Filemón 1 - Biblia Guarani Tumpa Iñee

Tamaraeme

¹ Che Pablo, Jesucristo jembipɨɨ jare yanderɨvɨ Timoteo, roikuatía kuae tupapire ndeve, oreparavɨkɨ ïru roaɨu vae Filemón,

² jare vi yandereindɨ yaaɨu vae Apia jare yandeparavɨkɨ ïru Arquipo pe, jare opaete oporogüɨrovia vae reta ndero pe oyemboatɨ vae pe.

³ YandeRu Tumpa jare yandeYa Jesucristo ipɨakavi jare ipɨakatu toï pe ndive.

Filemón iporoaɨu jare iporogüɨrovia

⁴ Amee yasoropai Tumpa pe chemaendúa avei reve cheyerure rupi nderé,

⁵ echa jërakua cheve mboroaɨu jare mborogüɨrovia nde renoi yandeYa Jesús kotɨ jare opaete oporogüɨrovia vae reta kotɨ vae.

⁶ Ayerure vi nde remoërakua ndeporogüɨrovia vae, reikuaa kavi vaerä opaete mbae ikavi vae Cristo Jesús rupi ñanoi vae.

⁷ Royerovia yae jare orepɨakatu ndeporoaɨu re, echa nde cherɨvɨ rembopɨakatu oporogüɨrovia vae reta.

Pablo omoñera Filemón, Onésimo re

⁸ Jáeramo che jupi ko royókuai vaerä tëi Cristo jee re mbae reyapo vaerä.

⁹ Ërei mboroaɨu reve romoñera; che chendechi ma ko, jare añave Jesucristo jembipɨɨ;

¹⁰ romoñera cheraɨ Onésimo re. Echa jae ayapo ma cheraɨrä yandeYa re tembipɨɨrɨru pe aï ramboeve.

¹¹ Tenonde yave Onésimo tembiokuai kaviä ndeve. Ërei añave tembiokuai kavi ma ko yandeve.

¹² Jare amondo ye ndeve, emboresive, che etei chemboresive rami.

¹³ Echa aipota tëi viña amombɨta che ndive, jae oyeokuai vaerä cheve ndepoepɨka pe, kuae tembipɨɨrɨru pe aï ramboeve ñee ikavi vae jeko pegua.

¹⁴ Ërei mbaetɨ ayapo jökorai mbaetɨ aikuaa ndeyemongeta ramo; aipota reyapo vaerä ikavi vae cheve nekɨ̈reɨ ngatu reve, mbaetɨ royókuai güiño.

¹⁵ Güɨramoi Onésimo osɨi ndegüi michi pegua, nde renoi ye vaerä jekuae avei pegua;

¹⁶ ërei mbaetɨ ma metei tembiokuai rami, tembiokuai oasa ete ye ikavi vae ma ko; emboresive yanderɨvɨ yaaɨu vae rami. Che aaɨu ko, jaeramiño vi nde reaɨu yaeta ko, mbaetɨta kia yaaɨu vae ramiño, yaaɨu ete kavi yandeYa re.

¹⁷ Jáeramo, nde remae cheré neïru ko yave, emboresive kavi nde chemboresive rami.

¹⁸ Jae oyapo yave ikavimbae vae ndeve ani ipía yave ndeve mbae re, che tamboepɨ.

¹⁹ Chepo pe etei aikuatía ndeve kuae. Che tamboepɨ ndeve. Ërei chepuere romomaendúa kërai nde ndepía vi cheve ndeyé.

²⁰ Añete ko, cherɨvɨ, eyapo kuae ikavi vae cheve yandeYa re. Chembopɨakatu yandeYa re.

²¹ Aikuatía körai ndeve, aikuaa katu nde reyapota ko che jae ndeve vae ramo. Aikuaa katu vi reyapota ko jeta yae che jae ndeve vae güi.

²² Romoñera vi reyapokatu vaerä cheve apɨta pepɨ vaerä. Echa arovia pe reta peyerure Tumpa pe cheré vae rupi ajata pépɨri.

Tamaraeme reta

²³ Epafras, cheïru tembipɨɨ rɨru pe Cristo re vae omondo tamaraeme ndeve.

²⁴ Jare chemborɨ vae reta Marcos, Aristarco, Demas jare Lucas omondo ndeve tamaraeme.

²⁵ YandeYa Jesucristo ipɨakavi toï nde ndive. ¡Amén!