EZEQUIEL 7 - Biblia Guarani Tumpa Iñee

Tumpa iporojäa iara

¹ YandeYa jei cheve körai:

² “Nde kuimbae, che ndeYa jae ɨvɨ Israel kotɨ körai: Oväe ma ara iyapɨ, ou ma oväe opaetei ɨvɨ iyapɨ vaerä.

³ Israel, jae ma iyapɨ ndeve, ambouta nderé chearasɨ, rojäata ndereko reta oï rupi, jare aiporaraukata ndeve opaete ikavimbae reyapo vae re.

⁴ Mbaetɨta cheɨ̈ro ndeve, mbaetɨta roparareko; aiporaraukata ndeve opaete ndereko reta, jare ikavimbae yae reyapo vae re. Jayave pe reta chekuaata che ko peYa vae.

^5-6 Che peYa Tumpa jae körai: Köiño ma ou iyapɨ vaerä ndeve, jare oyoaɨkue yoaɨkue outa susere ndeve; köiño ma ou iyapɨ vaerä ndeve.

⁷ Ou oväe kañɨtei, kuae ɨvɨ pe peiko vae reta pe, ou oväe ara, köiño ma oï jókuae yembokepegua iara, mbaetɨta yerovia katu reta ɨvɨtɨ reta rupi.

⁸ Añave voi jaema aitɨta chearasɨ nderé, chepɨakatu apɨta regua, rojäata ndereko reta oï rupi, jare aiporaraukata ndeve opaete ikavimbae reyapo vae re.

⁹ Mbaetɨta cheɨ̈ro ndeve, mbaetɨta roparareko; aiporaraukata ndeve opaete ndereko oï rupi, jare ikavimbae yae reyapo vae re. Jayave pe reta chekuaata che ko jae peYa aiporarauka peve vae.

¹⁰ ¡Mase, ko ma oï ara! ¡Ou ma oväe kañɨtei!, ikavimbae oï oipota rupi, oasa ete ma pepɨarai.

¹¹ Tekorai oyekuaa, joko güi oë ikavimbae. Ërei jae reta ngaraa oasayepe, chugüi reta jare imbaeyekou reta ave ngaraa oasayepe; mbaetɨta kia ave oäpiro vaerä.

¹² Oväe ma ara. Oyembaegua vae ani oñemaemee vae mbaetɨta ma jaekavi. Echa oväe ma ara, aiporarauka vaerä chearasɨ rupi Israel pegua reta pe.

¹³ Mbae omee vae, ngaraa ma ou ye ipo pe, yepe tëi oikoveño, ngaraa ma ipuere omboai jókuae omee vae regua. Jupimbae reta ngaraa ipuere güɨroasayepe jekove.

¹⁴ Omoñee reta mimbɨguasu oporoenɨi vaerä ñeraro pe, oyupavo retata, ërei mbaetɨ eteita kia oë oñeraro vaerä. Echa chearasɨ oï opaete vae reta re.

¹⁵ Tëta guasu güi ikatu pe oime ñeraro, jare japɨpe pe mbaerasɨ ovakatu vae jare karuai. Ikatu rupi ñogüɨnoi vae omanota ñeraro pe, tëta guasu japɨpe ñogüɨnoi vae reta karuai jare mbaerasɨ ovakatu vae oyukata.

¹⁶ Amogüe oasayepe vae reta otekuaraita ɨvɨtɨ kotɨ, pɨkasu ɨvɨtɨ päu ipe kavi vae rupigua okɨɨye güi otekuarai rami, opaete vae omanota, güɨroäse retata iyoa.

¹⁷ Opaete vae iyɨva jëogüeta jare itava ipuere potaä.

¹⁸ Oyemonde retata temimonde mbɨatɨtɨ pegua pe, okɨɨye yae retata, opaete re oyekuaata mara, jare ia oñapiasɨ retata.

¹⁹ Omombo retata ikorepoti kaye rupi, jare ioro omombota ɨtɨ rami. Ërei ioro ani ikorepoti ave ngaraa güɨroasayepe chearasɨ güi. Ngaraa osirive chupe reta omoangapɨɨ vaerä ani omoɨ̈vɨata vaerä, echa jókuae korepoti jare oro jeko pegua ko oa reta mbaeyoa pe.

²⁰ Oyembotuicha reta, mbaembae jepɨ ipöra vae güɨnoi reta vae rupi; jókuae mbaembae jepɨ ipöra vae pe oyapo reta itumpa-raangarä ikavimbae yae vae. Jáeramo che aipoepɨta ɨtɨrä jókuae reta.

²¹ Ambouta ketɨgua reta opa vaerä opɨ̈ro chugüi reta, jare jeko kavimbae reta kuae ɨvɨ rupigua opata güɨraja chugüi reta, mbaetɨ eteita omboete reta.

²² Che asɨrɨta chugüi reta, jare amaeñota omboeteä vaerä chero. Omaepɨ̈ro vae reta oiketa jare omongɨa retata.

²³ Eñono kavi karena, echa kuae ɨvɨ pe jeta oporoyuka vae, jare tëta guasu pe jeta teko-pɨ̈chɨi.

²⁴ Ambouta ipɨapochɨ yae vae reta ïru tëtaguasu reta güi, jae reta yogüɨrekota o reta tëta guasu pegua pe. Ipɨayemboete vae reta imbaepuere amboapɨta chugüi; jare jae reta imbaemboetea ikɨata cheróvai opɨta.

²⁵ Kañɨtei outa, oeka reta tëita vɨakatu, ërei ngaraa oväe chupe reta.

²⁶ Oyoaɨkue yoaɨkueta ou mbaesusere; mbae ikavimbae jërakua vae jaeramiño vi. Oeka reta tëita ñeemombeúa omombeu kavi vaerä chupe reta, sacerdote reta mbaetɨta oporomboe ani tenondegua vae reta mbaetɨta vi oporomboarakuaa.

²⁷ Mburuvicha guasu omondeta temimonde mbɨatɨtɨ pegua, jare mburuvicha ipɨatɨtɨta, jare opaete vae reta okɨɨyeta. Jae reta jeko oï rupi aiporaraukata chupe reta, jare ajäa retata jae reta oporojäa rami. Jökorai chekuaa retata che ko jae iYa.”