EZEQUIEL 42 - Biblia Guarani Tumpa Iñee

O reta tupao iyɨke pegua

¹ Javoi cherenoe tupao joka tuicha vae pe ɨvɨtuguasu kotɨ, jae ko tupao ikupe kotɨ oï vae o güi ɨvɨtuguasu kotɨ oï o vae pe,

² kuae o ɨvɨtuguasu kotɨgua öke kotɨ güɨnoi cincuenta metro pukugüe jare veinticinco metro ipɨgüe.

³ Tupao joka michi vae kotɨ oï vae, güɨnoi payandepo metro, jare cuarto reta ñogüɨnoi piso ita pegua tupao joka tuicha vae jóvai vae, mboapɨ yoarambo oyóvai ñogüɨnoi.

⁴ Jare cuarto reta jóvai oï metei korero pandepo metro pukugüe japɨpe kotɨ vae, jare medio metro ipɨgüe, jare cuarto reta jöke omae ɨvɨtuguasu kotɨ.

⁵ Jare cuarto reta ɨvate ete ñogüɨnoi vae ipɨmii, mbɨte pegua güi, jare mbɨte pegua ipɨmii vi igüɨ pe ete cuarto reta ñogüɨnoi vae güi.

⁶ Echa mboapɨ yoarambo oñesɨro jare mbaetɨ güɨnoi jokɨta reta cuarto reta tupao joka pe ñogüɨnoi vae rami; jáeramo ipɨmii ɨvategua ete mbɨte pegua güi, mbɨte pegua ipɨmii vi ɨvɨkotɨgua ete güi.

⁷ Jare oguambɨ oï ikatu pe vae, cuarto reta jóvai vae, tupao joka tuicha vae kotɨgua güɨnoi veinticinco metro pukugüe.

⁸ Echa cuarto reta tupao joka tuicha vae kotɨgua güɨnoi veinticinco metro pukugüe, jare tupao ikupe jóvai kotɨgua güɨnoi cincuenta metro.

⁹ Jare ɨvɨkotɨgua ete cuarto reta pe oï öke yaikea; jae ko tupao joka tuicha vae kuaraɨ oëa kotɨgua güi yaike vaerä pɨpe.

¹⁰ Tupao joka tuicha vae jóvai arayevɨ kotɨ, oñekëse vae re, oime vi cuarto reta.

¹¹ Jare korero reta oyovake, cuarto reta ñogüɨnoi ɨvɨtuguasu kotɨ vae ikorero ndive; pukugüe jare ipɨgüe oyovake; jare öke yaike jare ñaë jupi vae oyovake vi.

¹² Jökoraiño vi cuarto reta jöke arayevɨ kotɨgua, güɨnoi metei öke, korero oyemboɨpɨa pe, tupao ikësea kuaraɨ oëa re katu, jokoropi kia oike cuarto reta pe yave peguarä.

¹³ Jare jei cheve: “Cuarto reta ñogüɨnoi ɨvɨtuguasu kotɨ jare arayevɨ kotɨ, ipombaea jóvai vae, cuarto reta oñeñono tee vae ko. Joko pe sacerdote reta oyeokuai yandeYa pe vae jouta mbota reta oñeñono teegüe; joko pe toñono reta mbota reta oñeñono tee vae, mbota reta ñɨ̈ro pegua, jare mɨmba oyeyuka oyeapɨ mbaeyoa regua vae, echa kuae cuarto reta oñeñono tee vae ko Tumpa peguarä.

¹⁴ Sacerdote reta oike tupao pe yave, agüɨye toë reta joko güi oka tuicha vae pe jemimonde sacerdote pegua ndive, jókuae jemimonde oyeokuai Tumpa pe jae ndive vae, echa oñeñono tee Tumpa peguarä vae ko; toyemonde jemimonde ae pe, oë vaerä jeta vae reta ñogüɨnoia pe.”

Tupao iɨvɨ oñejäa

¹⁵ Opa ojäa tupao japɨpe yave, cherenoe öke kuaraɨ oëa kotɨgua rupi, jare ojäa opaete iyɨ́vɨri rupi.

¹⁶ Ojäa iyɨke kuaraɨ oëa kotɨgua, güɨnoi dosciento cincuenta metro.

¹⁷ Ojäa vi iyɨke ɨvɨtuguasu kotɨgua, güɨnoi vi dosciento cincuenta metro.

¹⁸ Ojäa vi iyɨke arayevɨ kotɨgua, güɨnoi vi dosciento cincuenta metro.

¹⁹ Oyere iyɨke kuaraɨ oikea kotɨ, ojäa, güɨnoi dosciento cincuenta metro.

²⁰ Irundɨ iyɨke reve ojäa opaete oguambɨ tupao ikësea, güɨnoi dosciento cincuenta metro pukugüe, jare dosciento cincuenta metro ipɨgüe, omboyao vaerä mbaemboete renda oïa, opaete vae reta güi.