EZEQUIEL 47 - Biblia Guarani Tumpa Iñee

Ɨ oporombogüera vae

¹ Jare jókuae kuimbae jekuae chemboyerovauka ye tupao jöke kotɨ. Jayave aecha ɨ oë öke igüɨ güi, kuaraɨ oëa kotɨ, echa tupao omae oï kuaraɨ oëa kotɨ. Ɨ oë igüɨ kotɨ güi, tupao iyakatu kotɨ güi, mɨmba oyeyukagüe oyeapɨ jese vae güi arayevɨ kotɨ.

² Javoi cherenoe öke ɨvɨtuguasu kotɨgua rupi, jare chereroyere öke güi ikatu rupi, tape kuaraɨ oëa kotɨ omae vae pe; jare aecha ɨ oë tupao iyakatu kotɨ güi.

³ Jókuae kuimbae oë kuaraɨ oëa kotɨ, güɨraja reve ipo pe metei tɨmasa; jare ojäa quiniento metro jare chemboasauka jókuae ɨ rupi; jókuae ɨ oväe chepɨñúa rupi.

⁴ Javoi jekuae ojäa ye quiniento metro jare chemboasauka ye jókuae ɨ rupi; añave jókuae ɨ oväe chetava rupi ma. Jekuae ojäa ye quiniento metro jare chemboasauka jókuae ɨ rupi, jare añave jókuae ɨ oväe chekúa rupi ma.

⁵ Jekuae ojäa ye quiniento metro, jare ɨ oyeapo metei ɨ̈aka rami, che mbaetɨ ma chepuere aasa, echa ɨ tuicha yae ma, mbaetɨ ma yandepuere jökoraiño yaasa, jaeño yaɨtai reve.

⁶ Jayave jei cheve: “Emae kavi kuae reecha vae re.” Chereraja, jare chemboyerova ye ɨ̈aka jembeɨ rupi,

⁷ ayu aiko ramboeve aecha ɨ̈aka jembeɨ rupi jare jovaicho jembeɨ rupi jeta yeyé ɨvɨra.

⁸ Javoi jei cheve: “Kuae ɨ ojo kuaraɨ oëa kotɨ, ogüeyɨta Arabá kotɨ jare ojota Ɨguasu Jembochɨ vae pe; joko pe oa ojo yave, jókuae ɨguasu ikavita yau vaerä.

⁹ Kuae mókoi ɨ̈aka ojo oväea rupi oñemuña jevae ɨ rupigua; oimeta jeta yeyé jevae ɨ rupigua, kuae ɨ oväe joko pe jeko pegua, echa ɨ kavi opata ombokavi ɨ ikavimbae, jare oikoveta opaete kuae ɨ̈aka pe oike vae.

¹⁰ Jókuae ɨ̈aka jembeɨ rupi ñogüɨnoita oyeporaka vae reta, En-gadi güive ojoita oväe En-eglaim pe, jokoropi vi omotini retata ipɨsa. Joko pe oimeta jeta yeyé jevae ɨ rupigua ambuaeyee yé oyougüi vae, Ɨguasu Mediterráneo jee vae pe jeta rami.

¹¹ Ërei iɨvɨasuru reta jare iɨupa reta ngaraa opɨta ɨ kavirä; opɨtata yukɨ jendarä.

¹² Ɨ̈aka jembeɨ jovaicho icho rupi okuakuaata oipotagüe ɨvɨra oime ia vae, mbaetɨta osururu joo reta jare ia aveita. Jarembae mbae iata, echa tupao güi ɨ oë vae omoäkɨta. Iagüe ikavita oyeu vaerä jare joogüe moarä.

Ɨvɨ jembeɨ regua

¹³ Che peYa Tumpa jae körai: Köraita ko ɨvɨ jembeɨ pejäa oyoupe, doce ñemuña Israel iñemuña peiko vae. José togüɨnoi mókoi yemboyao.

¹⁴ Penoita pembaerä metei rami, che añererökuavee cheree re ae amee vaerä peñemuñagüe reta pe vae. Jáeramo kuae ɨvɨ pembaerä ko.

¹⁵ Kuae ko jae ɨvɨ jembeɨrä ɨvɨtuguasu kotɨ rupi; Ɨguasu Mediterráneo jee vae güive oasata tëta guasu Hetlón rupi, jare oasata tëta Zedad,

¹⁶ Berota, Sibraim rupi, ɨvɨ Damasco jare ɨvɨ Hamat ipäu pe tëta reta ñogüɨnoi vae; jare Hazar-haticón rupi, jae ko ɨvɨ Haurán jembeɨ pe.

¹⁷ Jökorai ɨvɨ jembeɨ ɨvɨtuguasu kotɨgua oyemboɨpɨta Ɨguasu Mediterráneo jee vae güive tëta guasu Hazar-enán pe oväe regua; ɨvɨ Damasco jare ɨvɨ Hamat jembeɨ pe; kuae ɨvɨ reta opɨta reve ɨvɨtuguasu kotɨ chugüi.

¹⁸ Ɨvɨ jembeɨ kuaraɨ oëa kotɨgua, oyemboɨpɨta Haurán jare Damasco ipäu kotɨ güi; ɨ̈aka Jordán rupi, jae ko Galaad jare ɨvɨ Israel ipäu rupi; jökorai ojoita oväe Ɨguasu Jembochɨ vae pe. Kuae ko jae ɨvɨ jembeɨ kuaraɨ oëa kotɨgua.

¹⁹ Ɨvɨ jembeɨ arayevɨ kotɨgua oyemboɨpɨta Tamar güive ɨ yoaka pegua pe oväe regua; Cades jare ɨ̈aka Egipto rupi, Ɨguasu Mediterráneo pe oväe regua. Kuae ko jae ɨvɨ jembeɨ arayevɨ kotɨgua.

²⁰ Ɨvɨ jembeɨ kuaraɨ oikea kotɨgua, Ɨguasu Mediterráneo jee vae oïta ɨvɨ jembeɨrä, Hamat jóvai ojo oväe regua. Kuae ko jae ɨvɨ jembeɨ kuaraɨ oikea kotɨgua.

²¹ Körai pemboyao kuae ɨvɨ peyeupe doce ñemuña ñavo Israel iñemuña reta peiko vae.

²² Pemboyao ɨvɨ pembaerä suerte rupi, jare ketɨgua reta pepɨte pe yogüɨreko vae, imichia oa pepɨte pe vae reta pe vi. Pereko vi perëtaɨgua rami. Ɨvɨ pemboyao pembaerä suerte rupi yave, jökorai jae reta toike vi suerte rupi pepɨte pe, güɨnoi reta vaerä vi iɨvɨrä.

²³ Metei ñemuña vae ipɨte pe oiko ketɨgua yave, joko pe pemee chupe ɨvɨ jae imbaerä. Che peYa jae jökorai.