Filipenses 1 - Biblia Guarani Tumpa Iñee

Tamaraeme

¹ Che Pablo jare Timoteo Jesucristo jembiokuai reta, roikuatía opaete peporogüɨrovia vae Cristo Jesús re jare petenondegua reta jare oporomborɨ vae reta Filipo pe peiko vae pe.

² YandeRu Tumpa jare yandeYa Jesucristo ipɨakavi jare ipɨakatu toï pe ndive.

Pablo oyerure Tumpa pe oporogüɨrovia vae reta re

³ Amee avei yasoropai Tumpa pe chemaendúa peré ñavo;

⁴ ayerure peré ñavo, ayerure ayerovia reve;

⁵ echa pe reta jekuaeño peiko ñee ikavi vae pe peendu güive añave regua.

⁶ Aikuaa katu, Tumpa omboɨpɨ ma oyapo metei mbaravɨkɨ ikavi vae pepɨa pe vae, jae etei ko jekuaeñota oyapo Jesucristo ou ye regua.

⁷ Jupi ko ayemongeta vaerä körai peré, echa poaɨu yae. Tembipɨɨrɨru pe aï yave, ayeepɨ aï yave jare ñee ikavi vae amoañete aï yave, opaete pe reta vi ko peï che ndive.

⁸ Echa Tumpa oikuaa kërai che poaɨu yae ko, Jesucristo iporoaɨu rupi etei.

⁹ Jare ayerure Tumpa pe okuakuaa avei vaerä ojo peporoaɨu peikuaa katu reve jare pearakuaa katu reve,

¹⁰ peikuaa vaerä peiparavo ikavi vae, peiko kavi vaerä, agüɨye vaerä kia pemboeko Cristo ou ye regua;

¹¹ ayerure jekuaeño peyapo vaerä mbaembae ikavi vae jupi vae pegua Jesucristo rupi, Tumpa oyemboeteuka vaerä.

Chevegua tekove jae ko Cristo

¹² Cherɨvɨ reta, aipota peikuaa vaerä kërai oyeapo cheve vae omborɨ ko oñemoai vaerä ñee ikavi vae.

¹³ Echa opaete sundaro mburuvicha guasu jo pegua reta jare opaete ïru vae reta oikuaa kërai che kuae tembipɨɨrɨru pe aï Cristo pe ayeokuai ramo.

¹⁴ Jare jeta yanderɨvɨ reta oñemoäta ngatu yandeYa kotɨ, oikuaa reta tembipɨɨrɨru pe oyeapo cheve vae ramo. Jare jae reta jei ete omombeu Tumpa iñee okɨɨyembae reve.

¹⁵ Añete ko, amogüe vae omombeu Cristo regua iyakatúä cheré güi, jare oyemboyovaicho chekotɨ güi. Ërei ïru vae reta omombeu ikɨ̈reɨ ngatu güi.

¹⁶ Jókuae oyemboyovaicho chekotɨ vae reta omombeu Cristo regua oipota jei ete oiporarauka cheve tembipɨɨrɨru pe aï ramboeve, mbaetɨ añetete rupi.

¹⁷ Ërei ïru vae reta omombeu Cristo regua, cheraɨu ramo. Echa oikuaa reta kërai Tumpa cheñono kuae pe, aikuaauka vaerä ïru vae reta pe ñee ikavi vae Tumpa pegua ko.

¹⁸ Ërei jaekaviño ko. Echa yepe tëi jökorai reve omombeu reta ko Cristo regua, jókuae chemboyerovia. Jare jekuaeñoi ko ayeroviata,

¹⁹ echa aikuaa opaete kuae ikavita ko cheve ayeyora vaerä, pe reta peyerure cheré ramo, jare Jesucristo iEspíritu chemborɨ ramo.

²⁰ Körai oyeapota che aäro vae, echa jekuaeño aipota aiko chemarambae reve. Aipota aiko akɨɨyembae reve Cristo oyemboeteuka vaerä cherupi, aikove vae rupi ani amano vae rupi.

²¹ Echa chevegua tekove jae ko Cristo, jare mano ko jae ikavi vae.

²² Ërei aikoveño vae jaekavita aparavɨkɨ vaerä Tumpa pe yave, ¡mbaetɨ ma aikuaa mbae aiparavo vaerä!

²³ Mókoi reve jaekavi yae cheve: Aipota amano, Cristo ndive aï vaerä, echa jókuae ikavi yaeta ko cheve.

²⁴ Ërei ikavi vi aikoveño vaerä, pomborɨ vaerä.

²⁵ Aikuaa katu ko jekuaeño apɨtata räri pomborɨ vaerä, peñemomɨ̈rata vaerä peporogüɨrovia re peyerovia reve;

²⁶ jare pe reta pemboete yae vaerä Cristo Jesús cherupi, che aï ye yave pe ndive.

²⁷ Jaeño peiko kavi, echa perovia ma ñee ikavi vae Cristo regua. Güɨramoi aja apou pépɨri ani mbaetɨ, ërei aipota perërakua kavi cheve, kërai peñemomɨ̈rata metei ramiño jare peñemoäta ngatu peporogüɨrovia ñee ikavi vae re vae,

²⁸ jare agüɨye pekɨɨye oyovaicho pekotɨ vae reta güi. Echa kuae oechauka jae reta ko kañɨtei peguarä, ërei peve ko yemboasa peguarä; kuae ko ou Tumpa güi.

²⁹ Echa Tumpa ko omee peve Cristo re, mbaetɨ perovia jese vaeräño, peiporara vaerä vi jese,

³⁰ jáeramo peiporara peï, chereecha aiporara rami, jare añave peikuaa kërai ko aiporara vae.