EZEQUIEL 3 - Biblia Guarani Tumpa Iñee

¹ Jayave jei cheve: “Nde kuimbae, emókoi kuae tembikuatía oyepomombɨ vae, javoi ekua nemiari Israel iñemuña reta pe.”

² Ayurupeka jare omee amókoi jókuae oyekuatía oyepomombɨ vae.

³ Javoi jei cheve: “Emókoi kuae oyekuatía oyepomombɨ vae, eñemoɨ̈vɨata pɨpe.” Che amókoi, jare ayandu jëe yae ei rami cheyuru pe.

⁴ Jayave jei cheve: “Nde kuimbae, ekua emoërakua Israel iñemuña reta pe, emombeu chupe reta cheñee reta.

⁵ Echa mbaetɨ ko romondo rogüɨnoi ïru tëta iñee yavai yaea pe ani reikuaambaea pe, romondo ko Israel iñemuña reta pɨri.

⁶ Mbaetɨ ko romondo jeta vae tëtaguasu reta iñee yavai vae ipɨte pe, ani iñee reikuaambae vae reta ipɨte pe; ërei ngatu ikotɨ reta romondo ko yave, jae reta oyeapɨsakata ko nderé.

⁷ Ërei Israel iñemuña reta ñäteɨta oyeapɨsaka nderé, echa ñäteɨ oyeapɨsaka reta cheré; echa iñeereenduä jare ipɨatäta yae vae reta ko.

⁸ Ërei che roapota ndepɨatäta yae vaerä, jae reta rami. Ndepɨarai yae vaerä ikotɨ reta.

⁹ Roapota täta yae ita diamante jee vae täta yae ïru ita reta güi rami. Agüɨye eipoɨu ani ekɨɨye chugüi reta, echa jae reta ipɨapochɨ yae ko.”

¹⁰ Jei ye cheve: “Nde kuimbae, eyeapɨsaka kavi opaete jaeta ndeve vae re, jare eñovatu ndepɨa pe.

¹¹ Javoi ekua nerëtaɨgua reta tembipɨɨrä ñogüɨnoi ïru ɨvɨ pe vae pɨri, güɨramoi oyeapɨsaka reta ani mbaetɨta oyeapɨsaka reta nderé, ërei ere chupe reta: ‘Körai jei yandeYa Tumpa.’ ”

¹² Jayave yandeYa imbaepuere chemopüa, jare cheraɨkue kotɨ aendu ñee täta jɨapu vae jei: “¡Toyemboeteuka yandeYa iyemboetea, jae oïa güi!”

¹³ Aendu vi jókuae mbae reta ipepo jɨapu oyopete yave ïru ipepo ndive, jare ruera reta ñogüɨnoi iyɨpɨ pe vae; jókuae jɨapu vae täta oyeendu.

¹⁴ Tumpa imbaepuere chemopüa jare cherenoe joko güi, chepɨakatúä jare chepɨatɨtɨ reve aja, ërei yandeYa täta chepɨɨ.

¹⁵ Jare aja aväe Tel-abib pe, ɨ̈aka Quebar jembeɨ pe, Israel iñemuña reta tembipɨɨrä yogüɨrekoa pe, joko pe apɨta jae reta ndive, jare kïrii aiko chiu ara.

Tumpa oñono Ezequiel sundaro ɨvate güi omae vae rami

¹⁶ Jókuae chiu ara jaɨkue rupi yandeYa jei cheve:

¹⁷ “Nde kuimbae, che roñono sundaro ɨvate güi omae vae rami, Israel iñemuña reta peguarä. Che amombeu yave ndeve mbae nunga ñee, emoërakua chupe reta oikuaa voi ñogüɨnoi vaerä.

¹⁸ Che jae yave iyoa vae pe: ‘Remanota ko’; jare nde mbaetɨ remboarakuaa ani remombeu chupe oeya vaerä jeko ikavimbae oikove oiko vaerä yave, jae omanota jeko kavimbae jeko peguai, ërei che romboekota imano re.

¹⁹ Ërei nde remboarakuaa tëi reve, jae mbaetɨ oeya jeko kavimbae yave, omanota iyoa jeko peguai, ërei nde reroasayepeta nderekove.

²⁰ Jaeramiño vi kuimbae jupi oiko vae opia jare oyapo yave ikavimbae, jare che añono yave mbae oasa vaerä, jae omanota, echa nde mbaetɨ remboarakuaa; mbaetɨta amae jupi oiko vae re; ërei che romboekota imano re.

²¹ Ërei jókuae kuimbae jupi vae remboarakuaa yave agüɨye vaerä iyoa, jare mbaetɨ iyoa yave, oikoveñota oiko, echa remboarakuaa; jare nde reroasayepeta nderekove.”

Ñeemombeúa Ezequiel opɨta iñeembae

²² Joko pe yandeYa ombou ipo cheré, jare jei cheve: “Epüa jare ekua ɨvɨpe kavi kotɨ, joko pe chemiarita ndeve.”

²³ Apüa jare aja ɨvɨpe kavi kotɨ, jare joko pe aecha yandeYa iyemboetea ɨ̈aka Quebar jembeɨ pe aecha rami; ayetavatɨka chetindɨasɨ reve ɨvɨ re.

²⁴ Jayave Tumpa imbaepuere ou cheré jare chemopüa chemboyemboɨ. Jayave yandeYa jei cheve körai: “Ekua jare eike eyeokenda ndero pe.

²⁵ Mase, nde kuimbae, neapɨti retata tɨmasa pe, agüɨye vaerä reo jae reta ipɨte pe.

²⁶ Jare vi che amboyata nekü neäpeku re, neñeembae repɨta vaerä, jare mbaetɨta reiko chupe reta kuimbae teko re omboeta vae, echa jae reta ko ipɨapochɨ vae reta.

²⁷ Ërei che romomiari yave, neñee yeta, jayave rereta chupe reta: ‘Körai jei yandeYa Tumpa’. Kia ikɨ̈reɨ oendu vae toendu, jare kia mbaetɨ ikɨ̈reɨ oendu vae agüɨye toendu. Echa jae reta ko ipɨapochɨ vae reta.