae yayemongeta jökorai. Ërei mbaetɨ peyemongeta jökorai yave, Tumpa oechaukata peve.

¹⁶ Ërei yaiko avei yaikuaa ma vae re. Yayemongeta metei ramiño.

¹⁷ Cherɨvɨ reta, peiko che aiko rami. Jare pemae vi jókuae yogüɨreko ore roiko peróvai vae rami vae reta re.

¹⁸ Echa oime jeta yogüɨreko oyovaicho reve Cristo ikurusu kotɨ vae. Jeta vese ma amombeu peve kuae reta regua, jare añave amombeu ye peve cheresaɨ reve;

¹⁹ kuae reta opata ko okañɨtei, jae reta ombotenonde ikavi chupe reta vaeño, oyembotuicha reta imarata tëi jese vae re. Oyemongeta reta mbaembae kuae ɨvɨ pegua reño.

²⁰ Ërei ñanerëta ara pe ko oï, jare ñaäro ñaï joko güi ou vaerä Yandemboasa vae, jae ko yandeYa Jesucristo,

²¹ jae oipoepɨta yanderete kuae ɨvɨ pe ñanoi vae jae jete iyemboetea yae vae rami vae pe. Oyapota kuae, mbaepuere güɨnoi opaete mbaembae re vae rupi.