EZEQUIEL 30 - Biblia Guarani Tumpa Iñee

Egipto oiporara

¹ YandeYa jei cheve:

² “Nde kuimbae, emoërakua chupe reta maratuta oasa vae: ‘YandeYa Tumpa jei körai: Peñeäpiro jókuae ara outa vae re,

³ köi yae ma ou; ¡köi yae ma ou yandeYa iara oporojäa vaerä! ¡Ara pɨtumimbi yaeta vae, tëtaguasu reta oiporarata vae!

⁴ Oimeta ñeraro Egipto pe, jeta ma omano joko pe vae yave, jare oñomi reta chugüi imbaeyekou reta yave, jare opaetei Egipto omboai yave, Etiopía pegua reta okɨɨye yaeta.

⁵ Jókuae ñeraro pe omanota vi sundaro reta Etiopía pegua, jare Fut pegua, Lud pegua, jare opaete Arabia pegua, Libia pegua jare opaete ïru tëtaguasu pegua reta oñemoïru jae ndive vae.

⁶ YandeYa Tumpa jei vi körai: Egipto imborɨa reta omano ñeraro pe, Migdol güive Sevene pe, Egipto imbaepuere re oyembotuicha yae vae oñemomichita opɨta. Che Tumpa jae kuae.’

⁷ Tëtaguasu Egipto amboaiasɨ katu yaeta, ïru tëtaguasu reta opa oyemboai vae güi, jëta guasu reta amboaiasɨ katu yaeta, ïru tëta guasu reta opa oyemboai vae güi,

⁸ Egipto re ayatɨka tata jare opa amboai imborɨa reta yave, oikuaa retata che ko jae peYa vae.

⁹ Jókuae ara amondota ñee jerajaa reta barco reta pe Etiopía pegua reta pe, jókuae oyemoambekombae ñogüɨnoi vae pe, jare jae reta okɨɨye yaeta Egipto pegua reta okɨɨye rami. Jókuae ara outa ete ma oväe.

¹⁰ Che peYa Tumpa jae körai: Amboaita Egipto pegua reta imbaeyekou, Nabucodonosor mburuvicha guasu Babilonia pegua rupi.

¹¹ Jae ojota isundaro reta ndive, jae reta ko jëia yae ïru tëtaguasu reta güi vae, omboai vaerä tëtaguasu, kɨsepuku pe opüa retata Egipto re, jare omanogüe reta tɨnɨeta jókuae ɨvɨ.

¹² Ɨ̈aka Nilo amondɨpata, jare ameeta jókuae ɨvɨ jekopochɨ vae reta ipo pe, ketɨgua reta imbaepuere rupi amboaita ɨvɨ jare opaete pɨpegua reta. Che peYa jae.

¹³ Che peYa Tumpa jae körai: Amboaita mbae iägüe reta oyemboete vae, amboaita Menfis pegua tumpa-raanga reta, mbaetɨ yeta ma mburuvicha Egipto pe, kɨɨye amotɨnɨeta jókuae ɨvɨ pe.

¹⁴ Tëta Patros amboaita, Zoán re ayatapɨta, tëta Tebas ajäata.

¹⁵ Aitɨta chearasɨ Sin re, jae ko Egipto iyeroviaka, jare amboaita Tebas pegua reta jeta yae vae.

¹⁶ Ayatapɨta Egipto re; tëta Sin oiporara yaeta, Tebas ikësea osururuta, Menfis okɨɨye aveita oiko.

¹⁷ Tëta Avén jare Pibeset pegua taɨrusu vae reta omanota ñeraro pe, jare kuña reta opata güɨraja tembipɨɨrä.

¹⁸ Tafnes pe ara oyembopɨtumimbita, Egipto imbaepuere jare iyembotuicha amboai yave; pɨtumimbita chupe reta, jare tëta raɨ reta pegua reta oyererajaukata tembipɨɨrä.

¹⁹ Aiporaraukata Egipto pegua reta pe, jayave oikuaa retata che ko jae Tumpa vae.”

²⁰ Oncea año pe, tenondegua yasɨ re, chiu araa pe, yandeYa Tumpa jei cheve:

²¹ “Nde kuimbae, Faraón mburuvicha guasu Egipto pegua güi, amopë iyɨva, jare mbaetɨ kia oipoano, mbaetɨ oyokua okuera vaerä, ipuere vaerä oipɨɨ ye kɨsepuku.

²² Jáeramo, yandeYa Tumpa jei körai: Che ayovaicho Faraón mburuvicha guasu Egipto pegua re. Amopëta mókoi reve iyɨva chugüi, ikavi oï vae jare opë ma vae, aitɨukata kɨsepuku ipo güi.

²³ Opata amoai moai Egiptoɨgua reta ïru tëtaguasu reta rupi.

²⁴ Amopɨ̈ratata mburuvicha guasu Babilonia pegua iyɨva reta, jare chekɨsepuku añonota ipo pe, ërei Faraón iyɨva reta amopëta, jare jäseta jovaicho jóvai, metei ipere vae omanota vae jäse rami.

²⁵ Amopɨ̈ratata mburuvicha guasu Babilonia pegua iyɨva reta, ërei Faraón iyɨva reta jëogüeta. Che añono yave chekɨsepuku mburuvicha guasu Babilonia pegua ipo pe, jare jae opüa yave Egipto pegua reta re, jayave oikuaa retata che ko jae Tumpa vae.

²⁶ Amoaita Egiptoɨgua reta ïru tëtaguasu reta rupi, jayave oikuaa retata che ko jae Tumpa vae.”