EZEQUIEL 40 - Biblia Guarani Tumpa Iñee

Tumpa oechauka tupao oikota vae

¹ Veinticinco añoa ma roiko tembipɨɨrä yave, año iyɨpɨ ete re, payandepo araa pe, jae ko catorce añoa ma tëta guasu Jerusalén oñepɨ̈ro yave, yandeYa imbaepuere ou cheré jare chereraja jokotɨ.

² Tumpa oechauka cheve vae rupi chereraja ɨvɨ Israel pe, jare cheñono metei ɨvɨtɨ ɨvate yae vae re, jókuae re aecha metei o tuicha vae arayevɨ kotɨ metei tëta guasuecha.

³ Chereraja joko pe jare aecha metei kuimbae oyemboɨ oï öke pe, jembipe jiero iyu vae rami oyekuaa, jare ipo pe güɨnoi metei tɨmasa raɨ lino pegua jare ɨvɨra omaejäa pɨpe vae.

⁴ Jókuae kuimbae jei cheve: “Nde kuimbae, emae jare eyeapɨsaka kavi, agüɨye neakañɨ opaete aechaukata ndeve vae güi, echa jaerä ko ndereru kuae pe. Kuae reecha vae re nemiari Israel iñemuña reta pe.”

Öke kuaraɨ oëa kotɨgua

⁵ Aecha tupao oime ikësea. Jare jókuae ɨvɨra mbaejäaka kuimbae güɨnoi ipo pe vae ipukugüe güɨnoi mboapɨ metro; ojäa tupao ikësea: Yandambusugüe güɨnoi mboapɨ metro jare ɨvategüe güɨnoi mboapɨ metro vi.

⁶ Jaɨkue rupi ou kuaraɨ oëa kotɨgua öke oï vae kotɨ; oyeupi yeupika rupi jare ojäa jókuae öke-ɨta ipegüe, güɨnoi mboapɨ metro.

⁷ Tupao ikësea jöke iyɨke yɨke pe ñogüɨnoi cuarto vae güɨnoi ipɨgüe jare pukugüe mboapɨ metro, jare kuae cuarto reta ñogüɨnoi oyougüi mókoi metroa pe.

⁸ Jaeramiño vi ojäa öke güi japɨpe kotɨ, güɨnoi mboapɨ metro.

⁹ Jaɨkue rupi ojäa korero; kuae korero omae japɨpe kotɨ, güɨnoi irundɨ metro jare jokɨta reta metei ñavo, metro ipoguasugüe; kuae korero oï öke japɨpe kotɨ.

¹⁰ Jare öke kuaraɨ oëa kotɨgua güɨnoi mboapɨ cuarto iyɨke ñavo re; mboapɨ reve metei ramiño; jare korero reta metei ramiño vi ipɨgüe.

¹¹ Ojäa vi jöke ipɨgüe: Güɨnoi pandepo metro jare ikorero pukugüe güɨnoi ova metro y medio.

¹² Cuarto reta jóvai ñavo güɨnoi ikësea raɨ, medio metro vae, jare jóvai kotɨ; cuarto ñavo güɨnoi ipɨgüe jare pukugüe mboapɨ metro.

¹³ Ojäa vi öke rupi o jugua güi ïru o jóvai kotɨ oï vae jugua kotɨ, güɨnoi doce metro y medio.

¹⁴ Jare ojäa tupao joka jokɨta reta, güɨnoi treinta metro metei ñavo; jare opaete oka oï korero iyɨ́vɨri.

¹⁵ Öke ikatu güi, öke ikorero japɨpe iyapɨ pe güɨnoi veinticinco metro.

¹⁶ Jókuae cuarto güɨnoi ventana raɨ reta, jaeramiño vi korero reta güɨnoi ventana reta japɨpe rupi, jare okɨta ñavo re oï karandaɨ iä reta.

Tupao joka tuicha vae

¹⁷ Kuae jaɨkue rupi chereraja tupao joka tuicha vae pe, joko pe aecha cuarto reta, opaete jókuae oka re oyereroyere piso ita pegua; jare treinta cuarto reta oyere jese.

¹⁸ Jókuae piso ita pegua öke reta iyɨke rupi oï vae, oyovake ipɨgüe öke reta ikorero ndive; jare kuae piso oï ɨ́vɨkotɨ mii jókuae korero güi.

¹⁹ Jare ojäa oka ipɨgüe öke japɨpe pegua güi öke ikatu pegua japɨpe kotɨ, güɨnoi cincuenta metro. Jökorai vi ɨvɨtuguasu kotɨgua.

Öke ɨvɨtuguasu kotɨgua

²⁰ Jare ojäa öke ipɨgüe jare pukugüe, tupao joka tuicha vae güi öke oï ɨvɨtuguasu kotɨ vae,

²¹ cuarto reta oï öke iyɨke yɨke pe vae, ñogüɨnoi mboapɨ jovaicho kotɨ jare mboapɨ vi ïru jovaicho kotɨ. Jokɨta reta jare ikorero reta oyovake ïru öke reta ndive. Pukugüe güɨnoi veinticinco metro jare ipɨgüe doce metro y medio.

²² Iventana reta, jare ikorero reta jare karandaɨ iä reta oyovake, öke oï kuaraɨ oëa kotɨgua pe oï vae reta ndive. Kuae rupi yayeupi chiu pɨ̈roka rupi. Japɨpe kotɨ güɨnoi ikorero reta.

²³ Öke reta tupao joka michi vae pegua oï öke ɨvɨtuguasu kotɨgua jare kuaraɨ oëa kotɨgua jóvai. Jare ojäa öke güi ïru öke kotɨ, güɨnoi cincuenta metro.

Öke arayevɨ kotɨgua

²⁴ Jaɨkue rupi jókuae kuimbae chereraja arayevɨ kotɨ, joko pe aecha ïru öke; ojäa jokɨta reta jare ikorero reta, oyovake ïru öke reta ndive.

²⁵ Güɨnoi iventana reta jare ikorero reta, oyovake ïru reta ndive; pukugüe güɨnoi veinticinco metro jare ipɨgüe güɨnoi doce metro y medio.

²⁶ Yayeupi jupi vae güɨnoi chiu pɨ̈roka, ikorero reta güɨnoi jóvai; jare jokɨta jovaicho ñavo re güɨnoi karandaɨ iä reta.

²⁷ Oime vi metei öke arayevɨ kotɨ, tupao joka japɨpe pegua kotɨ, jare ojäa öke güi ïru öke kotɨ arayevɨ kotɨ, güɨnoi cincuenta metro.

Öke arayevɨ kotɨgua tupao joka michi vae pegua

²⁸ Jaɨkue rupi chereraja öke arayevɨ kotɨgua rupi, tupao joka michi vae pegua pe, jare ojäa öke arayevɨ kotɨgua; jare oyovake ïru reta ndive.

²⁹ Icuarto reta, jokɨta reta jare ikorero reta, oyovake tenondegua öke pegua reta ndive: Kuae korero reta pukugüe güɨnoi veinticinco metro jare ipɨgüe güɨnoi doce metro y medio.

³⁰ Iyɨ́vɨri korero reta güɨnoi doce metro y medio pukugüe jare mókoi metro y medio ipɨgüe.

³¹ Tupao joka tuicha vae kotɨ omae korero reta vae güɨnoi karandaɨ iä reta jokɨta ñavo, jare iyeupika güɨnoi juri pɨ̈roka.

Öke kuaraɨ oëa kotɨgua tupao joka michi vae pegua

³² Chereraja öke kuaraɨ oëa kotɨgua pe, tupao joka michi vae pegua pe, jare ojäa öke; jare oyovake ïru reta ndive.

³³ Icuarto reta, jokɨta reta jare ikorero reta oyovake ïru reta ndive; güɨnoi iventana reta jare ikorero reta opaete iyɨ́vɨri. Kuae korero reta pukugüe güɨnoi veinticinco metro jare ipɨgüe güɨnoi doce metro y medio.

³⁴ Tupao joka tuicha vae kotɨ omae korero reta vae güɨnoi yoyavi karandaɨ iä reta jokɨta ñavo, jare iyeupika güɨnoi juri pɨ̈roka.

Öke ɨvɨtuguasu kotɨgua tupao joka michi vae pegua

³⁵ Jaɨkue rupi chereraja öke ɨvɨtuguasu kotɨgua pe, jare ojäa; oyovake ïru reta ndive.

³⁶ Icuarto reta, jokɨta reta jare ikorero reta jare iventana reta iyɨ́vɨri; kuae korero reta pukugüe güɨnoi veinticinco metro jare ipɨgüe doce metro y medio.

³⁷ Tupao joka tuicha vae kotɨ omae korero reta vae güɨnoi yoyavi karandaɨ iä reta jokɨta ñavo, jare iyeupika güɨnoi juri pɨ̈roka.

Öke ɨvɨtuguasu kotɨgua iyɨpɨ pe ñogüɨnoi vae o reta

³⁸ Joko pe oï metei cuarto, korero re oya oï vae; joko pe oyoe retata mɨmba oyeyukagüe opaetei oyeapɨ vaerä vae.

³⁹ Öke yaikea iyɨke pe oï mókoi mesa, jare iyɨke jovaicho pe mókoi mesa vi, jókuae reta re oñeaseokɨ̈ti mɨmba oyeyukagüe opaetei oyeapɨ vaerä vae, ñɨ̈ro pegua jare mbaeyoa regua.

⁴⁰ Ikatu pe yeupika oï vae iyɨke pe, öke ɨvɨtuguasu kotɨgua kotɨ oï mókoi mesa jare iyɨke jovaicho kotɨ mókoi mesa vi.

⁴¹ Jökorai oï irundɨ mesa öke japɨpe pe, jare irundɨ mesa vi, öke ikatu pe; opaete reve juri mesa, jókuae reta re oñeaseokɨ̈ti mɨmba reta.

⁴² Jókuae irundɨ mesa reta jae ko ita oñeopagüe pegua; jókuae re oñeñono tembiporu reta oñeaseokɨ̈ti pɨpe mɨmba oyeyukagüe opaetei oyeapɨ vaerä vae jare mɨmba oyeyuka oyeapɨ vaerä vae; pukugüe jare ipɨgüe güɨnoi setenta y cinco centímetro päve, jare ɨvategüe güɨnoi cincuenta centímetro.

⁴³ Jare cuarto japɨpe rupi oï tɨ̈ai reta chiu centímetro vae, opaete iyɨ́vɨri rupi, jare mesa re mɨmba oyeyukagüe isoo.

⁴⁴ Tupao joka michi vae jöke ɨvɨtuguasu kotɨgua iyɨpɨ pe, oï otairari vae reta icuarto, jókuae cuarto omae arayevɨ kotɨ; ïru cuarto oï öke arayevɨ kotɨgua iyɨpɨ pe, jókuae cuarto omae ɨvɨtuguasu kotɨ; jae ko kuaraɨ oëa kotɨgua öke jóvai ñogüɨnoi vae.

⁴⁵ Jare jei cheve: “Kuae cuarto omae arayevɨ kotɨ vae, sacerdote reta oyangareko tupao re vae imbae ko;

⁴⁶ jare cuarto omae ɨvɨtuguasu kotɨ vae, jae ko sacerdote reta mɨmba oyeyuka oyeapɨ jese vae iyangarekoa reta imbae; jae ko Sadoc iñemuña reta, kuae reta oyeparavo Leví iñemuña reta güi oyeokuai vaerä yandeYa pe.”

Tupao jare joka michi vae

⁴⁷ Jare ojäa tupao joka michi vae; pukugüe jare ipɨgüe oyovake güɨnoi cincuenta metro, jare mɨmba oyeyuka oyeapɨ jese vae oï tupao jóvai.

⁴⁸ Jare chereraja tupao jöke kotɨ, jare ojäa jokɨta reta; metei ñavo ipoguasugüe güɨnoi mókoi metro y medio, öke ipɨguasugüe güɨnoi mboapɨ metro.

⁴⁹ Öke ikorero ipukugüe güɨnoi payandepo metro jare ipɨgüe ova metro; pɨ̈roka rupi yayeupi joko pe; jókuae korero jöke jokɨta iyɨpɨ ñavo pe oï ïru okɨta.