EZEQUIEL 43 - Biblia Guarani Tumpa Iñee

YandeYa iyemboetea omotɨnɨe tupao

¹ Javoi jókuae kuimbae chereraja öke kuaraɨ oëa kotɨ omae vae pe,

² jare aecha Israel iTumpa iyemboetea ou kuaraɨ oëa kotɨ güi. Jɨapu oyeendu ɨ tuicha yae vae jɨapu rami, jare ɨvɨ jembipe Tumpa iyemboetea oyekuaa jeko pegua.

³ Jókuae aecha vae, jae ko yandeYa ou omboai Jerusalén yave oyekuaa rami jare ɨ̈aka Quebar jembeɨ pe oyekuaa cheve rami; jare ayetavatɨka chetindɨasɨ reve ɨvɨ re,

⁴ jare yandeYa iyemboetea oike tupao pe, öke kuaraɨ oëa kotɨgua rupi.

⁵ Jayave Tumpa Imbaepuere chemopüa, jare chereraja oka michi vae pe, jare aecha Tumpa iyemboetea omotɨnɨe tupao.

Mborookuai reta tupao pegua

⁶ Jare aendu tupao japɨpe kotɨ güi chemomiari vae; jare jókuae chereraja vae oyemboɨ oï cheɨpɨ pe,

⁷ jare jei cheve: “Nde kuimbae, kuae ko jae cheguapɨka mborookuaía pegua jenda, chepɨ amombutuúa; kuae pe aikota Israel iñemuña reta ipɨte pe jekuae avei rupi. Ngaraa ye ma Israel iñemuña reta omongɨa cheree ikɨambae, jae reta jare juvicha guasu reta teko pɨ̈chɨi oyapo reta vae rupi, juvicha guasu reta omano yave ave ngaraa ma omopüa reta iägüe.

⁸ Omopüa reta jo kavi reta yave, omopüa reta chero iyɨpɨ pe etei, jaeño ete metei ovapetea oï mbɨte pe oreve oremboyao vaerä. Jae reta omongɨa cheree ikɨambae, pɨ̈chɨi vae oyapo reta vae rupi; jáeramo opa amokañɨtei reta chearasɨ yae rupi.

⁹ Ërei añave tomombo reta mombɨrɨ chegüi jeko pɨ̈chɨi reta jare juvicha guasu reta jëogüegüe, jare aikota jae reta ipɨte pe jekuae avei pegua.

¹⁰ Nde kuimbae, nemiari Israel iñemuña reta pe kuae tupao reechagüe re, jare kërai oñejäa oï vae re, imara reta vaerä iyoa güi.

¹¹ Imara reta yave opaete mbae oyapogüe güi, eikuaauka chupe reta kërai kuae tupao oñejäa oï vae, opaete mbaembae japɨpe pegua reta, jöke reta ñaë jare yaike jupi vae, jare opaete kërai vae, jaeramiño vi mborookuai reta oyapo retata vae. Eikuatía tupao iä chupe reta, oikuaa reta vaerä kërai oyapo. Eikuatía chupe reta opaete mborookuai reta, ipuere vaerä oyapo reta.

¹² Kuae ko jae mborookuai tupao pegua: Opaete ɨvɨ tupao iyɨ́vɨri oï vae, ɨvɨtɨ iyapɨte re oï vae, oñeñono tee kavi yae vae ko.”

Mɨmba oyeyuka oyeapɨ jese vae

¹³ Kuae ko jae mɨmba oyeyuka oyeapɨ jese vae kërai oñejäa oï vae, tenondegua rupi oñejäa rami etei. Iguapɨka iyɨ́vɨri güɨnoi medio metro ipɨ̈koe vae, jökorai vi güɨnoi ipɨgüe; kuae güɨnoi ikupe rupi, iyɨ́vɨri rupi opüa veinticinco centímetro jembeɨ regua. Mɨmba oyeyuka oyeapɨ jese vae jae körai:

¹⁴ Iguapɨka güive, ikúa rupigua jembeɨ pe güɨnoi metei metro ɨvategüe, jare ipɨgüe güɨnoi medio metro. Jare jembeɨ regua michi vae güive tuicha vae kotɨ güɨnoi mókoi metro, jare ipɨgüe medio metro.

¹⁵ Mɨmba oyeyuka oyeapɨ jese vae güɨnoi mókoi metro ɨvategüe. Iárambo ekina ñavo güɨnoi irundɨ guakarätiecha vae.

¹⁶ Mɨmba oyeyuka oyeapɨ jese vae güɨnoi irundɨ iyɨke oyovake päve vae, ova metro pukugüe jare ova metro vi ipɨgüe.

¹⁷ Mɨmba oyeyuka oyeapɨ jese vae oguapɨ jese vae irundɨ iyɨke oyovake päve vi, chiu metro pukugüe jare chiu metro vi ipɨgüe. Iyɨ́vɨri rupi ɨvɨkua oï vae güɨnoi medio metro ipɨgüe jare jembeɨ regua opüa vae güɨnoi veinticinco centímetro ipɨgüe. Mɨmba oyeyuka oyeapɨ jese vae regua yeupika oï kuaraɨ oëa kotɨ.

¹⁸ Javoi yandeYa jei cheve: “Nde kuimbae, kuae ko jae yeokuai, mɨmba oyeyuka oyeapɨ jese vae oñemopüa yave oyeapo vaerä: Oyeapɨta jese mɨmba oyeyukagüe opaetei oyeapɨ vaerä vae jare oñeapiramota jese tugüɨ.

¹⁹ Sacerdote reta Leví iñemuña pegua, Sadoc iñemuña reta, yogüeru chekotɨ oyeokuai reta vaerä cheve yave, emee jese reta metei toro taɨrusu vae mɨmba reta güi, cheɨ̈ro vaerä mbaeyoa re vae.

²⁰ Emboɨru jugüɨgüe jare eñapiramo mɨmba oyeyuka oyeapɨ vae re guakarätiecha vae reta re, jare irundɨ ekina re jare jembeɨ regua iyɨ́vɨri rupi. Jökorai reitɨota opaete mbaeyoa güi.

²¹ Javoi eipɨɨ toro taɨrusu vae cheɨ̈ro vaerä mbaeyoa re vae, jare eapɨ tupao güi ikatu pe, mborookuai jei rami etei.

²² Mokoía ara pe emee metei kavara kuimbae jete kavi vae, cheɨ̈ro vaerä mbaeyoa re, jökoraita oyetɨo mɨmba oyeyuka oyeapɨ jese vae, toro taɨrusu vae pe oyetɨo rami.

²³ Opa yave reyapo, emee metei toro taɨrusu vae jare metei vecha kuimbae jete kavi vae mɨmba reta güi.

²⁴ Emee cheve, jare sacerdote reta topɨyere yukɨ jese reta jare toapɨ reta mɨmba oyeyukagüe opaetei oyeapɨ vae cheve.

²⁵ Chiu ara rupi tomee reta mɨmba oyeyuka oyeapɨ vae, ara ñavo tomee reta cheɨ̈ro vae mbaeyoa re vae, jaeramiño vi toyuka reta tomee toro taɨrusu vae jare vecha kuimbae jete kavi vae mɨmba reta güi.

²⁶ Chiu ara rupi toyapo reta cheɨ̈ro vaerä mbaeyoa re vae, mɨmba oyeyuka oyeapɨ jese vae regua, jare jökorai oñeñono teeta cheveguarä.

²⁷ Chiu ara opa oasa güire, juri araa güi jenonde kotɨ, sacerdote reta tomee jókuae mɨmba oyeyuka oyeapɨ jese vae re mɨmba oyeyukagüe opaetei oyeapɨ vae jare mbota reta yembopɨakatu pegua. Jare che chepɨakatuta peré. Che peYa Tumpa jae kuae.”