EZEQUIEL 36 - Biblia Guarani Tumpa Iñee

Israel oï kavi yeta vae regua

¹ “Nde kuimbae, emoërakua maratuta oasa ɨvɨtɨ reta Israel pegua vae, ere chupe reta: ‘Ɨvɨtɨ reta Israel pegua, peyeapɨsaka yandeYa iñee re.’

² YandeYa Tumpa jei körai: Tovaicho reta jei pekotɨ: ‘Kuae ɨvɨtɨ reta ɨvate vae jaema opɨta vi yandembaerä.’

³ Jáeramo, emoërakua maratuta oasa vae, ere chupe reta: YandeYa Tumpa jei körai: ‘Oipota rupi güi oporepeña peré jare pemboai, peiko vaerä ïru tëtaguasu reta imbaerä, jare imiari kaviä peré, peyóyai yóyai reve,

⁴ jáeramo, ɨvɨtɨ reta Israel pegua peyeapɨsaka, yandeYa Tumpa jei ɨvɨtɨ guasu jare ɨvɨtɨ raɨ reta pe, ɨ̈aka raɨ reta pe, ɨvɨtɨ päu ipe kavi vae reta pe; tëtagüe reta pe jare Israel pegua tëta guasu reta oyeeyagüe pe, tovaicho reta opa mbae opɨ̈ro chugüi vae; jare iyɨvɨrigua tëtaguasu reta oyóyai yóyai vae;

⁵ yandeYa Tumpa jei körai: Chearasɨ yae cherägüɨro reve amoë cheñee ïru tëtaguasu reta kotɨ, jare opaete Edom pegua reta kotɨ, echa cheɨvɨ re oyemombae reta oyerovia reve, jare omotareɨ yae reve güɨnoe reta joko güi mbaagüɨye.’

⁶ Jáeramo, emoërakua maratuta oasa ɨvɨ Israel vae; ere ɨvɨtɨ guasu jare ɨvɨtɨ raɨ reta Israel pegua pe, ɨ̈aka reta jare ɨvɨtɨ päu ipe kavi vae reta pe: YandeYa Tumpa jei körai: ‘Chearasɨ yae cherägüɨro reve amoë cheñee, echa peiporara yeyóyai yóyai ïru tëtaguasu reta güi.

⁷ Jáeramo, che peYa Tumpa jae cheree re ae körai: Tëtaguasu reta peɨvɨrigua oñemomaraiuka yaeta.

⁸ Ërei pe ɨvɨtɨ Israel pegua reta, jetata ɨvɨra perupi, jare jetata ia chembae vae Israel pegua reta peguarä, echa köi ma yogüeru reta ye vaerä.

⁹ Echa che aï pe ndive, oyeparavɨkɨta jare oñemaetɨta peré.

¹⁰ Jare omoñemuñata jeta Israel iñemuña reta kuae pe. Tëta guasu reta ipo yeta jare tëtagüe reta oñemopüa yeta.

¹¹ Amoñemuñata jeta kuimbae reta jare mɨmba reta peré; oyembojeta yaeta; jeta yaeta kuae pe vae tenonde yave rupi rami, jare peiko kavi yaeta tenonde rupi vae güi. Jayave oikuaa retata che ko jae Tumpa vae.

¹² Chembae vae Israel iñemuña reta oguatata perupi, jae reta yogüɨrekota peyarä. Jare ngaraa ye ma pemaeño jovaruru iñemuña reta chugüi.’

¹³ YandeYa Tumpa jei körai: ‘Jei pekotɨ vae: Oporomokañɨtei vae jare peporoeya iñemuñambae vae.

¹⁴ Ërei, ngaraa ye ma peporomokañɨtei jare peeya tëta reta iñemuñambae. Che Tumpa jae kuae.

¹⁵ Ngaraa ye ma amaeño peendu ïru tëtaguasu reta peangao vae, ngaraa ye ma peiporara ñeeasɨ katu reta tëta reta güi, ngaraa ye ma amokañɨtei kuae tëta iñemuña reta. Che Tumpa jae kuae.’ ”

¹⁶ YandeYa jei cheve:

¹⁷ “Nde kuimbae, Israel iñemuña reta yogüɨreko ramboeve iɨvɨ pe, omongɨa reta jeko ikavimbae pe jare jembiapo reta ikavimbae pe; kuña yasɨ ñavo oiporara vae ikɨa rami cheróvai reta.

¹⁸ Jáeramo aitɨ chearasɨ jese reta, oporoyuka reta ramo jókuae ɨvɨ pe; echa omongɨa reta, omboete reta tumpa-raanga reta vae rupi.

¹⁹ Opa amoai moai reta tëtaguasu reta rupi, ïru ɨvɨ rupi; aiporarauka chupe reta jeko ikavimbae jare jembiapo reta ikavimbae oï rupi.

²⁰ Yogüɨraja reta oväe ïru tëtaguasu reta pe yave, güɨröɨrouka reta cheree, echa jeiuka reta iyeupe: ‘Jae ko kuae Tumpa imbae reta, ërei opa oeya reta iɨvɨ.’

²¹ Jare jasɨ katu yae cheve, aecha yave Israel iñemuña reta güɨröɨrouka cheree, jókuae tëtaguasu reta yogüɨrajaa ñavo rupi.

²² Jáeramo ere Israel iñemuña reta pe: YandeYa Tumpa jei körai: ‘Kuae ayapo vae mbaetɨ ko pereko pegua, jaeño cheree jeko pegua, echa pe reta peröɨrouka cheree ikɨambae jókuae ïru tëtaguasu reta pe, peo peväea ñavo rupi.

²³ Che amboeteukata cheree ikɨambae vae ïru tëtaguasu reta pe, jae reta omboeteä vae, pe reta peröɨrouka vae; kuae ayapo yave perupi jae reta jóvai, jayave jae reta oikuaata che ko jae peYa vae. Che peYa jae kuae.

²⁴ Che pogüɨnoeta ïru tëtaguasu reta güi, pomboatɨta opaete ketɨ ketɨ güi jare pogüeru yeta peɨvɨ ae pe.

²⁵ Poyoeta ɨ ikɨambae vae yetɨo pegua pe rami, jare ikɨambae pepɨtata cheróvai opaete peyemongɨa pɨpe vae güi; potɨota opaete petumpa-raanga reta güi.

²⁶ Ameeta peve pepɨarä ipɨau vae jare peyemongetarä ipɨau vae, aekɨta pegüi pepɨatäta ita rami vae, jare ameeta peve pepɨarä, ikɨ̈reɨ ngatu vae.

²⁷ Añonota peɨvɨte pe cheespíritu, jare poapota peiko vaerä cheporookuai rupi; peñovatuta jare peyapota.

²⁸ Peikota ɨvɨ amee peñemuñagüe reta pe vae pe, peikota chembaerä, jare che aikota peTumparä.

²⁹ Poepɨta opaete peyemongɨa pɨpe vae güi. Ambojetata trigo reta peve, mbaetɨta ma ambou karuai peve.

³⁰ Ambojetata vi ɨvɨra reta ia, jare kó pe mbaagüɨye reta, agüɨye vaerä ma peangao pekaruai jeko pegua ïru tëtaguasu reta.

³¹ Jare pemaendúa pereko ikavimbae re jare perembiapo ikavimbae re yave, pemarata peyeugüi aeño, peyoa jare ikavimbae peyapo jeko pegua.’

³² YandeYa Tumpa jei: ‘Israel iñemuña reta, peikuaa kavi kuae ayapota vae, pereko kavi ramoä ko ayapota kuae; che aipota vae jae ko pemara jare peñemomichi peyoa jeko pegua.

³³ Che peYa Tumpa jae körai: Jókuae ara potɨo opaete peyoa güi yave, ameeta vi peiko vaerä perëta guasu reta pe, jare pemopüa pɨau yeta perëta guasugüe reta.

³⁴ Kuae ɨvɨ opɨta ipombae vae pe oyeparavɨkɨ yeta, opaete oasa jokoropi vae reta jovakei.

³⁵ Jei retata: Kuae ɨvɨ ipombae oikose vae, añave oyeapo kó raɨ Edén pegua rami; tëta guasu reta oyemboai jendagüeño opɨta vae, añave oñemopüa pɨau ye jare yogüɨreko ye ma pɨpe vae.

³⁶ Jayave ïru tëtaguasu reta peɨ́vɨri yogüɨreko vae reta oikuaata che ko amopüa ye opa oyemboai oï vae, jare amaetɨ ɨvɨ opa oyemboai oï vae pe. Che peYa ko jae kuae jare ayapota ko.

³⁷ Che peYa Tumpa jae körai: Israel iñemuña reta oiporu cheve vae ayapota; amoñemuña retata jeta, vecha reta jeta oñemuña rami.

³⁸ Tëta guasu reta ipombae vae tɨnɨe yeta jeta vae reta pe, jeta vecha reta oyereraja Jerusalén pe arete mbaemboetea pegua pe yave vae rami, jókuae mɨmba oyeyukata oyeapɨ vae reta rami.’ ”