EZEQUIEL 25 - Biblia Guarani Tumpa Iñee

Amón maratuta vae regua

¹ YandeYa jei cheve:

² “Nde kuimbae, eyerova Amón iñemuña reta kotɨ, jare emoërakua ikotɨ reta maratuta vae,

³ ere chupe reta oyeapɨsaka vaerä ñee amondo chupe reta vae re: ‘Pe reta pesapúkai púkai peyerovia güi, peecha yave chetupao oyemboeteä opa oyemboai, jare ɨvɨ Israel oyemboai, jare Judá pegua reta oyererajauka tembipɨɨrä ïru ɨvɨ pe.

⁴ Jáeramo, che pomeeta tëta kuaraɨ oëa kotɨgua reta ipo pe, jae reta oyemombaeta peɨvɨ re, oyembojeyupata joko pe, oñemoëtata pɨpe. Jou retata peremitɨ iagüe jare perɨmba reta ineche.

⁵ Tëta guasu Rabá oikota jɨmba camello reta jekuarä, jare Amón iñemuña reta iɨvɨ vecha reta ikarúa renda. Jayave pe reta chekuaata che ko jae peYa vae.’

⁶ Echa, che ndeYa Tumpa jae körai: ‘Pe Amón iñemuña reta peyepopete jare pechäguariko peyerovia güi, jare pemotareɨ Israel iɨvɨ.

⁷ Jáeramo, aiporaraukata peve jare pomeeta ïru tëtaguasu reta pe, opɨ̈ro vaerä pegüi opaete pembaembae. Pomokañɨteita ïru tëta reta ipɨte güi, pomboaita ïru tëtaguasu reta güi, opaeteita pomokañɨtei. Jayave pe reta peikuaata che ko jae peYa vae.’ ”

Moab maratuta vae regua

⁸ Che peYa Tumpa jae körai: “Moab jare Seir pegua reta jei Judá pegua reta oyovakeño ïru tëtaguasu reta ndive.

⁹ Jáeramo amombuta jare aipeata tape Amón pegua reta iɨvɨ jembeɨ kotɨ, tëta guasu reta jembeɨ pegua rupi; opaeteita amboai tëta guasu jërakua yae vae reta Bet-jesimot, Baal-meón jare Quiriataim.

¹⁰ Kuaraɨ oëa kotɨgua reta pe apɨ̈roukata peɨvɨ, jare Amón iñemuña reta güi vi, agüɨye vaerä kia nunga tëtaguasu pegua reta imaendúa ye Amón iñemuña reta re.

¹¹ Aiporaraukata Moab pegua reta pe. Jayave chekuaa retata che ko jae Tumpa vae.”

Edom maratuta vae regua

¹² Che ndeYa Tumpa jae körai: “Edom oyepɨ Judá re, jare kuae oyapo vae rupi oyemboeko tuicha.

¹³ Jáeramo, che ndeYa Tumpa jae körai: Aiporaraukata vi Edom pe, amokañɨteita opaete vae reta jare mɨmba reta. Aeyata ipombae. Temán güive Dedán kotɨ, opata amokañɨtei reta ñeraro pe.

¹⁴ Aiporaraukata Edom pe Israel tëta chembae vae rupi; jae reta oyapota Edom pegua reta pe chearasɨ oï ikotɨ reta rupi. Jökorai oikuaa retata che ko aiporarauka chupe reta vae. Che peYa Tumpa jae kuae.”

Filisteo reta maratuta vae regua

¹⁵ Che ndeYa Tumpa jae körai: “Filisteo reta oyepɨ Israel pegua reta re omotareɨ yae reve, jovaichorä ñomai güɨreko ramo.

¹⁶ Jáeramo, che peYa jae körai: ‘Aiporaraukata filisteo reta pe, amokañɨteita cereteo reta jare jembɨregüe ɨguasu jembeɨ rupi ñogüɨnoi vae.

¹⁷ Aiporarauka yaeta chupe reta chearasɨ yae reve. Kuae ayapo vae rupi chekuaa retata che ko jae Tumpa vae.’ ”