EZEQUIEL 39 - Biblia Guarani Tumpa Iñee

Gog iñamɨri vae regua

¹ Nde kuimbae, emoërakua maratuta vae Gog kotɨ, ere chupe: “CheYa Tumpa jei körai: ‘Che ayovaicho ndekotɨ Gog, tëta Mesec jare tëta Tubal juvicha.

² Romoamɨrita jare rogüeruta ɨvɨtuguasu kotɨ güi; jare rogüeruta ɨvɨtɨ guasu reta Israel pegua re.

³ Jare ndepo ndeasu kotɨgua güi ropoekɨta ndegüɨrapa güi, jare ndeakatu kotɨgua güi aitɨta nderuvɨ.

⁴ Nde, ndesundaro reta jare tëta reta oñemoïru nde ndive vae, opata pemano ɨvɨtɨ reta Israel pegua re; pomeeta oipotagüe uruapúa reta jare mɨmba pochɨ vae reta jembiurä.

⁵ Perëogüe oyoata ɨvɨpe kavi rupi, echa che Tumpa ko jae kuae.

⁶ Jare ambouta tata tëta Magog re jare opaete ipɨagüive ɨguasu jembeɨ rupi yogüɨreko vae reta re. Jare oikuaa retata che ko jae Tumpa vae.

⁷ Jare amboyekuaata cheré ikɨambae vae, chembae vae reta Israel ipɨte pe, jare ngaraa ye ma amaeño oñereröɨrouka cheré ikɨambae vae; jare tëtaguasu reta chekuaata che ko jae Tumpa vae, Iyoambae Israel pegua.

⁸ Mase, opaete kuae jae vae, oyembopota ko. Che peYa Tumpa jae körai. Jae ko kuae ara amoërakua vae.’

⁹ Tëta guasu reta Israel pegua pe yogüɨreko vae reta, ñogüɨnoeta opa oapɨ reta tembiporu reta ñeraro pegua, yeopiaka, güɨrapa jare uvɨ, mii jare mii raɨ; oapɨ retata yogüɨreko chiu año rupi.

¹⁰ Mbaetɨta oeka reta yepea ani güeru reta kaa güi, jaeño oapɨ retata tembiporu ñeraro pegua. Omaepɨ̈ro retata omaepɨ̈ro chugüi vae reta güi, ipogüɨrai oeya retata jökorai oporoapo vae reta. Che Tumpa jae kuae.

¹¹ Jókuae ara rupi ameeta Gog jɨvɨa jendarä ɨvɨ Israel pe, ɨvɨtɨ päu ipe kavi vae, kuaraɨ oëa kotɨ oï ɨguasu güi vae, oyopiata oguatagüe reta jape, echa joko pe oñotɨ retata Gog jare opaete oñemoïru jae ndive vae reta jëogüegüe; jare jókuae ɨvɨtɨ päu ombojee retata Hamón-gog.

¹² Jare Israel iñemuña reta oñotɨta yogüɨreko jókuae tëogüe reta chiu yasɨ rupi, oitɨo vaerä jókuae ɨvɨ.

¹³ Opaete vae oñotɨ tëogüe reta; jare chupegua reta yembotuicha jókuae ara ayemboyekuaa yave. Che Tumpa jae kuae.

¹⁴ Jókuae chiu yasɨ jaɨkue rupi omboepɨ retata omondo kuimbae reta oguata opaete jókuae ɨvɨ rupi, oeka reta vaerä tëogüe oï ɨvɨ iárambo vae, opa vaerä oñotɨ; jökorai oitɨo vaerä ɨvɨ.

¹⁵ Jare jókuae ojo vae reta oasata jókuae ɨvɨ rupi, jare oecha tëogüe ikägüegüe yave, tomokañɨmaa toeya, tëogüe iñotɨa reta güɨraja regua oñotɨ ɨvɨtɨ päu ipe kavi vae Hamón-gog pe.

¹⁶ Jare vi tëta guasu toyembojee Hamona, jökorai toyetɨo topɨta ɨvɨ.”

¹⁷ YandeYa jei cheve: “Nde kuimbae, ere oipotagüe güɨra reta pe, jare opaete mɨmba pochɨ vae reta pe: Peyomboatɨ jare peyu; peyomboatɨ oipota rupi güi ambaeyuka pevea pe ɨvɨtɨ reta Israel pegua pe, peu soo jare peɨu tugüɨ re.

¹⁸ Jëia vae sundaro reta isoo peuta jare mburuvicha reta jugüɨ re peɨuta; Basán pegua vecha kuimbae reta isoo, vecha kuimbae taɨrusu vae, kavara kuimbae, güeye jare toro reta oyemongɨragüe isoo rami vae.

¹⁹ Peuta ikɨragüe perɨ̈vɨata regua, jare peɨuta ayuka peve vae reta jugüɨ re peyuguaru chugüi regua.

²⁰ Jare perɨ̈vɨatata kavayu isoo pe, kavayu regua reta isoo pe jare opaete kuimbae reta ñeraro pegua isoo pe. Che peYa Tumpa jae kuae.

²¹ Jökorai aechaukata cheyemboetea tëtaguasu reta ipɨte pe, jare opaete vae oechata cheporojäa ayapogüe, jare chepo aitɨ jese reta vae.

²² Jókuae ara güive tenonde kotɨ, Israel iñemuña reta oikuaata che ko jae iYa Tumpa vae.

²³ Jare tëtaguasu reta oikuaata, kërai Israel iñemuña reta oyererajauka tembipɨɨrä iyoa jeko pegua, oyembopɨapochɨ reta chekotɨ ramo che ayerova chugüi reta, amee jovaicho reta ipo pe, jare opaetei omano reta ñeraro pe.

²⁴ Jae reta ikavimbae oyapo rami jare oyembopɨapochɨ chekotɨ rami, ayapo chupe reta, ayerova chugüi reta.

²⁵ Jáeramo che peYa Tumpa jae körai: Añave ayuta amborɨ Jacob iñemuña reta tembipɨɨrä ñogüɨnoi vae, aipararekota opaete Israel iñemuña reta, cherägüɨro reve aechaukata cheree ikɨambae vae.

²⁶ Imara retata oyembopɨapochɨ reta chekotɨ vae jeko pegua, yogüɨreko pɨagüive ma iɨvɨ pe jare mbaetɨ ma kia omongɨɨye yave,

²⁷ aru reta ye ma tëta reta ipɨte güi jare amboatɨ ma jovaicho reta iɨvɨ güi yave, ayemboeteuka ma jese reta opaete tëtaguasu reta jovake yave.

²⁸ Chekuaa retata che ko jae iYa Tumpa vae, echa amondo reta tembipɨɨrä tëtaguasu reta rupi, jare aru reta ye iɨvɨ ae pe yave, aeyambae reve metei ave jokoropi.

²⁹ Ngaraa ma ayembosɨrɨ chugüi reta, echa ameeta chembaepuere Israel iñemuña reta pe. Che peYa Tumpa jae kuae.”