EZEQUIEL 27 - Biblia Guarani Tumpa Iñee

Tairari mbɨatɨtɨ pegua tëta guasu Tiro re

¹ YandeYa jei cheve:

² “Nde kuimbae, etairari kuae tairari mano pegua pe Tiro re;

³ jókuae tëta guasu oï ɨguasu jembeɨ pe vae, omaemee jeta tëtaguasu reta ɨguasu jembeɨ rupi ñogüɨnoi vae pe vae. Ere chupe, yandeYa Tumpa jei körai: Nde Tiro, ndeiño rere ndeyegua: ‘Che ko barco ipöra yae vae jare ikavi yae vae.’

⁴ Ndembaepuere jembeɨ oï ɨguasu mbɨte kotɨ, ndeapo vae reta nemopöra kavi yae ndeapo.

⁵ Opaete ndeɨvɨra reta oyeporu vae, oyereru ɨvɨtɨ Senir güi; ɨvɨra pino reta oyereru ɨvɨtɨ Líbano güi, ndeguataka iɨrä.

⁶ Ɨvɨra roble jee vae Basán pegua oyapo reta negüɨ̈raperä; Quitim güi oyereru ɨvɨra pino jee vae oyapete reta vaerä, jare elefante jäimbuku pe omopöra reta.

⁷ Asoya lino pegua, oñemopöra vae Egipto pegua ko ndereroata ɨvɨtu re vae, osirive vi ndebanderarä; neküaraɨa pɨ̈taü jare jovɨü vae, oyereru ɨguasu jembeɨ Elisa güi vae.

⁸ Nde barco pe güɨ̈rapé pe ɨ oipɨu ndeve vae reta ko jae, kuimbae reta Sidón pegua jare Arvad pegua, ipoki yae ndereroata vae reta, jae ko kuimbae reta ndembaei.

⁹ Kuimbae reta okuakuaa ma vae Gebal pegua, ipoki yae ma oparavɨkɨ vae reta oyapete ndeyoapɨa pɨa rupi; opaete barco jeroataa reta, ombaegua ndembaembae remee vae güi.

¹⁰ Kuimbae reta ñeraro regua Persia pegua, Lud pegua jare Fut pegua yogüɨreko ndesundarorä; yeopiaka jare äka-ɨru jiero pegua oupi reta nderé, nemopöra pɨpe.

¹¹ Arvad pegua reta yogüɨreko ndesundaro reta ndive nekësea re ndeangareko vaerä, jare Gamad pegua reta maeka reta ɨvate vae pe. Iyeopiaka reta ombosagüɨu nekësea oguambɨ re, jökorai nemopöra yae ete reta.

¹² Tarsis pegua reta ombaegua ndegüi jeta yae ndembaeyekou ramo; oipoepɨ reta ndembaembae renoi vae korepoti ndive, jiero ndive, estaño ndive jare plomo ndive.

¹³ Jaeramiño vi Javán, Tubal jare Mesec ombaegua reta ndegüi; omboepɨ reta ndeve ndembaembae tembipɨɨ reta pe jare tembiporu reta jiero iyu vae pegua pe.

¹⁴ Togarma pegua reta omboepɨ ndeve ndembaembae remee vae, kavayu reta mbaravɨkɨ pegua pe jare ñeraro pegua pe, jare mburikaguasu reta pe.

¹⁵ Dedán pegua reta ombaegua vi ndegüi. Jeta tëtaguasu reta ɨguasu jembeɨ rupigua reta ombaegua ndegüi, omboepɨ reta ndeve elefante jäimbukugüe pe jare ɨvɨra ébano jee vae pe.

¹⁶ Edom pegua reta ogua ndegüi jeta mbaembae renoi vae, oipoepɨ reta ndegüi ita ipöra vae ndive, temimonderä pɨ̈taü vae ndive, temimonderä oñemopöra vae pe jare lino pegua vae pe, ïta rami vae coral jee vae pe, jare ita reta pɨ̈ta rubí jee vae pe.

¹⁷ Jaeramiño vi Judá jare Israel pegua reta ombaegua ndegüi, omboepɨ reta ndeve trigo Minit pegua pe jare Panag pegua pe, ei pe, olivo iasaite pe jare ɨvɨra iyaɨsɨgüe pe.

¹⁸ Damasco pegua reta ogua ndegüi jeta mbaembae renoi vae, jare opaete ndembaeyekou, omboepɨ reta ndeve vino Helbón pegua pe, jare vecharaagüe tïi vae pe.

¹⁹ Jaeramiño vi Dan pegua reta jare Javán yogüeru remaemeea pe, omboepɨ ndeve reta jiero oyeapo kavigüe pe, mirra pe jare mbae ikäti kavi vae pe.

²⁰ Dedán pegua reta ombaegua ndegüi, omboepɨ reta ndeve karuna ikavigüe pe.

²¹ Arabia pegua reta jare opaete mburuvicha reta Cedar pegua ombaegua ndegüi, omboepɨ reta ndeve vecha kuimbae taɨrusu vae pe, vecha kuimbae pe jare kavara kuimbae pe; kuaekuae reta re remee ndembaembae.

²² Omaemee vae reta Sabá pegua jare Raama pegua, yogüeru vi ombaegua ndegüi, jae reta omboepɨ kavi ndeve mbae ikäti kavi yae vae reta pe, ita ipöra vae pe jare oro pe.

²³ Harán, Cane jare Edén pegua reta, jare omaemee vae reta Sabá pegua, Asiria pegua jare opaete Quilmad pegua reta ombaegua ndegüi;

²⁴ omboepɨ reta ndeve temimonderä pɨ̈taü oñemopöra vae pe, temimonde jepɨ vae pe, tɨmasa ikavi yae vae pe jare ɨ̈vɨrare pe.

²⁵ Barco reta Tarsis pegua oyoaɨkue yoaɨkue güeru mbaembae ndeve. ‘Reyeapo metei barco ɨ mbɨte pe oï vae tɨnɨe mbaeyekou pe rami.

²⁶ Ndemboguataa reta ndereraja ɨ tɨpɨa rupi, ërei ɨvɨtu kuaraɨ oëa kotɨgua ndembosakambu ɨguasu mbɨte pe.

²⁷ Ndembaeyekou reta, mbaembae remee vae reta, nde barco pe güɨ̈rapé pe ɨ oipɨu ndeve vae reta, jare ndereroataa reta, oyapete ndeyoapɨa pɨa rupi vae reta, omaemee ndeve vae reta, jare opaete kuimbae reta ñeraro regua reta, jare opaete nderapɨpe ñogüɨnoi vae ɨguasu oyasoita, jókuae ara ndeasoi ɨguasu yave.

²⁸ Ndemboguataa reta jäsémbai pe, omokanata ɨguasu jembeɨ.

²⁹ Güɨ̈rapé pe ɨ oipɨu barco güɨroata vae reta, jare jeroataa ogüeyɨta ibarco güi ɨvɨ pe.

³⁰ Jäse retata nderé, neräpiro retata jasɨ katu reve, oñono retata iñäka re ɨvɨkúi, oyapayere retata tanimbu pe.

³¹ Oñeapiasɨ retata nderé, oyemonde retata temimonde mbɨatɨtɨ pegua pe, neräpiro retata jasɨ katu reve.

³² Otairari retata nderé tairari mano pegua pe, jei retata ipɨatɨtɨ reve: ¿Kia pa ipuere omboyovake Tiro, ɨguasu mbɨte pe oyemboai vae?

³³ Mbaembae remee vae ojo oväe kia pe yave, omboyerovia yae jeta vae tëta reta ïru ɨvɨ pe. Mburuvicha guasu reta ïru ɨvɨ pegua, remboikokatu jeta mbaeyekou renoi vae rupi.

³⁴ Jókuae ara ɨguasu opa ndeasoi yave, ndembaembae reta jare opaete ndemboguataa reta ɨguasu opata oyasoi nde ndive.

³⁵ Jare opaete tëta reta ɨguasu jembeɨ rupigua ipɨakañɨ yaeta nderé; jare juvicha guasu reta orɨrɨita okɨɨye güi, jova ambuae retata.

³⁶ Omaemee vae ïru ɨvɨ pegua reta, okɨɨyeta ndereecha yave. Repɨtata kɨɨyearä, jare ngaraa ye ma reiko jekuae avei pegua.’ ”