EZEQUIEL 29 - Biblia Guarani Tumpa Iñee

Egipto maratuta vae regua

¹ Payandepoa año pe, payandepoa yasɨ re, doce araa pe, yandeYa jei cheve:

² “Nde kuimbae, emae añave mburuvicha guasu Faraón Egipto pegua kotɨ, emoërakua ikotɨ maratuta oasata vae jare opaete Egipto pegua reta kotɨ.

³ Ere chupe reta: ‘CheYa Tumpa jei körai: Che ayovaicho nde ndive Faraón, mburuvicha guasu Egipto pegua; mbaeporou päicha guasu oyapakua ɨ̈aka mbɨte pe rami vae jei: Chembae ko kuae ɨ̈aka Nilo, che ko ayapo cheyeupe.

⁴ Tɨ̈ai añonota neäpua re, jare ambouta pira reta jókuae ɨ pegua oya ndepire re. ¡Rogüɨnoeta jókuae ɨ güi opaete jókuae pira reta oya ndepire re vae reve!

⁵ Jare romombota ñuu pe, opaete jókuae ɨ pegua pira reta ndive, ɨvɨ ipombae pe reata reo, ngaraa kia ndereupi neotɨ vaerä. Mbaeporou reta jare uruapúa reta opata ndereu.

⁶ Opaete Egipto pe peiko vae reta chekuaata che ko jae Tumpa vae. Israel iñemuña reta oeka yemborɨ peve, ërei pe reta täkuarasɨ opë ngatu vae ramiño chupe reta:

⁷ Oyepɨɨ reta tëi peré yave, täkuarasɨ opë ngatu vae rami pembopere reta, oyeko reta tëi peré yave, täkuarasɨ opë ngatu vae rami peitɨuka reta.

⁸ Jáeramo, cheYa Tumpa jei körai: Ambouta ñeraro ndeve, jare opata amokañɨtei kuimbae reta jare mɨmba reta ndegüi.

⁹ Ɨvɨ Egipto opɨtata ipombae, jare chekuaa retata che ko jae Tumpa vae. Echa rere: Ɨ̈aka Nilo chembae ko, che ko ayapo cheyeupe.

¹⁰ Jáeramo, che ayovaicho ndekotɨ jare neɨ̈aka re, amboaita ɨvɨ Egipto, aeyata ipombae Migdol güive Sevene pe jare Etiopía jembeɨ rupi.

¹¹ Mbaetɨta kia yepe ani mɨmba reta yepe oasa jokoropi. Cuarenta año rupi mbaetɨta kia oiko joko pe.

¹² Jare tëtaguasu Egipto amboaiasɨ katu yaeta, ïru tëtaguasu reta opa oyemboai vae güi; jëta guasu reta oyemboaita oiko cuarenta año rupi, Egipto pegua reta amoai moaita jëta güi ïru tëtaguasu reta rupi.

¹³ Echa, che ndeYa Tumpa jae körai: Cuarenta año oasa yave, amboatɨ yeta Egipto pegua reta opa oñemoai moaia kotɨ güi.

¹⁴ Tembɨpɨɨrä Egiptoɨgua yogüɨreko vae reta aru yeta oñemoëta Patros pe, jae reta jëta ae pe, joko pe yogüɨreko yeta, ërei mbaetɨta ma imbaepuere tenonde rami.

¹⁵ Michi yaeta ïru tëtaguasu reta güi, ngaraa ye ma güɨnoi mbaepuere ïru tëtaguasu reta re; echa che amomichita agüɨye vaerä ma güɨnoi mbaepuere ïru tëtaguasu reta re.

¹⁶ Israel pegua reta ngaraa ye ma oyeko Egipto pegua reta re, echa oecha retata oyavɨ reta yepe yogüɨraja yave oiporu yemborɨ Egipto pegua reta pe. Jayave chekuaa retata che ko jae peYa Tumpa vae.’ ”

¹⁷ Veintisiete añoa pe, tenondegua yasɨ re, tenondegua araa pe yandeYa jei cheve:

¹⁸ “Nde kuimbae, Nabucodonosor mburuvicha guasu Babilonia pegua, täta omombaravɨkɨ isundaro reta opɨ̈ro vaerä Tiro, opa iyatiɨ oyepiro reta, jare ia oyeavoo chugüi reta, ërei jae ave ani isundaro reta ave mbaetɨ mbae oekɨ iyeupeguarä.

¹⁹ Jáeramo, che Tumpa jae körai: Nabucodonosor mburuvicha guasu Babilonia pegua pe ameeta ɨvɨ Egipto, opɨ̈rota chugüi imbaeyekou reta jare opaete mbae güɨnoi vae; jókuae opɨ̈rogüe pe omboepɨta isundaro reta pe.

²⁰ Jeta oparavɨkɨ Tiro re jeko pegua, amee chupe kuae ɨvɨ Egipto, echa cheve ko oparavɨkɨ. Che Tumpa jae kuae.

²¹ Jókuae ara che amopüa yeta tëtaguasu Israel imbaepuere, jare nde Ezequiel nemiarita chupe reta. Jare oikuaa retata che ko jae peYa vae.”