Filipenses 2 - Biblia Guarani Tumpa Iñee

Cristo iñemomichi jare iyembotuicha

¹ Jáeramo, Cristo pemoäta ngatu jare pembopɨakatu yave, jare metei rami peï Espíritu Santo rupi yave, peyoaɨu jare peyoparareko yave,

² peiko oyoupi metei rami, peyoaɨu, jare peiko metei ramiño. Körai peyapo yave, ayerovia yaeta ko.

³ Agüɨye mbae peyapo peyovaicho vaerä oyoe. Agüɨye mbae peyapo peyembotuicha reve; ërei opaete mbaembae peyapo peñemomichi reve, metei ñavo tomae ïru vae re tuichagüe re rami;

⁴ agüɨye tomae iyé aeño, toyemoambeko vi ïru vae reta re.

⁵ Peyemongeta oyokotɨ, Cristo Jesús oyemongeta rami.

⁶ Echa yepe tëi jae ko Tumpa etei. Ërei jae mbaetɨ oyeko jókuae re,

⁷ ërei jae oeya jare oyeapo kuimbaerä, oyeapo tembiokuairä.

⁸ Jare kuimbaerä oyeapo ma yave, oñemomichi yeti, oyapo Tumpa jei vae omano regua, omano kurusu re.

⁹ Jáeramo, Tumpa ombotuicha yae opaete güi, jare omee chupe tee tuichagüe yae opaete ïru tee reta güi vae,

¹⁰ opaete ara pe ñogüɨnoi vae reta, jare opaete ɨvɨ pe ñogüɨnoi vae reta, jare opaete ɨvɨgüɨ pe ñogüɨnoi vae reta oyetavatɨka Jesús jee re,

¹¹ jare opaete vae jei vaerä Jesucristo ko jae opaete vae iYa. Kuae rupi yandeRu Tumpa oyemboete vaerä.

Oporogüɨrovia vae reta tembipe rami ko

¹² Jáeramo, cherɨvɨ poaɨu vae reta. Peyapo avei che jae peve peyapo vaerä vae rami, peyapo yepe tëi añave mbaetɨ aï pe ndive. Peñemoäta ngatu yae yemboasa penoi vae rupi peipoɨu pemboete reve;

¹³ echa Tumpa etei omee peve kɨ̈reɨ jare peyapo vaerä, jae jemimbota rupi.

¹⁴ Opaete peyapo vae peyapo peñeengurumbae reve jare peñorarombae reve.

¹⁵ Agüɨye vaerä kia ave pemboeko mbae re. Peiko Tumpa taɨ ikɨambae vae, kuae oporogüɨroviambae vae reta jeko ikavimbae yae vae reta ipɨte pe. Kuae reta ipɨte pe peiko tembipe rami kuae ɨvɨ pe,

¹⁶ peiko reve ñee tekove opambae vae re, ayerovia vaerä Cristo ou ye yave, kërai che mbaetɨ aguataiño ani aparavɨkɨiño.

¹⁷ Yepe tëi güɨramoi cherugüɨ oyepɨyereta vi, mbota vino oyepɨyere mbaemɨmba oyeyukagüe iárambo rami, ërei jeseve ayerovia ko opaete pe reta ndive.

¹⁸ Pe reta pevɨakatu jare peyerovia vi che ndive.

Timoteo jare Epafrodito

¹⁹ YandeYa Jesús oipota yave, amondota ɨmambaeño Timoteo pépɨri, che vi chepɨakatu vaerä aikuaa yave peregua.

²⁰ Echa mbaetɨ yé ko kia oyemongeta jare oyemoambeko peré che ndive vae.

²¹ Echa opaete vae oyemoambeko iyé aeño, mbaetɨ oyemoambeko Cristo Jesús iparavɨkɨ re.

²² Ërei peikuaa ko kërai Timoteo jeko, kërai jae oyeokuai Tumpa pe che ndive cheraɨ ete ramiecha, ñee ikavi vae romombeu vaerä.

²³ Jáeramo, jae aipota amondo kuri, aikuaa yave mbae ra oyeapota cheve;

²⁴ ërei ayeko yandeYa re, che vi ajata pépɨri kuri.

²⁵ Ërei jaekavi cheve amondo vaerä cherɨvɨ Epafrodito. Jae ko oparavɨkɨ Tumpa pe che ndive vae, pe pembou oyangareko vaerä cheré vae.

²⁶ Jae oipota yae pereecha, jare ipɨatɨtɨ yae, echa jërakua peve kërai jae imbaerasɨ vae.

²⁷ Añete ko, imbaerasɨ yae. Omano seri; ërei Tumpa mbaetɨ jaeño oiparareko, che vi cheparareko. Agüɨye vaerä chepɨatɨtɨ yeyé chepɨatɨtɨ ma vae güi.

²⁸ Jáeramo amondo pekotɨ chekɨ̈reɨ ngatu reve, peyerovia vaerä, peecha ye yave, jare agüɨye vaerä chepɨatɨtɨ yae aï.

²⁹ Pemboresive kavi yandeYa re peyerovia reve. Jekuaeño peaɨu jae rami vae reta,

³⁰ echa Cristo iparavɨkɨ jeko pegua omano seri. Oñemoëgua mano pe oyangareko vaerä cheré perekovia pe, echa pe reta matɨ peï.