EZEQUIEL 41 - Biblia Guarani Tumpa Iñee

¹ Javoi chereroike tupao pe, jare ojäa okɨta reta, güɨnoi ipɨguasugüe mboapɨ metro jare jovaicho kotɨ jaeramiño vi, jökorai ipɨgüe tupao.

² Öke ipɨgüe güɨnoi pandepo metro, iyɨke ñavo güɨnoi mókoi metro y medio ipɨgüe; opaete reve tupao japɨpe pukugüe güɨnoi veinte metro jare ipɨgüe güɨnoi payandepo metro.

³ Jare oasa tupao jugua pegua cuarto kotɨ, jare ojäa öke jokɨta reta; okɨta ñavo güɨnoi metei metro yandambusugüe jare mboapɨ metro y medio ipegüe; öke güɨnoi mboapɨ metro ipɨgüe.

⁴ Ojäa vi jókuae cuarto ipɨgüe jare pukugüe opaete reve, güɨnoi payandepo metro päve. Jare jei cheve: “Jae ko kuae tupao japɨpe oñeñono tee kavi yae ete vae.”

Cuarto reta oï tupao joguambɨ re vae

⁵ Jaɨkue rupi ojäa tupao joguambɨ ikatu rupi, mboapɨ metro güɨnoi. Jare cuarto reta oï jókuae oguambɨ re, güɨnoi mókoi metro ipɨgüe, oyere tupao joguambɨ re.

⁶ Kuae cuarto reta ñogüɨnoi tupao joguambɨ re vae, mboapɨ ñesɨro oyoarambo ñogüɨnoi; ñesɨro ñavo oï treinta cuarto, tupao joguambɨ oike äve vae re ñogüɨnoi kuae cuarto reta jare mbaetɨ oguambɨ etei oyoo.

⁷ Cuarto reta ɨvate ete ñogüɨnoi vae ipɨguasu ko, yeupika oyere yere vae ojo oväe joko pe o japɨpe rupi, jökorai ipuere oyeupi o ɨvɨkotɨgua güi mbɨte pegua pe jare iárambo ete oï vae pe.

⁸ Jare amae tupao ɨvategüe re opaete iyɨ́vɨri rupi, cuarto reta iguapɨka ipɨgüe güɨnoi mboapɨ metro.

⁹ Cuarto reta joguambɨ ikatu kotɨgua güɨnoi mókoi metro y medio yandambusugüe, jare kuae cuarto reta jóvai rupigua ipombae, oyovake tupao japɨpe pegua ndive.

¹⁰ Kuae cuarto reta jóvai opɨta ipombae vae, güɨnoi payandepo metro ipɨgüe oyere tupao re.

¹¹ Cuarto ñavo jöke güɨnoi oka ipombae kotɨ, metei öke oï ɨvɨtuguasu kotɨ jare ïru öke oï arayevɨ kotɨ, jare ipombae opɨta vae güɨnoi mókoi metro y medio opaete oguambɨ iyɨ́vɨri.

O kuaraɨ oikea kotɨ oï vae

¹² O oï ipombaea jóvai vae, kuaraɨ oikea kotɨ oï vae, güɨnoi treinta y cinco metro ipɨgüe jare cuarenta y cinco metro ipukugüe; joguambɨ güɨnoi mókoi metro y medio yandambusugüe.

Tupao ipɨgüe

¹³ Jaɨkue rupi ojäa tupao, güɨnoi cincuenta metro pukugüe; jare ipɨgüe opaete reve joka jare joguambɨ ndive güɨnoi cincuenta metro vi.

¹⁴ Tupao jova jare joka kuaraɨ oëa kotɨgua oñekëse vae, güɨnoi cincuenta metro pukugüe.

¹⁵ Jare ojäa o oï tupao ikupe kotɨ vae, oka oñekëse vae jóvai, jare oguambɨ reta jovaicho reve; opaete reve güɨnoi cincuenta metro. Tupao japɨpe jare oka michi vae ikorero reta,

Tupao regua

¹⁶ öke reta jare iventana raɨ reta, jare cuarto reta mboapɨ ñesɨro oyoarambo ñogüɨnoi vae, oñeova ɨvɨra pe, ɨvɨ güive iventana rupi vae, jare ventana reta ave oñeova vi ɨvɨra pe.

¹⁷ Öke iárambo rupi, o japɨpe rupi jare ikatu rupi, opaete oguambɨ japɨpe jare ikupe rupi oñeova vi.

¹⁸ Jare oyoo oyapo jese araɨgua querubín iä reta jare karandaɨ iä reta; kuae reta oñopäu päu ñogüɨnoi, araɨgua iä karandaɨ iä ndive; araɨgua querubín iä ñavo güɨnoi mókoi jova;

¹⁹ metei jova kuimbae jova rami vae omae karandaɨ kotɨ; jare ïru jova yaguapope jova rami vae omae ïru karandaɨ kotɨ. Jökorai oyere tupao re.

²⁰ Ɨvɨ güive öke iárambo rupi opaete tupao joguambɨ re oyapo araɨgua querubín iä reta jare karandaɨ iä reta.

²¹ Tupao jokɨta reta ñavo, güɨnoi irundɨ iyɨke; jare tupao japɨpe oñeñono tee kavi yae ete vae jova oyovake jenonde oï vae jova ndive.

Ikäti kavi vae incienso oyeapɨ jese vae

²² Ikäti kavi vae incienso oyeapɨ jese vae ɨvɨra pegua, güɨnoi metro y medio ɨvategüe jare metei metro ipɨgüe. Güɨnoi ekina reta, jare iguapɨka jare iyɨke yɨke ɨvɨra pegua, jare jei cheve: “Jae ko kuae mesa yandeYa jóvai oï vae.”

Öke reta

²³ Tupao jare japɨpe oñeñono tee kavi yae vae, güɨnoi mókoi jöke.

²⁴ Öke ñavo re oï mókoi jöke oyepea päve vae; metei jöke oyepea oyeapa vae jare jovaicho jökorai vi oyepea.

²⁵ Tupao jöke reta oyoo oyapo araɨgua querubín iä vae reta jare karandaɨ iä vae reta, joguambɨ re ñogüɨnoi rami; jare oka pe ikatu kotɨ oï metei öke ikorero ɨvɨra pegua.

²⁶ Oime ventana raɨ reta, jare karandaɨ iä reta oyeapo korero kotɨ; jökoraiño vi oï cuarto reta jare öke reta tupao pe.