EZEQUIEL 26 - Biblia Guarani Tumpa Iñee

Tëtaguasu Tiro maratuta vae regua

¹ Oncea año re, tenondegua yasɨ re, tenondegua araa pe yandeYa jei cheve:

² “Nde kuimbae, Tiro jei Jerusalén kotɨ: ‘¡Tëta guasu Jerusalén opa oyemboai! Tëtaguasu pegua reta omaemee jare ombaegua yepi pɨpe vae. ¡Añave che mo tayemboikokatu, jae oyemboai oï ramboeve!’

³ Jáeramo che ndeYa Tumpa jae körai: Tiro, che ayovaicho nde ndive. Amopüata ndekotɨ jeta tëtaguasu reta ïru ɨvɨ pegua, ɨguasu omopüa iɨaparúa rami.

⁴ Omboai retata oguambɨ perëta guasu ikësea, ombosururuta maeka ɨvate vae reta. Ndekuigüe ave opata atupei ndegüi, jare aeyata itape güɨraiño.

⁵ Opɨtata pɨsa oñemotini jese vaeräño ɨguasu pe. Che peYa Tumpa jae kuae. Opata imbaembae opɨ̈ro chugüi ïru tëtaguasu pegua reta.

⁶ Jare tëta raɨ reta ñogüɨnoi ɨguasu jembeɨ rupi vae, opata oyuka reta kɨsepuku pe. Jayave chekuaa retata che ko jae Tumpa vae.

⁷ Echa, che ndeYa Tumpa jae körai: Ɨvɨtuguasu kotɨ güi aruta mburuvicha guasu Nabucodonosor oporepeña Tiro re; jae ko mburuvicha guasu imbaepuere yae vae Babilonia pegua. Yogüeruta kavayu regua reta ikavayu re, jare käretou reta ñeraro pegua ndive, yogüeruta jeta yeyé.

⁸ Jare nerëta raɨ reta ñogüɨnoi ɨguasu jembeɨ rupi vae, opata omboai reta kɨsepuku pe. Omopüata maeka ɨvate vae reta neova vaerä, omopüata yeupika oike reta vaerä ndeve, jare omondota sundaro reta yeopiaka reve reve ndeve.

⁹ Ombouta sundaro reta tembiporu reta mbae imbosururúa reve reve, ombosururu vaerä tëtaguasu ikësea, jare jiero pe omboai retata nemaeka ɨvate vae reta.

¹⁰ Mburuvicha guasu Nabucodonosor oike ma neröke rupi metei tëtaguasu pe oike opɨ̈ro vae rami yave, jeta yae oiketa kavayu re vae reta ndeatɨta ɨvɨtimbo pe, kavayu reta jare käretou reta iruera jɨapu pe, omokanata nekësea.

¹¹ Ikavayu reta re oguatata opaete ndekaye rupi, oyuka retata opaete nerëta ipo, jare omboai retata opaete nderokɨta reta ita pegua.

¹² Opɨ̈rota ndegüi ndembaeyekou reta, opɨ̈rota ndegüi mbaembae remee vae, nekësea reta ombosururuta, ndero reta ipöra vae omboai retata; jare opata omombo reta ɨguasu pe ndeita reta, ndeɨvɨra reta, jare ndero ikuigüe ave.

¹³ Jökorai amokïriita ndetairari reta, ngaraa ye ma oyeendu ndearpa ipu.

¹⁴ Roeyata itape güɨraiño, pɨsa reta oñemotini vaerä reikota, ngaraa ye ma reñemopüa pɨau ye. Echa che Tumpa jae kuae.

¹⁵ Che Tumpa jae körai Tiro pe: Tëta guasu reta ɨguasu jembeɨ rupi ñogüɨnoi vae, orɨrɨita okɨɨye güi oendu rea yave, jare jäse ipere vae reta jare jeta vae omano yave.

¹⁶ Jare opaete mburuvicha reta ɨguasu jembeɨ rupigua, ogüeyɨta jenda mborookuaía pegua güi, omboi retata iñeapevaa jare jemimonde ipöra yae vae, oguapɨ retata ɨvɨ re okɨɨye güi, orɨrɨi avei retata jare ipɨakañɨ yae retata ndesusere re.

¹⁷ Otairari retata nderé tairari mbɨatɨtɨ pegua, körai: ‘¡Maera pa ko rekañɨtei! ¡Maera pa ko rekañɨ ɨguasu güi, tëtaguasu jërakua yae vae! ¡Nerëta pegua reta ndive ndembaepuere yae ɨguasu pe, okɨɨye yepi ndegüi opaete ndeɨ́vɨri rupigua reta!

¹⁸ Añave rea jeko pegua tëta reta ɨguasu ipäu rupigua orɨrɨita okɨɨye güi. Añave reyemboai jeko pegua, ɨguasu ipäu rupigua reta okɨɨye yaeta.’

¹⁹ Echa, che Tumpa jae körai: Che roeyata tëta guasu jendagüeño, mbaetɨ kia oiko pɨpe rami vae; ambouta ɨguasu nderupi.

²⁰ Ndererajata ɨ́vɨkotɨ arakae ma omanogüe vae reta ipɨte pe, ndererajata ɨvɨkotɨasɨ arakae ma oyemboai vae reta ipɨte pe, jare reikota omanogüe vae reta yogüɨrekoa pe, agüɨye ye vaerä ma reñemopüa ye ani oime ndeipo reta.

²¹ Ropoepɨta kɨɨyearä jare ngaraa ye ma reiko. Ndereeka tëita vae, ërei ngaraa neväe chupe. Che Tumpa jae kuae.”