EZEQUIEL 34 - Biblia Guarani Tumpa Iñee

Tëtaguasu Israel iyangarekoa reta maratuta vae regua

¹ YandeYa jei cheve:

² “Nde kuimbae, emoërakua maratuta oasata vecha iyangarekoa reta Israel pegua vae, ere chupe reta: YandeYa Tumpa jei körai: ‘¡Peparavete pe vecha iyangarekoa reta Israel pegua, peyé aeño peyangareko vae! Echa, ¿vecha reä pa ko peyangarekota tëi?

³ Peu vecha ineche, peyemonde vecharaagüe pe; peyuka vecha ikɨra kavigüe, ërei peyangarekoä vecha reta re.

⁴ Mbaetɨ pemborɨ vecha ipɨtu vae, mbaetɨ vi peipoano imbaerasɨ vae, mbaetɨ peyokua ipɨ opë vae, jopa vae mbaetɨ peru jókai pe, okañɨgüe mbaetɨ peeka, perekoasɨ katu reta, mbaetɨ peyangareko kavi jese.

⁵ Chevecha reta yogüɨreko iyangarekoambae, mbaeporou ñana rupigua jembiurä yogüɨreko reta jare opa oñemoai moai.

⁶ Opa jopa reta, oguata reta opaete ɨvɨtɨ reta ɨvate vae rupi; chevecha reta opa oñemoai opaete ɨvɨ rupi, jare mbaetɨ kia ojo oeka reta, ani oparandu yepe jese reta.

⁷ Jáeramo, pe vecha iyangarekoa reta, peyeapɨsaka yandeYa iñee re.

⁸ YandeYa Tumpa jei körai iyé aeño: Chevecha reta oñeomi jare oipotagüe mbaeporou reta ñana rupigua jou, echa mbaetɨ iyangarekoa. Chevecha iyangarekoa reta mbaetɨ yogüɨraja oeka vecha reta. Jae reta aeño oyeangareko, mbaetɨ oyangareko chevecha reta re.

⁹ Jáeramo, peyeapɨsaka yandeYa iñee re vecha iyangarekoa reta.

¹⁰ YandeYa Tumpa jei körai: ¡Chemboarasɨ vecha iyangarekoa reta! Amboetata chupe reta chevecha reta re, apɨ̈rota chugüi reta kuae mbaravɨkɨ, ngaraa ye ma iyé aeño oyangareko reta, echa apɨ̈rota chevecha reta chugüi, ngaraa ma güɨreko reta jembiurä.’

Vecha iyangarekoa ikavi vae

¹¹ Echa yandeYa Tumpa jei körai: Mase, che etei ajata aeka chevecha reta jare aikuaata.

¹² Vecha iyangarekoa oikuaa ivecha reta oñemoai ñogüɨnoi chugüi yave vae rami, jökorai aikuaata chevecha reta, aruta oipota rupi oñemoai ñogüɨnoia rupi güi, jasɨ katu ñogüɨnoi yave opa oñemoai vae.

¹³ Che anoeta tëta reta ñogüɨnoia rupi güi, jare amboatɨta ïru ɨvɨ güi, aruta iɨvɨ ae pe. Ayangarekota jese ɨvɨtɨ reta Israel pegua rupi, ɨ̈aka jembeɨ rupi, opaete ɨvɨ kia yogüɨreko pɨpe vae rupi.

¹⁴ Jembíu katúa rupi ayangarekota jese reta, ɨvɨtɨ reta ɨvate Israel pe vae rupi ambojokaita. Joko pe oputuuta jókai kavi pe, jou retata kapii ikavi vae.

¹⁵ Che etei ayangarekota chevecha reta re jare ambojokaita. Che peYa Tumpa jae kuae.

¹⁶ Che aekata chevecha okañɨgüe jare jopagüe aru yeta jókai pe, ipɨ opë vae güi ayokuata, ipɨtu vae amborɨta; ërei ikɨra vae jare oikove katu vae ayukata. Ayangareko kavita jupi rupi jese reta.

¹⁷ Che peYa jae: Peyeapɨsaka chevecha reta. Aporojäata jupi rupi kavi vecha kuimbae taɨrusu vae reta re jare kavara kuimbae reta re.

¹⁸ ¿Mbaetɨ pa pemoangapɨɨ kapii kavi peu vae, maera pa jembɨregüe re pepɨ̈ro peeya? Peu ɨ jësaka kavi vae, javoi pembojuúmbai peeya pepɨ pe.

¹⁹ Jare chevecha reta jou jókuae kapii re pepɨ̈ro peeyagüe, jare jou reta ɨ pepɨ pe pembojuúmbai peeya vae.

²⁰ Jáeramo, che peYa Tumpa jae körai peve: Mase, che ajäata jupi rupi kavi vecha reta ikɨra vae jare ipiru vae reta.

²¹ Echa pemoaña jare peikutu vecha ipɨtu vae reta, jökorai pembotekuarai reta jare opa pemoai moai.

²² Ërei che aepɨta chevecha reta. Ngaraa ye ma amaeño peñomi. Aporojäata jupi rupi kavi vecha reta re.

²³ Jare ambouta metei vecha iyangarekoa, jae oyangarekota jese reta; jae ko cherembiokuai David, jae oyangarekota jese reta; jae oikota iyangarekoarä.

²⁴ Che peYa aikota peTumparä jare cherembiokuai David rami vae peruvicharä. Che peYa Tumpa jae kuae.

²⁵ Ayapota morogüɨrökuavee päve yembopɨakatu pegua jae reta ndive; amokañɨta mbaeporou reta jókuae ɨvɨ güi, chevecha reta yogüɨreko pɨagüive vaerä ñuu pe jare oke pɨagüive vaerä kaa reta rupi.

²⁶ Cheɨvɨtɨ iyɨ́vɨri yogüɨreko retata jare cheporerekuata jese reta; ambouta ama okɨ iara pe kavi.

²⁷ Ɨvɨra reta iata, ɨvɨ omeeta mbaagüɨye, jare jae reta yogüɨreko pɨagüiveta iɨvɨ pe. Aepɨ yave chembae vae reta tembɨpɨɨrä yogüɨreko vae güi, jayave chekuaa retata che ko jae peYa vae.

²⁸ Tëtaguasu reta ketɨgua ngaraa ma oyemombae ye jese reta, mbaeporou reta ñana rupi ave ngaraa ma jou; yogüɨreko pɨagüiveta, ngaraa ma kia omongɨɨye.

²⁹ Ameeta chupe reta jemitɨ ikavi yae vaerä, ngaraa ma karuai rupi yogüɨreko reta, ïru tëtaguasu reta ave ngaraa ma oyóyai yóyai.

³⁰ Jayave Israel iñemuña reta oikuaa retata che iYa Tumpa ko aï jae reta ndive vae, jare jae reta ko chembae vae reta.

³¹ Pe reta ko jae chevecha reta rami, vecha reta cherɨmba rókai pegua. Che peYa ko jae kuae.”